مەملەكەت باسشىسى قازاقستاننىڭ تۇرىكمەنستانداعى جاڭادان تاعايىندالعان ەلشىسى نۇرلان نوعايەۆتى جانە قوعام قايراتكەرى، اكادەميك مۇحتار قۇل-مۇحاممەدتى قابىلدادى، دەپ حابارلايدى اقوردا.
كەزدەسۋ بارىسىندا قاسىم-جومارت توقايەۆ باۋىرلاس تۇرىكمەنستانمەن دوستىق، تاتۋ كورشىلىك جانە ستراتەگيالىق سەرىكتەستىك بايلانىستارىن ودان ءارى نىعايتۋدىڭ ماڭىزدىلىعىن اتاپ ءوتتى.
پرەزيدەنت ەكىجاقتى ىقپالداستىقتى، ونىڭ ىشىندە ەنەرگەتيكا، كولىك-ترانزيت، ساۋدا جانە مادەني-گۋمانيتارلىق سالالارداعى ىنتىماقتاستىقتى دامىتۋ جونىندە نۇرلان نوعايەۆقا ءبىرقاتار مىندەت جۇكتەدى.
مەملەكەت باسشىسى الداعى ۋاقىتتا وتەتىن جوعارى دەڭگەيدەگى كەلىسسوزدەردىڭ مازمۇندى ءارى ساپالى بولۋىنا باسا نازار اۋدارۋدى تاپسىردى.
سونىمەن قاتار مەملەكەت باسشىسى قاسىم-جومارت توقايەۆ قوعام قايراتكەرى، اكادەميك مۇحتار قۇل-مۇحاممەدتى قابىلدادى.
كەزدەسۋ بارىسىندا قازاقستاننىڭ عىلىمى مەن مادەنيەتى، مەملەكەتتىك جانە اقپاراتتىق قاۋىپسىزدىگى، سونداي-اق حالىقارالىق ىنتىماقتاستىق ماسەلەلەرى تالقىلاندى.
اكادەميك جاقىندا وتكەن شانحاي ىنتىماقتاستىعى ۇيىمى سامميتىندە مەملەكەت باسشىسىنىڭ قاۋىپسىزدىكتى نىعايتۋ، بەيبىتشىلىكتى، تۇراقتىلىق پەن ورنىقتى دامۋدى قامتاماسىز ەتۋ جونىندەگى باستامالارىنا قولداۋ ءبىلدىردى. مۇحتار قۇل-مۇحاممەد الەمدەگى ءتۇرلى قاقتىعىستاردى رەتتەۋ جانە ولاردىڭ الدىن الۋداعى ورتا دەرجاۆا رەتىندە تانىلعان قازاقستاننىڭ ءرولى ارتا تۇسكەندىگىن ايتتى. سونىمەن قاتار سامميتتە قابىلدانعان استانا دەكلاراسياسى مەن جيىرمادان استام قۇجاتتىڭ الەمدەگى قاۋىپسىزدىك پەن ىنتىماقتاستىقتى ودان ءارى نىعايتۋعا زور ۇلەس قوساتىنىن جەتكىزدى.
قاسىم-جومارت توقايەۆ تەڭ قۇقىلى سەرىكتەستىككە نەگىزدەلگەن ءتيىمدى ايماقتىق ىقپالداستىقتى قامتاماسىز ەتۋ ماقساتىندا قازاقستاننىڭ كوپجاقتى ىنتىماقتاستىعىنىڭ ماڭىزىن اتاپ ءوتتى. پرەزيدەنتتىڭ ايتۋىنشا، حالىقتار مەن مەملەكەتتەر اراسىنداعى ءوزارا سەنىم مەن تاتۋ كورشىلىكتى نىعايتۋدا قوعامدىق ديپلوماتيا ەرەكشە ءرول اتقارا الادى.
