بۇگىن مەملەكەت باسشىسى قاسىم-جومارت توقايەۆ ق ر پرەزيدەنتى جانىنداعى «ورتالىق كوممۋنيكاسيالار قىزمەتى» رەسپۋبليكالىق مەملەكەتتىك مەكەمەسىن قۇرۋ جونىندەگى جارلىققا قول قويدى.
اتالعان ۇيىمدى بۇعان دەيىن «جاستار» عىلىمي-زەرتتەۋ ورتالىعىنىڭ ديرەكتورى بولعان، ساياسي عىلىمدار كانديداتى، ۇلتتىق قوعامدىق سەنىم كەڭەسىنىڭ مۇشەسى تالعات قالييەۆ باسقارادى. مەملەكەت باسشىسى قاسىم-جومارت توقايەۆ ونى تاعايىنداۋ تۋرالى ارنايى وكىمگە قول قويدى. جاڭا باسشىسىنى ۇجىمعا ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى دارحان كالەتايەۆ تانىستىردى. ول سونداي-اق ق ر اقپارات جانە قوعامدىق دامۋ مينيسترلىگىنىڭ باسشىسى داۋرەن ابايەۆقا العىسىن ءبىلدىردى. سەبەبى، ورتالىق كوممۋنيكاسيالار قىزمەتى بۇعان دەيىن داۋرەن اسكەربە ۇلى باسقاراتىن مينيسترلىكتىڭ قاراماعىندا بولعان ەدى. بۇنىڭ سىرتىندا اقپارات جانە قوعامدىق دامۋ ءمينيسترى بۇل وزگەرىسكە قاتىستى فەيسبۋكتەگى پاراقاشاسىندا ءوز پىكرىن ءبىلدىردى.
«بۇگىن مەملەكەت باسشىسىنىڭ جارلىعىمەن ورتالىق كوممۋنيكاسيالار قىزمەتى قازاقستان رەسپۋبليكاسى پرەزيدەنتى اكىمشىلىگىنىڭ باسقارۋىنا بەرىلدى. ەڭ الدىمەن، ءۇش جىلدان استام ۋاقىت بىرگە جۇمىس ىستەگەن وكق قىزمەتكەرلەرىنە قايىرىلعىم كەلەدى. قۇرمەتتى ارىپتەستەر، سىزدەردىڭ جىگەرلەرىڭىز بەن ەرەن ەڭبەكتەرىڭىزدىڭ ارقاسىندا ورتالىقتىڭ جۇمىسىن ايتارلىقتاي جاڭعىرتىپ، ونىڭ تيىمدىلىگى مەن بەدەلىن جۋرناليستەر، ساراپشىلار جانە قوعامداستىق الدىندا ارتتىرا الدىق. سوڭعى ۇلگىدەگى تەحنيكالارمەن جابدىقتالعان جاڭا باسپا ءسوز ورتالىعىنىڭ اشىلۋىن ورتاق ۇلكەن جەتىستىگىمىز دەپ سانايمىن. بۇعان دالەل، مەديا-الاڭ ەلباسىنىڭ، قازاقستان پرەزيدەنتىنىڭ، ەڭ باستىسى ب ا ق وكىلدەرىنىڭ جوعارى باعاسىنا يە بولدى. تەك 2019 جىلدىڭ وزىندە وسى جەردە باسپا ءسوز ءماسليحاتى، تەلەكوپىر، ساراپشىلاردىڭ پىكىر الماسۋى، وڭىرلەر مەن شەتەلگە تىكەلەي بايلانىسقا شىعۋ سىندى 127 شارا ۇيىمداستىرىلدى. بۇل جەردە قازاقستاننىڭ ەكىنشى پرەزيدەنتىن سايلاۋعا قاتىستى تاريحي ناۋقاننىڭ دا ناتيجەسى جاريالانعان بولاتىن» — دەگەن داۋرەن ابايەۆ مەملەكەت باسشىسىنىڭ شەشىم اتالعان ماسەلەلەردى ەسكەرە كەلە قابىلدانعانىنا توقتالا كەلە ءوزىنىڭ قۇتتىقتاۋ لەبىزىن بىلدىرگەن.
