تاشكەنت قالاسىندا ورتالىق ازيا مەملەكەتتەرى سىرتقى ىستەر مينيسترلەرى ورىنباسارلارىنىڭ جىل سايىنعى كەزدەسۋى بولىپ ءوتتى. ەلىمىزدىڭ وسى سالاداعى ۆەدومستۆاسىنىڭ باسپا ءسوز قىزمەتى تاراتقان مالىمەتى بويىنشا، بۇۇ-نىڭ ورتالىق ازيا ءۇشىن الدىن-الۋ ديپلوماتياسى بويىنشا وڭىرلىك ورتالىعىنىڭ (بۇۇ ءواادوو) ۇيىمداستىرۋىمەن وتكەن ورتالىق ازيا ەلدەرى سىرتقى ىستەر مينيسترلەرىنىڭ ورىنباسارلارىنىڭ جىل سايىنعى كەزدەسۋىنە قازاقستان تاراپىنان سىرتقى ىستەر ءمينيسترىنىڭ ورىنباسارى ەرجان اشىقبايەۆ قاتىسقان.
وتىرىسقا ورتالىق ازياداعى بەس ەلدىڭ سىرتقى ىستەر مينيسترلەرىنىڭ ورىنباسارلارىمەن قاتار، بۇۇ ءواادوو باسشىسى - بۇۇ باس حاتشىسىنىڭ ارنايى ۋاكىلى ناتاليا گەرمان، بۇۇ-نىڭ ءبىرقاتار جوعارى لاۋازىمدى وكىلدەرى جانە اير بويىنشا ارنايى سەسسياسىنا اۋعانستان سىرتقى ىستەر ءمينيسترىنىڭ ورىنباسارى ناحيد ەسار باستاعان اۋعان دەلەگاسياسى قاتىستى.
ءىس-شارا بارىسىندا ورتالىق ازياداعى تۇراقتىلىق پەن قاۋىپسىزدىككە ايماقتىق جانە ۇلتارالىق سىن-قاتەرلەر، ايماق ەلدەرى جانە بۇۇ ءواادوو-نىڭ وسى سىن-قاتەرلەردى شەشۋ جونىندەگى بىرلەسكەن جۇمىسىنىڭ ناتيجەلەرى، سونداي-اق ايماقتىق ىنتىماقتاستىقتى ودان ءارى دامىتۋ پەرسپەكتيۆالارى تالقىلاندى.
ە.اشىقبايەۆ ءوز سوزىندە قازاقستان ورتالىق ازيا مەملەكەتتەرىنىڭ ايماقتىق جاقىنداسۋىنىڭ كەڭەيۋىن ءاردايىم قولدايتىنىن جانە ءوزارا سەنىم مەن ورتاق مۇددەلەردى قۇرمەتتەۋگە نەگىزدەلگەن ايماقتىڭ ساياسي جانە ەكونوميكالىق تۇراقتى جانە ءقاۋىپسىز دامۋىنا ەلىمىزدىڭ ەرەكشە قىزىعۋشىلىعىن اتاپ ءوتتى. ول ورتالىق ازيا كەزىگىپ وتىرعان ءبىرقاتار قاۋىپ-قاتەرلەرگە جانە ولارعا توتەپ بەرۋ شارالارىنا توقتالدى.
ايماقتاعى نەگىزگى سىن-قاتەرلەردىڭ قاتارىندا تەرروريزم مەن ەكسترەميزم، ەسىرتكىنىڭ زاڭسىز اينالىمى جانە ترانسۇلتتىق قىلمىس، ادام ساۋداسى، سۋ-ەنەرگەتيكا جانە ەكولوگيالىق ماسەلەلەر، ترانزيت جانە الەمدىك نارىققا شىعۋ ماسەلەلەرى اتاپ ايتىلدى.
جالپى، سپيكەرلەر ايماقتىق ىنتىماقتاستىقتىڭ دامۋ ديناميكاسىن وڭ باعالاپ، وعان ماڭىزدى سەرپىن نۇر-سۇلتان مەن تاشكەنتتەگى سامميتتەر بولعانىن اتاپ ايتتى. سونىمەن قاتار، كورشى اۋعانستانمەن ىنتىماقتاستىقتى نىعايتۋدىڭ جانە ونى قاۋىپ-قاتەر كوزى رەتىندە ەمەس، سەرىكتەس رەتىندە قابىلداۋدىڭ ماڭىزدىلىعىنا نازار اۋدارادى.
ۇكىمەتتەر مەن جاستار اراسىنداعى ايماقتىق ءۇنقاتىسۋ جونىندەگى بۇۇ ءواادوو باستاماسىنىڭ اياسىندا جاستار وكىلدەرىمەن ايماقتىڭ دامۋىنىڭ بولاشاعىن تالقىلاۋعا ارنالعان جەكە سەسسيا بولىپ ءوتتى.
وسى فورماتتا وتكەن كەزدەسۋ ءوزىن ايماقتىق سيپاتتاعى ماسەلەلەردى تالقىلاۋ جانە ولار بويىنشا شەشىم قابىلداۋ ءۇشىن ءتيىمدى تۇعىرناما رەتىندە كورسەتتى.
سونداي-اق، ءىس-شارا اياسىندا ە. اشىقبايەۆ ءوزىنىڭ ورتالىق ازيالىق ارىپتەستەرىمەن ءبىرقاتار كەزدەسۋلەر وتكىزىپ، ەكىجاقتى قاتىناستاردىڭ قازىرگى جاعدايى مەن ءتۇرلى فورماتتاعى ىنتىماقتاستىقتى نىعايتۋ پەرسپەكتيۆالارىن تالقىلاندى. سىرتقى ىستەر ءمينيسترىنىڭ ورىنباسارى سونىمەن بىرگە بۇۇ ارنايى وكىلى ن.گەرمانمەن كەزدەسىپ، قازاقستان رەسپۋبليكاسى مەن ورتالىق اراسىنداعى ىنتىماقتاستىقتى ودان ءارى كەڭەيتۋ مەن تەرەڭدەتۋدى ماسەلەلەرى بويىنشا پىكىر الماستى.
سۋرەت mfa.gov.kz سايتىنان الىندى.
