ەلوردادا قازاقستان مۇسىلماندارى ءدىني باسقارماسىنا قارايتىن «مۇنارا» اتتى گازەتتىڭ تۇساۋكەسەرى ءوتتى. شاراعا باس ءمۇفتي سەرىكباي قاجى وراز، ءبىرىنشى نايب ءمۇفتي، نۇر-سۇلتان قالاسىنىڭ باس يمامى ناۋرىزباي قاجى تاعان ۇلى، نايب ءمۇفتي ەرشات وڭعاروۆ، قمدب اپپارات باسشىسى عىلىمبەك ماجييەۆ پەن ءمۇفتيات قىزمەتكەرلەرى قاتىستى.
«راس، بۇگىندە ادامنىڭ وي-پىكىرىن ءبىر ارناعا بۇرۋدا بۇقارالىق اقپارات قۇرالىنىڭ ماڭىزى ارتىپ كەلەدى. ويتكەنى، بولعان وقيعاعا اركىم ءار راكۋرستان قارايدى. ونى ءوز دەڭگەيىندە قورىتىپ، ساراپتايدى. «مۇنارا» وبەكتيۆتى اقپارات تاراتۋمەن قاتار، ءسالت-داستۇر، تاريح، ءبىلىم، مەديسينا، ت.ب. سالالار بويىنشا عالىمداردىڭ ىزدەنىستەرىن، زەرتتەۋ ماقالالارىن تۇراقتى تۇردە جاريالايدى. ويتكەنى، يسلام قۇلشىلىق پەن تىرشىلىكتى ۇيلەستىرە وتىرىپ ءومىر سۇرۋگە ۇندەيدى. ءبىز يمان ۇعىمىن «ۇيات بولادى، وبال بولادى، ساۋاپ بولادى» دەگەن ءبىراۋىز سوزگە سىيدىرا بىلگەن حالىقپىز. يسلام قۇندىلىقتارىن قازاقى تانىم-تۇسىنىك اياسىندا ناسيحاتتاۋ، بىرلىك پەن ىزگىلىكتى تۋ ەتەتىن، ەلدىڭ ەرتەڭىنە ەلەڭدەيتىن ەر-ازاماتتاردىڭ پاتريوتتىق سەزىمىن وياتۋ – «مۇنارانىڭ» باستى مۇراتى»، – دەپ اتاپ ءوتتى سەرىكباي ساتىبالدى ۇلى.
«مۇنارا» – قمدب-نىڭ رەسمي رۋحاني-تانىمدىق گازەتى. مەنشىك يەسى – «ءمۇفتيات باسپاسى» ج ش س. ديرەكتورى – مۇرات ماناپ ۇلى. باس رەداكتورى – سەرىكبول حاسان، شەف رەداكتورى – اعابەك قونارباي ۇلى، ال شاريعي رەداكتورى – حاسان امانقۇل.
ايىنا ەكى رەت شىعاتىن گازەت 25 مىڭ دانامەن تارايدى.
سۋرەتتەر muftyat.kz سايتىنان الىندى.
