الەمدىك Reuters اگەنتتىگىندە قازاقستان ازەربايجان اۋماعىمەن وتەتىن مۇناي قۇبىرلارى ارقىلى جىلىنا 1،5 ميلليون توننا مۇناي ەكسپورتتاۋدى جوسپارلاپ وتىر دەگەن سىڭايدا ماقالا جاريالاندى.
اقپاراتقا قاراعاندا، قازاقستان جىلىنا 1،5 ميلليون توننا مۇنايدى رەسەيدى اينالىپ وتەتىن باكۋ – تبيليسي – جەيحان مۇناي قۇبىرى ارقىلى ەكسپورتتاماق. "قازمۇنايگاز" ۇلتتىق كومپانياسى ازەربايجان مەملەكەتتىك SOCAR كومپانياسىمەن بۇل ماسەلە بويىنشا كەلىسسوز جۇرگىزىپ جاتىر.
بۇل اقپاراتتى اتىراۋدا ساپارمەن جۇرگەن ەنەرگەتيكا ءمينيسترى بولات اقشولاقوۆ قازاقستان باكۋ – تبيليسي – جەيحان مۇناي قۇبىرى ارقىلى 1،5 ملن توننا مۇناي ەكسپورتتاۋدى جوسپارلاپ وتىر دەگەن اقپاراتتى جوققا شىعاردى.
«اقپاراتتىق رەسۋرستا ايتىلىپ جاتقان كولەممەن ءبىزدىڭ ەكسپورتتىق باعىتتاعى پروبلەمانى شەشۋ اقىلعا سىيمايدى. نەگە؟ ويتكەنى، بىرىنشىدەن، اتالعان باعىتپەن 1،5 ملن توننا مۇنايدى ەكسپورتتاۋ قازىرگى احۋالدى ايتارلىقتاي جەڭىلدەتپەيدى. ەكىنشىدەن، ءبىزدىڭ مينيسترلىكتە ءدال مۇنداي كەلىسىمگە قول قويۋ جوسپارى جوق»، -دەدى مينيستر اتىراۋدا وتكەن باسپا ءسوز ءماسليحاتىندا.
«قازمۇنايگاز» ۇلتتىق كومپانياسى مۇناي تاسىمالداۋدىڭ بالاما باعىتتارى پىسىقتالىپ جاتقانىن ايتتى. ءبىراق Reuters-تە جاريالانعان اقپاراتتى راستامادى.
«قازمۇنايگاز قازىرگى ۋاقىتتا مۇنايدى كاسپيي قۇبىر كونسورسيۋمى جۇيەسىنەن باسقا باعىتتار ارقىلى دا ەكسپورتتاۋدا. اتاپ ايتقاندا، اتىراۋ-سامارا، سونداي-اق جۇڭگو باعىتىنداعى قازاقستان-قىتاي قۇبىرى، اقتاۋ پورتى (ماحاچكالا/باكۋ) باعىتتارى قولجەتىمدى. سونىمەن قاتار كومپانيا مۇنايدى تاسىمالداۋ باعىتتارىن ءارتاراپتاندىرۋ بويىنشا قوسىمشا جۇمىستار جۇرگىزۋدە. مۇناي تاسىمالداۋدىڭ باسقا دا ءتيىمدى بالاما باعىتتارى قازىرگى ۋاقىتتا پىسىقتالىپ جاتىر»- دەدى ۇلتتىق كومپانيا.
ايتا كەتسەك، قازاقستان مۇناي ەكسپورتىنىڭ 80 پايىزدان استامىن رەسەي اۋماعى ارقىلى وتەتىن كاسپيي قۇبىر جەلىسى ارقىلى جۇرگىزەدى. ۋكرايناداعى جاعداي ۋشىققان كەزدە كاسپيي قۇبىر جەلىسى ءتۇرلى سەبەپتەرمەن جۇمىسىن توقتاتىپ قالىپ تۇردى.
جىلپى ساراپشىلار قازاقستاندا كاسپيي قۇبىر جەلىسىنە بالاما باعىت جوق ەكەنىن ايتقان بولاتىن.
«كاسپيي قۇبىر كونسورسيۋمى سياقتى مۇناي تاسىمالداۋدىڭ بالاما باعىتى جوق جانە بۇل تۇراقتى جولداردىڭ ءبىرى بولىپ كەلدى. بۇل قۇبىر ارقىلى تەڭىز، قاشاعان، قاراشىعاناقتاعى مۇنايدى ءوندىرىپ وتىرعان شەتەلدىك كومپانيالارعا تيەسىلى ونىمدەر جونەلتىلەدى. جانە وسى كومپانيالار كاسپيي قۇبىر كونسورسيۋمىنىڭ نەگىزگى اكسيونەرلەرى بولىپ تابىلادى. ورتاق مۇددەلەر ماسەلەنى جىلدام شەشۋگە تىرىسادى»، - دەيدى مۇناي-گاز سالاسىنىڭ ساراپشىسى ولجاس بايديلدينوۆ Ulys-قا بەرگەن مالىمەتىندە.
