سىرتقى ىستەر ءمينيسترىنىڭ ورىنباسارى رومان ۆاسيلەنكو 11 قىركۇيەكتە استانادا وتكەن شەتەلدىك جۋرناليستەرگە ارنالعان بريفينگ بارىسىندا بۇل پىكىر قازاقستاننىڭ مەملەكەتتىك قۇرىلىس جونىندەگى كۇش-جىگەرگە دە، قازىرگى زامانعى حالىقارالىق سىن-قاتەرلەرگە دە كوزقاراسىنىڭ نەگىزىندە جاتىر دەپ ءتۇسىندىردى، دەپ حابارلايدى Ulys.
ايتا كەتسەك، دۇنيەجۇزىلىك كوشپەندىلەر ويىندارىنىڭ اشىلۋ سالتاناتىندا ق ر پرەزيدەنتى قاسىم-جومارت توقايەۆ قازاق حالقىنىڭ قيىن جاعدايلارعا كۇش پەن توزىمدىلىكپەن قارسى تۇرۋدىڭ تۋا بىتكەن قابىلەتىنە سىلتەمە جاساي وتىرىپ، كوشپەندىلەردىڭ «تۋمىسىنان قايسار» ەكەنىن اتاپ وتكەن ەدى.
«بۇل بىرەگەي سپورتتىق جارىس ءبىز ساقتاۋعا تىرىساتىن جاھاندىق كوشپەلى قاۋىمداستىقتىڭ جارقىن مادەنيەتىن كورسەتەدى. اشىلۋ سالتاناتىندا قازاقستان پرەزيدەنتى قاسىم-جومارت توقايەۆ اتاپ وتكەندەي، قازاق حالقى مەنتاليتەتى بويىنشا كوشپەندىلەر، تۋمىسىنان قايسار ءارى تابيعاتىنان باتىل»، - دەدى ر.ۆاسيلەنكو.
سونىمەن قاتار، ءمينيستردىڭ ورىنباسارى قازاقستاننىڭ ەجەلگى داستۇرلەردى ساقتاۋشى رەتىندەگى، سونداي-اق ۇلتتار اراسىنداعى زاماناۋي كوپىر رەتىندەگى رولىنە توقتالىپ، ەلدىڭ قايسار ءارى بولاشاققا باعىتتالعان سىرتقى ساياسي كوزقاراستارىن اتاپ ءوتتى.
ر.ۆاسيلەنكودان «تۋمىسىنان قايسار» ماعىناسىن ەگجەي-تەگجەيلى ءتۇسىندىرۋدى سۇراعاندا، ول قازاق حالقىن سيپاتتايتىن تەرەڭ قايسارلىق پەن توزىمدىلىك قاسيەتتەرى تۋرالى ايتىپ، ونى تاۋەلسىزدىكتىڭ سوڭعى 30 جىلىنداعى ۇلتتىڭ جەتىستىكتەرىمەن بايلانىستىردى. «كوشپەندىلەر ءۇشىن بۇل وتە ماڭىزدى جانە ولارعا ءتان قاسيەت. بۇل ءبىزدىڭ قانىمىزدا. (...) ەگەر بىزدەرگە، قازاقتارعا قايسار ەكەنىمىزدى ايتسا، ءبىز باسىمىزدى جوعارى قاراتىپ، كەۋدەمىزدى كەرىپ، ەڭسەمىزدى تىك كوتەرىپ، تەرەڭ تىنىس الامىز دا، قيىندىقتى جەڭۋ ءۇشىن العا قادام باسامىز. بۇل «مەن ءبارىن جاساي الامىن» مەنتاليتەتى سوڭعى 30 جىل بويى ەلىمىزدىڭ دامۋىن جەتەلەپ كەلە جاتىر»، – دەدى ول.
ءمينيستردىڭ ورىنباسارى ءوز جەرىن قورعاۋ ءۇشىن كۇرەسكەن جانە ديپلوماتيا، تاپقىرلىق جانە تاباندىلىقتىڭ ارقاسىندا بولاشاق ۇرپاققا ۇلاڭعايىر جەردى ساقتاپ قالعان قازاق اتا-بابالارىنىڭ قايسارلىعى تۋرالى وي قوزعادى.
«وسى مۇراعا سۇيەنە وتىرىپ، قازاقستان ەل ىشىندەگى بەيبىتشىلىكتى باعالاپ قانا قويماي، حالىقارالىق ارەنادا بەيبىتشىلىك پەن ىنتىماقتاستىقتى نىعايتۋعا ۇمتىلۋدى جالعاستىرۋدا»، - دەگەن پىكىر ايتتى.
