مەملەكەتتىك ساتىپ الۋ – جاڭاشىلدىقتاردى، وزىق تەحنولوگيالار مەن وتاندىق ءوندىرىستى ىلگەرىلەتۋگە ىقپال ەتەتىن ءتيىمدى تەتىك. وسىعان وراي قارجى مينيسترلىگى وڭىرلەردە «مەملەكەتتىك ساتىپ الۋ تۋرالى» زاڭداعى نەگىزگى وزگەرىستەردى تۇسىندىرۋگە ارنالعان بيزنەس وكىلدەرىمەن، مەملەكەتتىك سەكتورمەن جانە ازاماتتىق قوعام وكىلدەرىمەن كەزدەسۋلەر وتكىزۋدى جالعاستىرىپ كەلەدى.
بۇل جولى كەزەكتى كەزدەسۋ وسكەمەندە وتكىزىلىپ، قارجى ۆيسە-مينيسترى داۋرەن كەڭبەيل مەن شىعىس قازاقستان وبلىسى اكىمىنىڭ ورىنباسارى دارحان ساپانوۆ مەملەكەتتىك ساتىپ الۋ ارقىلى وتاندىق تاۋار وندىرۋشىلەردى قولداۋ تۇرلەرى تۋرالى ايتىپ بەردى. ءىس-شاراعا شىعىس قازاقستان مەن اباي وبلىستارىنىڭ بيزنەس قاۋىمداستىعى، سونداي-اق مەملەكەتتىك ورگانداردىڭ، بيۋدجەتتىك ۇيىمداردىڭ، شوب پەن «اتامەكەن» ۇكپ وڭىرلىك فيليالىنىڭ وكىلدەرى قاتىستى.
داۋرەن مارات ۇلى اتاپ وتۋىنشە، مەملەكەت باسشىسى قازاقستان حالقىنا جولداۋىندا وتاندىق بيزنەستىڭ ساپالى دامۋىن ىنتالاندىرىپ، قولداۋدى تاپسىرعان بولاتىن. وسى تۇرعىدان العاندا «مەملەكەتتىك ساتىپ الۋ تۋرالى» زاڭ اتالعان مىندەتتى ورىنداۋداعى ماڭىزدى قۇرال سانالادى.
«مەملەكەتتىك ساتىپ الۋدىڭ اشىق جانە جاقسى ۇيىمداستىرىلعان جۇيەسى پروسەستىڭ بارلىق مۇددەلى تارابىنا، ونىڭ ىشىندە مەملەكەتتىك سەكتورعا، بيزنەس پەن ازاماتتارعا ءتيىمدى. ويتكەنى بۇل باسەكەلەستىكتىڭ ارتۋىنا جانە كورسەتىلەتىن قىزمەتتەر مەن تاۋارلاردىڭ ساپاسىن جاقسارتۋدا سەپتىگى زور. مىسالى، ساتىپ الۋعا قاتىسۋشىلاردىڭ بىلىكتىلىگىن ارتتىرۋ ءۇشىن ءتيىستى بەدەلى بار وندىرۋشىلەر اراسىندا ساتىپ الۋدى جۇزەگە اسىرۋ ۇسىنىلادى. ءوندىرۋشى تۋرالى اقپارات ءتۇرلى دەرەكقورلاردى پايدالانا وتىرىپ قالىپتاستىرىلادى. بۇل قىزمەت كورسەتۋشىلەردى اۆتوماتتى تۇردە تاڭداۋعا كوشۋگە مۇمكىندىك بەرەدى»، - دەدى قارجى ۆيسە-مينيسترى.
بۇدان باسقا وتاندىق تاۋار وندىرۋشىلەردى قولداۋ ماقساتىندا قارجى مينيسترلىگى تەك شاعىن جانە ورتا كاسىپكەرلىك سۋبەكتىلەرىنەن ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ جەكەلەگەن تىزبەسىن بەكىتتى.
زاڭنىڭ بىرنەشە ءبولىمى ساتىپ الۋ پروسەدۋراسىن جەڭىلدەتۋگە باعىتتالعان. بۇل ولاردى قىسقا مەرزىمدە وتكىزۋگە مۇمكىندىك بەرەدى. بۇدان بولەك تاپسىرىس بەرۋشىلەردىڭ جوعارى تالاپتاردى بەلگىلەۋ فاكتىلەرىن بولدىرماۋ ماقساتىندا قولدانىستاعى كامەرالدى باقىلاۋدى ساقتاۋ جوسپارلانعان. بۇل رەتتە ۋاكىلەتتى ورگان تاراپىنان ساتىپ الۋ قورىتىندىلارىنىڭ كۇشىن جويۋ قۇقىعى الىنىپ تاستالعان.
مۇنداي كەزدەسۋلەر مينيسترلىكتىڭ ىسكەر ورتامەن ءوزارا ءىس-قيمىلدى نىعايتۋ مەن بارلىق مۇددەلى تاراپ ءۇشىن قولجەتىمدى اقپاراتتى قامتاماسىز ەتۋ جونىندەگى ستراتەگياسىنىڭ ماڭىزدى بولىگى بولىپ سانالادى. ۆەدومستۆو قازاقستان ەكونوميكاسىن دامىتا وتىرىپ، مەملەكەتتىك ساتىپ الۋ جۇيەسىنىڭ تيىمدىلىگىن ارتتىرۋ مەن وزەكتى ماسەلەلەردى بىرلەسىپ شەشۋ ءۇشىن كاسىپكەرلەرمەن، ءىرى بيزنەس وكىلدەرىمەن جانە قوعامدىق بىرلەستىكتەرمەن جۇيەلى ديالوگ ورناتۋدى جالعاستىرىپ كەلەدى.
