مەملەكەت حالىق الدىنداعى ءوزىنىڭ بارلىق الەۋمەتتىك مىندەتتەمەلەرىن ورىندايدى. بۇگىنگى تاڭدا مەملەكەتتىك بيۋدجەت قاراجاتىنىڭ 50%-دان استامى ازاماتتاردى مەملەكەتتىك قولداۋعا جۇمسالادى، دەپ حابارلايدى BAQ.KZ.
الەۋمەتتىك قولداۋ
وتكەن جىلى ازاماتتاردىڭ الەۋمەتتىك وسال توپتارىن الەۋمەتتىك قولداۋعا رەسپۋبليكالىق بيۋدجەتتەن عانا 5،4 ترلن تەڭگە قاراجات ءبولىندى.
بيىل ول 6 ترلن تەڭگەدەن استى. الەۋمەتتىك قولداۋ شامامەن 5 ملن ادامعا نەمەسە ءاربىر ءتورتىنشى قازاقستاندىققا كورسەتىلەدى دەپ كۇتىلۋدە.
ولاردىڭ ىشىندە 2،5 ملن استام زەينەتكەر، شامامەن 1 ملن مۇگەدەكتىگى بار ادامدار، 500 مىڭنان استام بالالارى بار وتباسى جانە ازاماتتاردىڭ باسقا دا ساناتتارى.
بۇل رەتتە الەۋمەتتىك تولەمدەردىڭ ساتىپ الۋ قۇنىن قامتاماسىز ەتۋ ءۇشىن جاردەماقىلاردىڭ بارلىق تۇرلەرىنىڭ مولشەرى ينفلياسيا دەڭگەيىنە ۇلعايتىلدى، ال ورتاق زەينەتاقىنىڭ – ينفلياسيا دەڭگەيىنەن اسىپ ءتۇسۋى +2 پايىز.
جەرگىلىكتى جەرلەردە ومىرلىك قيىن جاعدايدا جۇرگەن تۇلعالارعا اتاۋلى الەۋمەتتىك كومەك بولۋگە ەرەكشە نازار اۋدارىلادى.
وتكەن جىلى جەرگىلىكتى بيۋدجەتتەن اتاۋلى الەۋمەتتىك كومەك كورسەتۋگە 39،5 ملرد تەڭگە بولىنگەن بولسا، بيىل وڭىرلەردە ءومىر ءسۇرۋ قۇنىنىڭ اۋىتقۋى مۇمكىن بولعان جاعدايدا ازاماتتارعا قولداۋدى كۇشەيتۋگە بولىنگەن قاراجات سانى 132 ملرد تەڭگەدەن استى.
جەرگىلىكتى اتقارۋشى ورگاندار تۇرعىن ءۇي كومەگى رەتىندە بولىنەتىن قاراجات كولەمىن 2،6 ملرد تەڭگەگە دەيىن ۇلعايتتى، وندا كوممۋنالدىق قىزمەتتەردىڭ جەكەلەگەن تۇرلەرىنىڭ تاريفتەرىنە قاتىستى وزگەرىستەر قاراستىرىلعان.
سونىمەن قاتار، جەرگىلىكتى ءماسليحاتتاردىڭ شەشىمى بويىنشا، جەرگىلىكتى بيۋدجەتتەردە ازاماتتاردىڭ جەكەلەگەن ساناتتارىنا الەۋمەتتىك قولداۋ كورسەتۋگە 75 ملرد تەڭگەدەن استام قاراجات كوزدەلگەن. بۇل ساناتتاردى جاو وزدەرى انىقتايدى (الەۋمەتتىك ماڭىزدى اۋرۋلارى بار ادامدار، جالعىزباستى ازاماتتار، تابيعي اپاتتاردان زارداپ شەككەندەر جانە ت.ب.).
سونداي-اق، 2025 جىلى جۇمىسپەن قامتۋعا جاردەمدەسۋدىڭ بەلسەندى شارالارىن جۇزەگە اسىرۋعا 211،8 ملرد تەڭگە قاراستىرىلعان. بۇل قاراجات 218،7 مىڭ جۇمىسسىز ازاماتتى جۇمىسپەن قامتۋعا جاردەمدەسۋگە باعىتتالادى.
بالالاردى قولداۋ
بيىلعى وقۋ جىلىندا 1،7 ميلليوننان استام بالا تەگىن تاماقپەن قامتاماسىز ەتىلەدى، بۇل ماقساتقا جۇمسالاتىن شىعىن 192 ملرد تەڭگەدەن اسادى.
مەملەكەت مەكتەپكە دەيىنگى جانە مەكتەپتىك ءبىلىم بەرۋ ءۇشىن 5،3 ترلن تەڭگە باعىتتايدى.
مەكتەپ جاسىنا دەيىنگى بالالار مەن مەكتەپ وقۋشىلارىنا ارنالعان جان باسىنا شاققانداعى نورماتيۆتەر مەملەكەتتىك مەكەمەلەرگە عانا ەمەس، ءبىلىم بەرۋ قىزمەتىن كورسەتەتىن جەكە ۇيىمدارعا دا بەرىلەدى.
وتكەن جىلى تاراز، شىمكەنت، تۇركىستان جانە ورال قالالارىنداعى مەكتەپكە دەيىنگى ۇيىمداردا ۆاۋچەرلىك قارجىلاندىرۋدى ەنگىزۋدىڭ ارقاسىندا جاو بالاباقشالارداعى كەزەكتى رەتتەپ، بۇرىن كەزەكتە تۇرعان بالالاردى تولىعىمەن ورنالاستىردى. بيىل بۇل جۇمىس ەل كولەمىندە جۇرگىزىلەدى.
ازاماتتاردى كورسەتىلەتىن مەملەكەتتىك قولداۋ تۇرلەرى تۋرالى اقپاراتتاندىرۋ، وسى كومەكتى ۋاقىتىلى الۋ جانە ونىڭ بەرىلۋىنە وزدىگىنەن مونيتورينگ جۇرگىزۋ ماقساتىندا بالالارعا تەگىن تاماق پەن ازاماتتارعا تەگىن دارى-دارمەكتەردى الۋ ءۇشىن الەۋمەتتىك ءامياندى ەنگىزۋ باستالدى.
تەك وتكەن جىلدىڭ ءتورت ايىندا عانا الەۋمەتتىك ءامياندى پايدالانا وتىرىپ، 1،7 ملن رەسەپت بويىنشا تەگىن دارى-دارمەك بەرىلدى. بيىل وسى قۇرالدى قولدانا وتىرىپ كورسەتىلەتىن كومەك تۇرلەرى كەڭەيتىلەدى.
ستۋدەنتتەردى قولداۋ
جوو مەن تجكب ستۋدەنتتەرىنىڭ ستيپەنديالارى ءبىر دەڭگەيگە جەتتى دەۋگە بولادى. بيىلعى جىلى ستۋدەنتتەردىڭ ورتاشا ستيپەندياسى 52 مىڭ تەڭگەنى قۇرايدى (پەداگوگيكالىق جانە مەديسينالىق باعىتتار بويىنشا – 84 مىڭ تەڭگە)، ماگيسترانتتاردىكى – 117 مىڭ تەڭگە، دوكتورانتتاردىكى – 262 مىڭ تەڭگە.
وسى ماقساتتارعا 2025 جىلعا ارنالعان مەملەكەتتىك بيۋدجەتتەن جوو ستۋدەنتتەرىنە شامامەن 150 ملرد تەڭگە، ال كوللەدج ستۋدەنتتەرىنە 85 ملرد تەڭگە بولىنەدى.
بارلىق ستۋدەنتتەردى جاتاقحانامەن قامتاماسىز ەتۋ ءۇشىن 40 جاتاقحانا سالىنىپ، ولاردا 11 مىڭنان استام ورىن دايىندالدى.
الەۋمەتتىك وسال وتباسىلاردان شىققان قالالىق ەمەس ستۋدەنتتەرگە («اتا-اناسىنىڭ قامقورلىعىنسىز قالعان جەتىمدەر»، «مۇگەدەكتەر، بالا كۇنىنەن مۇگەدەكتەر، مۇگەدەك بالالار») جاتاقحانادا تۇرۋ ءۇشىن 29 اەك (100 050 تەڭگە) كولەمىندە وتەماقى قاراستىرىلعان.
وتكەن جىلى مۇنداي قۇقىقتى 3،9 مىڭ جوو ستۋدەنتى پايدالاندى. اعىمداعى جىلى بۇل ماقساتتارعا شامامەن 400 ملن تەڭگە باعىتتالادى.
مەديسينالىق قولداۋ
مەديسينالىق كومەك كورسەتۋ جانە دارى-دارمەكپەن قامتاماسىز ەتۋگە ارنالعان شىعىندار 2،8 ترلن تەڭگەدەن اسىپ ءتۇستى، ونىڭ 1،6 ترلن تەڭگەسى كەپىلدەندىرىلگەن كومەككە ءبولىندى. وتكەن جىلى ەمحانالارعا 100 ملن-نان استام جۇگىنۋ، ال ستاسيونارلاردا 2،7 ملن-نان استام ادام ەم الدى.
مەملەكەت جىل سايىن 20 ملن-نان استام تۇرعىنعا كەپىلدەندىرىلگەن بازالىق مەديسينالىق كومەك، 2،5 ملن ادامعا تەگىن دارى-دارمەك جانە ءاربىر قازاقستاندىققا 552 ملرد تەڭگە كولەمىندە جان باسىنا شاققانداعى نورماتيۆ بويىنشا العاشقى جانە امبۋلاتوريالىق مەديسينالىق كومەك كورسەتۋدى قامتاماسىز ەتۋگە قاراجات بولەدى.
باسپانا ماسەلەسىندە قولداۋ
وتكەن جىلى 18،96 ملن شارشى مەتر تۇرعىن ءۇي نەمەسە 172 مىڭنان استام تۇرعىن ءۇي سالىندى. بۇل ەل تاۋەلسىزدىگى جىلدارىنداعى تۇرعىن ءۇي قۇرىلىسىنىڭ رەكوردتىق كورسەتكىشى.
وتكەن جىلى الەۋمەتتىك وسال ساناتتاعى ازاماتتارعا ارنالعان 20 مىڭنان استام پاتەر ساتىپ الىندى، 13 مىڭ ازامات ءوز باسپاناسىنا يە بولدى، ال 10،4 مىڭ ازاماتقا جالعا الۋ تولەمىنىڭ ءبىر بولىگىن سۋبسيديالاۋ ءۇشىن تۇرعىن ءۇي تولەمدەرى تاعايىندالدى.
«ناۋرىز» جانە «وتاۋ» مەملەكەتتىك باعدارلامالارى اياسىندا 10 مىڭعا جۋىق ادام تۇرعىن ءۇي جاعدايىن جاقسارتتى.
جالپى 64 مىڭ وتباسىنى قولداۋعا 1 ترلن تەڭگە ءبولىندى.
