پرەزيدەنت قاسىم-جومارت توقايەۆ ءماجىلىس ءتوراعاسى ەرلان قوشانوۆتى قابىلدادى. مەملەكەت باسشىسىنا ءماجىلىستىڭ زاڭ شىعارۋ قىزمەتى تۋرالى ەگجەي-تەگجەيلى باياندالدى، دەپ حابارلايدى اقوردا باسپا ءسوز قىزمەتى.
ەرلان قوشانوۆتىڭ ايتۋىنشا، سەسسيا باستالعالى بەرى 35 زاڭ قابىلدانىپ، سەناتقا جولدانعان. «ۇلتتىق قور – بالالارعا» باعدارلاماسىنىڭ جۇزەگە اسىرىلۋىن، سونداي-اق جەر قويناۋىن پايدالانۋ، بيزنەس جۇرگىزۋ، تالىمگەرلىك پەن بالالاردىڭ قاۋىپسىزدىگى، دەنساۋلىققا زيان كەلتىرەتىن جۇمىس ورىندارىندا ەڭبەك ەتەتىن ازاماتتاردى ارنايى تولەماقىمەن قامتاماسىز ەتۋ ماسەلەلەرىن رەتتەيتىن قۇجاتتار قابىلدانعان. قازىرگى ۋاقىتتا دەپۋتاتتاردىڭ قاراۋىندا 69 زاڭ جوباسى جاتىر. ونىڭ ۇشتەن ءبىر بولىگىنە ءماجىلىس دەپۋتاتتارى وزدەرى باستاماشى بولعان. پرەزيدەنتتىڭ تاپسىرماسىمەن بيۋدجەت كودەكسى، حالىقتىڭ تىم كوپ نەسيە الۋىن تومەندەتۋ، تۇرعىن ءۇي ساياساتى، مەملەكەتتىك ساتىپ الۋ، عىلىم جانە تەحنولوگيالىق ساياسات، تۇتىنۋشىلاردىڭ قۇقىقتارىن قورعاۋ، جىلۋ ەنەرگەتيكاسى، ماسس-مەديا، ادام ساۋداسىنا قارسى ءىس-قيمىل جانە باسقا دا زاڭ جوبالارى بويىنشا جۇمىستار جۇرگىزىلۋدە.
وتە ماڭىزدى زاڭ جوبالارى قوعامدىق پالاتانىڭ وتىرىستارىندا تالقىلانادى.
مەملەكەت باسشىسىنا ءماجىلىس دەپۋتاتتارى حالىقتىڭ قارجىلىق ساۋاتىن ارتتىرۋ ءۇشىن پارلامەنتتىك تىڭداۋ، مەديسينالىق ساقتاندىرۋ جۇيەسىن دامىتۋ، ەسىرتكى قىلمىسىنا قارسى ءىس-قيمىل جانە ساۋدا ساياساتىن جەتىلدىرۋ ماقساتىندا ۇكىمەت ساعاتتارىن وتكىزگەنى جونىندە مالىمەت بەرىلدى.
سونىمەن قاتار ءماجىلىس سپيكەرى پارتيالىق فراكسيالار مەن ءبىر مانداتتى دەپۋتاتتار بەلسەندىلىگىنىڭ ارتۋى پارلامەنتتەگى پىكىرتالاس دەڭگەيىن كوتەرگەنىن اتاپ ءوتتى. دەپۋتاتتار جىلدىڭ العاشقى كۇنىنەن باستاپ سايلاۋشىلارمەن كەزدەسۋ جانە حالىقتىڭ تۇرمىسىن جاقسارتۋ جونىندەگى پرەزيدەنت تاپسىرمالارىنىڭ ورىندالۋىنا باقىلاۋ جۇرگىزۋ ءۇشىن وڭىرلەرگە اتتاندى.
بۇدان بولەك، قاسىم-جومارت توقايەۆقا پالاتا دەپۋتاتتارىنىڭ پارلامەنتتىك ديپلوماتيا اياسىنداعى قىزمەتى دە تانىستىرىلدى.
كەزدەسۋ سوڭىندا مەملەكەت باسشىسى ءماجىلىستىڭ 2023 جىلى اتقارعان جۇمىستارىنا وڭ باعا بەردى. پرەزيدەنتتىڭ ايتۋىنشا، قابىلدانعان زاڭدار حالىقتىڭ تۇرمىس ساپاسىن ارتتىرۋعا تىكەلەي ىقپال ەتەدى. سونىمەن قاتار قاسىم-جومارت توقايەۆ ەلىمىزدىڭ الەۋمەتتىك-ەكونوميكالىق جاڭعىرۋ باعدارىنا قاتىستى نەگىزگى شارالاردى جۇزەگە اسىرۋدى كوزدەيتىن زاڭداردى قابىلداۋ قاجەت ەكەنىنە نازار اۋداردى.
