28 ماۋسىم – بۇقارالىق اقپارات قۇرالدارىنىڭ قىزمەتكەرلەرى كۇنىنە وراي اقوردادا سالتاناتتى جيىن ءوتتى. وعان رەسپۋبليكالىق اقپارات قۇرالدارى عانا ەمەس، وڭىرلەردەگى جەتەكشى تەلەارنالاردىڭ، گازەت-جۋرنالداردىڭ، اقپاراتتىق رەسۋرستاردىڭ وكىلدەرى قاتىستى. بۇل تۋرالى اقوردا حابارلادى.
قاسىم-جومارت توقايەۆ ب ا ق وكىلدەرىن كاسىبي مەرەكەسىمەن قۇتتىقتاپ، جۋرناليستيكانىڭ مارتەبەلى ماماندىق ەكەنىن اتاپ ءوتتى.
– مەملەكەت تە، جۋرناليست تە ۇلت ءۇشىن قىزمەت ەتەدى، ەل تاعدىرىن شەشۋگە اتسالىسادى. ويتكەنى ۇلت ءباسپاسوزى مەن ۇلت مۇددەسى قاي كەزدە دە وزەكتەس بولعان. ءقازىر دە سولاي. ءبىزدىڭ ماقسات-مۇراتىمىز – ورتاق. بۇل – بارشاعا تەڭ مۇمكىندىكتەر بەرەتىن ادىلەتتى قازاقستاندى قۇرۋ. مەن بۇگىن مەديا سالاسى ماماندارىنىڭ وسى جولداعى قاجىرلى ەڭبەكتەرى ءۇشىن شىنايى ريزاشىلىعىمدى بىلدىرەمىن، – دەدى مەملەكەت باسشىسى.
پرەزيدەنت ەلىمىزدە جۇرگىزىلىپ جاتقان قوعامدىق-ساياسي، ەكونوميكالىق رەفورمالارعا ارنايى توقتالىپ، وسىنداي تىڭ باستامالاردى جۇرتشىلىققا جان-جاقتى تۇسىندىرۋگە جۋرناليستەر قاۋىمى زور ۇلەس قوسىپ كەلە جاتقانىنا نازار اۋداردى.
قاسىم-جومارت توقايەۆ ۇلتتىق قۇرىلتايدىڭ اتىراۋدا وتكەن ءۇشىنشى وتىرىسىندا ناشاقورلىق، قۇمارپازدىق، تۇرمىستىق زورلىق-زومبىلىق، ۆانداليزم جانە ىسىراپشىلدىق سەكىلدى بەس الەۋمەتتىك كەسەل تۋرالى ماسەلە كوتەرگەنىن ەسكە سالىپ، مەملەكەت تاراپىنان جۇرگىزىلىپ جاتقان زاڭنامالىق جانە يدەولوگيالىق جۇمىستار جونىندە ايتتى.
پرەزيدەنتتىڭ پىكىرىنشە، ەلىمىزدى تۇبەگەيلى جاڭعىرتۋ ءۇشىن زاڭنامالىق وزگەرىستەرمەن، كادرلىق شەشىمدەرمەن، ساياسي جانە ەكونوميكالىق رەفورمالارمەن عانا شەكتەلۋ ازدىق ەتەدى. پروگرەسسيۆتى ۇلت رەتىندە قوعامدىق جانە جەكە قۇندىلىقتار جۇيەسىن جاڭارتۋ ءۇشىن كوپ تەر توگۋىمىز كەرەك.
.jpg)
بۇدان بولەك، قاسىم-جومارت توقايەۆ «تازا قازاقستان» اكسياسى مەن قوعامدا ەكولوگيالىق سانا قالىپتاستىرۋدىڭ ءمان-ماڭىزى تۋرالى ايتتى. سونىمەن قاتار ۇلتتىق قۇندىلىقتاردى ۇلىقتايتىن باستامالاردى بارىنشا دارىپتەۋ، ەكونوميكانى ءارتاراپتاندىرۋ، ەلىمىزدىڭ ينۆەستيسيالىق تارتىمدىلىعىن ارتتىرۋ باعىتىندا اتقارىلىپ جاتقان جۇمىستار جايىندا كەڭىنەن مالىمەت بەردى. بۇدان بولەك، قازاقستاننىڭ سىرتقى ساياساتتاعى ۇستانىمى، اتوم ەلەكتر ستانسياسىن سالۋ ماسەلەلەرى جونىندە پىكىر ءبىلدىرىپ، جۋرناليستەردى وسى ماڭىزدى ىستەردى جۇرتشىلىق اراسىندا كەڭىنەن ناسيحاتتاۋعا شاقىردى.
پرەزيدەنت ەلىمىزدە جۇرگىزىلگەن جۇيەلى رەفورمالاردىڭ ناتيجەسىندە ازاماتتاردىڭ ساياسي مادەنيەتىنىڭ دەڭگەيى ەداۋىر وسكەنىن، شىنايى ءارى اياسى كەڭ پىكىر الۋاندىعى پايدا بولعانىن اتاپ ءوتتى.
– كوپشىلىك مۇنى ءالى كۇنگە سەزىنبەي ءجۇر. الايدا قازاقستاندا الدەقاشان جاڭا ساياسي جاعداي قالىپتاستى. ونى ءسوز بوستاندىعىنان، اشىق باسەكەلەستىكتەن، بيلىك پەن قوعام اراسىنداعى كونسترۋكتيۆتى ديالوگتان، بۇكىل اقپاراتتىق رەسۋرستاردىڭ قول جەتىمدىلىگىنەن بايقاۋعا بولادى. ءبىز وسىنداي وزگەرىستەر جۇزەگە اسىرىلدى دەپ سەنىممەن ايتا الامىز. مۇنداي جاعدايدا باق-تىڭ ءرولى مەن جاۋاپكەرشىلىگى ارتا تۇسەدى. وتاندىق ماسس-مەديا ءاردايىم وبەكتيۆتىلىكتى، بەيتاراپتىلىقتى ساقتاپ، ەل مەن قوعامنىڭ مۇددەسىن بارىنەن جوعارى قوياتىنىنا سەنىمدىمىن، – دەدى قاسىم-جومارت توقايەۆ.
بۇل رەتتە پرەزيدەنت ادىلەتتى قازاقستان قۇرۋ بوس يدەولوگيالىق ابستراكسيا ەمەس، شىنايى جالپىۇلتتىق تاڭداۋ ەكەنىن مالىمدەدى.
– مەملەكەتتىڭ قۋاتى – حالىقتا، ال حالىقتىڭ قۋاتى جاسامپاز كۇش-جىگەردە جانە وتانشىلدىقتا. سوندىقتان ەلىمىزدەگى بارلىق اۋقىمدى وزگەرىستەر ادامعا، ونىڭ قارىم-قابىلەتىن تولىق اشۋعا باعىتتالعان. ءبىز ءۇشىن رەفورمالاردىڭ ءوزى عانا ەمەس، تۇپكى ءمانى ماڭىزدى. ءبىزدىڭ رەفورمالارىمىز قىزىل سوزگە ەمەس، ناقتى ىسكە نەگىزدەلگەن. باستى ماقسات – ازاماتتارىمىزدىڭ بولاشاققا دەگەن سەنىمىن نىعايتىپ، ءال-اۋقاتىن ارتتىرۋ. بۇقارالىق اقپارات قۇرالدارىنىڭ قوعامدا زاڭ مەن ءتارتىپتى ورنىقتىرۋ ۇدەرىسىندە اتقاراتىن ءرولى ايرىقشا. بۇل – ەلىمىزدە جۇرگىزىلىپ جاتقان جاڭعىرۋلارعا نەگىز بولاتىن قاعيداتتاردىڭ ءبىرى، – دەدى قاسىم-جومارت توقايەۆ.
.jpg)
مەملەكەت باسشىسى جيىرماسىنشى عاسىردىڭ باسىنداعى قازاق زيالىلارى باسپاسوزگە تۇگەل اتسالىسقانىن، بۇل سالاعا اعارتۋشىلىق سيپات بەرگەنىن اتاپ ءوتىپ، اعا بۋىننىڭ وسى سارا جولىن لايىقتى جالعاستىرۋ قاجەت ەكەنىنە توقتالدى.
جيىندا ءبىرقاتار جۋرناليسكە قازاقستان رەسپۋبليكاسى پرەزيدەنتىنىڭ ب ا ق سالاسىنداعى سىيلىقتارى، گرانتتارى جانە العىسى سالتاناتتى تۇردە تابىستالدى.
سونىمەن قاتار قاسىم-جومارت توقايەۆ وتاندىق جۋرناليستيكانىڭ دامۋىنا ەلەۋلى ۇلەس قوسقان ءبىر توپ ازاماتتى مەملەكەتتىك ناگرادالارمەن ماراپاتتادى.
پرەزيدەنت ءسوزىنىڭ سوڭىندا بىلتىردان بەرى مەرەكە قارساڭىندا جۋرناليستەرگە پاتەر كىلتىن تابىستاۋ داستۇرگە اينالعانىن، بۇل ءۇردىس بيىل دا، الداعى ۋاقىتتا دا جالعاسا بەرەتىنىن جەتكىزدى.
مەملەكەت باسشىسىنىڭ ب ا ق وكىلدەرىن ماراپاتتاۋ راسىمىندە سويلەگەن ءسوزىنىڭ تولىق ماتىنىمەن مىنا سىلتەمە ارقىلى تانىسۋعا بولادى.
