حالىققا قىزمەت كورسەتۋ ورتالىقتارىندا مەكەنجايعا تىركەۋ كەزەگى ەكى جارىم ەسە ازايعان. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراسياسى» كە اق استانا قالاسى بويىنشا فيليالى وكىلدەرى حابارلادى.
ق ر ءىىم مەن «ازاماتتارعا ارنالعان ۇكىمەتتىڭ» نۇر-سۇلتان، الماتى جانە شىمكەنت قالالارىنداعى حقو-دا ازاماتتاردىڭ تۇرعىلىقتى جەرى بويىنشا تىركەۋىن جۇرگىزۋ ءۇشىن بىرلەسىپ جۇزەگە اسىرىپ جاتقان پيلوتتىق جوباسى ءوز جەمىسىن بەرە باستادى. مەگاپوليستەردەگى مەكەنجاي بويىنشا تىركەۋدى ميگراسيا قىزمەتكەرلەرىمەن قاتار حالىققا قىزمەت كورسەتۋ ورتالىعىنىڭ ماماندارى شىلدەدەن بەرى بىرلەسىپ جۇرگىزىپ كەلەدى.
باسپا ءسوز حابارلاماسىنا ساي، پيلوتتىق جوبا شەڭبەرىندە ەڭ الدىمەن ەلوردانىڭ الماتى اۋدانىندا ورنالاسقان ەڭ ءىرى حالىققا قىزمەت كورسەتۋ ورتالىعىنىڭ ماماندارى قىزمەت الۋشىلارعا مەكەنجاي بويىنشا تىركەۋگە تۇرۋ جانە تىركەۋدەن شىعۋ مەملەكەتتىك قىزمەتتەرىن كورسەتە باستادى. اتالعان قىزمەت بويىنشا حقو-داعى كەزەك كۇتۋشىلەر سانى 2،5 ەسە ازايعان.
ايتا كەتەيىك، حالىققا قىزمەت كورسەتۋ ورتالىقتارىندا «قۇجاتتاۋ» قىزمەتتەرىن ميگراسيالىق پوليسيانىڭ ادەتتە 1-3 مامانى كورسەتەدى. قىزمەتكەرلەردىڭ ازدىعى جەكە باستى كۋالاندىرۋ، تۇرعىلىقتى جەر بويىنشا تىركەۋگە تۇرۋ قىزمەتتەرىن الۋشىلاردىڭ كوپ جاعدايدا كەزەكتە ۇزاق تۇرۋىنا الىپ كەلىپ، نارازىلىقتارىن تۋدىراتىن. ەندى ولارعا حقو-نىڭ تاعى 2-3 وپەراتورى جۇكتەمەنى ازايتۋعا كومەكتەسەدى.
سونىمەن قاتار «ازاماتتارعا ارنالعان ۇكىمەت» مەملەكەتتىك كورپوراسياسى» كە اق استانا قالاسى بويىنشا فيليالى تاراتقان حابارلامادا «بولاشاقتا بۇل جوبا ەلىمىزدىڭ وزگە وبلىس ورتالىقتارىنداعى حالىققا قىزمەت كورسەتۋ ورتالىقتارىن دا قامتيدى دەپ جوسپارلانعان. ەسكەرە كەتەيىك، مەكەنجاي تىركەۋىنە تۇرعىلىقتى تۇرۋ قىزمەتىن ونلاين تۇردە egov.kz پورتالى ارقىلى راسىمدەۋگە بولادى» دەپ جازىلعان.
