«الەۋمەتتىك مەديسينالىق ساقتاندىرۋ قورى» كەاق جانە ونىڭ وڭىرلىك فيليالدارىنىڭ 2022-2023 جىلدارداعى تيىمدىلىگىنە جۇرگىزىلگەن مەملەكەتتىك اۋديت قورىتىندىلارى ءاليحان سمايىلوۆتىڭ توراعالىعىمەن وتكەن ق ر جوعارى اۋديتورلىق پالاتاسىنىڭ وتىرىسىندا قارالدى. بۇل تۋرالى Ulys پالاتاعا سىلتەمە جاساپ حابارلايدى.
وسى سالاعا جۇرگىزىلگەن ەكىنشى اۋديت 3،8 ترلن تەڭگە بولاتىن قاراجات پەن اكتيۆتەردى قامتىدى. تەكسەرۋ شارالارى 13 ۇيىمعا قاتىستى جۇرگىزىلدى.
فوتو: ق ر جوعارى اۋديتورلىق پالاتاسى
بۇگىنگى تاڭدا مىندەتتى الەۋمەتتىك مەديسينالىق ساقتاندىرۋ جۇيەسىنە (ءمامس) 16،2 ملن ادام كىرەدى. بۇل رەتتە 12 ملن ادام جارنالارىن مەملەكەت تولەيتىن جەڭىلدىكتى ساناتتارعا جاتادى. وعان قوسا 2 ملن جۋىق مەملەكەتتىك قىزمەتشى، بيۋدجەتتىك ۇيىمدار مەن كۆازيمەملەكەتتىك سەكتور قىزمەتكەرلەرى بار. ناتيجەسىندە جەكە شىعىستاردى (اقىلى مەديسينانى) ەسەپتەمەگەندە مەملەكەتكە تۇسەتىن قارجىلىق جۇكتەمە كەم دەگەندە 76%-دى قۇرايدى. وسىعان بايلانىستى ءاۋديتتىڭ نەگىزگى قورىتىندىلارىنىڭ ءبىرى – ءمامس ەنگىزىلگەنىنە قاراماستان، ازاماتتاردىڭ ورتاق جاۋاپكەرشىلىگى ەسەبىنەن مەملەكەتكە تۇسەتىن جۇكتەمە ءالى دە ايتارلىقتاي تومەندەگەن جوق.
ۇلتتىق قور قاراجاتىنىڭ سوزىلمالى يگەرىلمەۋى ورىن الىپ وتىر. اۋديت جۇرگىزىلەتىن كەزەڭدە كەپىلدەندىرىلگەن جانە نىسانالى ترانسفەرتتەر شەڭبەرىندە 50 ملرد تەڭگەدەن استام قارجى بولىنگەن. الايدا 13 ملرد تەڭگە نەمەسە 26%-ى يگەرىلمەگەن.
قور مەديسينالىق قىزمەتتەردىڭ ساپاسىن باقىلاۋعا ءتيىستى نازار اۋدارمايدى. ماسەلەن، استانا بويىنشا ءمامس شەڭبەرىندە ەكى ءىرى قىزمەت كورسەتۋشىگە باقىلاۋ تەكسەرىسى جۇرگىزىلدى، ولارعا جيىنتىعىندا 179 مىڭ ادام بەكىتىلگەن. ناتيجەسىندە ولاردىڭ جەكە ورىندارى مەن مەديسينالىق جابدىقتاردىڭ جوقتىعى، ولاردى ساعاتىنا جالعا الاتىنى انىقتالدى. بۇل قىزمەت كورسەتۋشى جشس-لاردىڭ ءبىرقاتار كلينيكاسىندا جەكەلەگەن قىزمەت تۇرلەرىنە ليسەنزيالارى جانە وزدىگىنەن قوزعالا المايتىن ازاماتتاردى قابىلداۋعا ارنالعان پاندۋستارى جوق.
سونىمەن قاتار اۋديت بارىسىندا بىرلەسىپ قىزمەت كورسەتۋشىلەر تاراپىنان ءامسق ەسەبىنەن جانە ازاماتتاردىڭ ءوز ەسەبىنەن مەديسينالىق قىزمەتتەرگە قوسارلانعان اقى تولەۋ فاكتىلەرى انىقتالدى. نەگىزىندە قولدانىستاعى ەرەجەلەر بويىنشا مەديسينالىق مەكەمەلەر تمككك جانە ءمامس جەلىسى بويىنشا قارجىلاندىرىلاتىن مەديسينالىق كومەك تۇرلەرى ءۇشىن اقى الماۋعا مىندەتتەمە الادى. سونىمەن ستاسيونارلىق كومەك بويىنشا كەم دەگەندە 1،7 ملرد تەڭگەگە، امبۋلاتوريالىق كومەك بويىنشا 27،6 ملرد تەڭگەگە قوسارلانعان تولەم فاكتىلەرى انىقتالدى. قور تاراپىنان بۇل باعىتتا مونيتورينگ جۇرگىزىلمەيدى.
ستوماتولوگيالىق كلينيكالاردىڭ قىزمەتتەرىنە ءامسق-دان قوسارلانعان تولەم جاسالۋى جەكە بۇزۋشىلىق رەتىندە انىقتالدى. مەديسينالىق ساقتاندىرۋ تاريفىنە انەستەزيانىڭ قۇنى ەنگىزىلىپ قويعان، ءبىراق ستوماتولوگيالار ول ءۇشىن قوردان جالپى سوماسى 2،1 ملرد تەڭگەگە قوسىمشا اقى العان.
سونىمەن قاتار دەنساۋلىق ساقتاۋ، ىشكى ىستەر جانە ادىلەت مينيسترلىكتەرىنىڭ اقپاراتتىق جۇيەلەرىنىڭ دەرەكتەرىن سالىستىرۋ ناتيجەسىندە شەتەلگە تۇراقتى تۇرۋعا كەتكەن ازاماتتارعا دارى-دارمەكتەردى رەسىمدەۋ فاكتىلەرى انىقتالدى.
وتىرىس بارىسىندا ءاليحان سمايىلوۆ ءامسق بيۋدجەت قاراجاتىنىڭ ماقساتقا ساي پايدالانىلۋىنا ساپالى باقىلاۋدى قامتاماسىز ەتۋگە مىندەتتى ەكەنىن اتاپ ءوتتى.
«مۇنى قولمەن ەمەس، اۆتوماتتاندىرىلعان تۇردە جاساۋ كەرەك. قوردىڭ تاۋەكەلدەردى باسقارۋدىڭ وزىندىك جۇيەسى بولۋى ءتيىس، ونىڭ نەگىزىندە كورسەتىلەتىن قىزمەتتەردىڭ ساپاسىنا، وندىرىستىك بازانىڭ، جابدىقتاردىڭ، ءتيىستى مەديسينالىق ليسەنزيالار مەن رۇقساتتاردىڭ بولۋىنا مونيتورينگ جۇرگىزۋ قاجەت»، — دەدى جوعارى اۋديتورلىق پالاتا ءتوراعاسى.
جالپى اۋديت قورىتىندىسى بويىنشا:
32 ملرد تەڭگەدەن استام راسىمدىك بۇزۋشىلىقتار؛
31،1 ملرد تەڭگەگە قاراجاتتى ءتيىمسىز جوسپارلاۋ جانە پايدالانۋ انىقتالدى.
قارجىلىق شىعىندار مەن جىبەرىپ العان پايدا سوماسى 11،8 ملن تەڭگەنى قۇرادى.
سونداي-اق 65 راسىمدىك بۇزۋشىلىق، 154 وزگە دە بۇزۋشىلىق جانە جۇيەلىك كەمشىلىك انىقتالدى.
مەديسينالىق قىزمەتتەر مەن تىركەۋلەرگە قوسارلانعان اقى تولەۋ فاكتىلەرى بويىنشا ماتەريالدار قۇقىق قورعاۋ ورگاندارىنا بەرىلەدى.