ۇكىمەت ماڭعىستاۋ وبلىسىن دامىتۋعا ەرەكشە كوڭىل ءبولىپ كەلەدى. مەملەكەت باسشىسى قاسىم-جومارت توقايەۆ ماڭعىستاۋدىڭ وڭدەۋ ونەركاسىبىن جانە بيزنەس سالاسىن دامىتۋ قاجەتتىگىنە نازار اۋدارىپ، ۇنەمى ءتيىستى تاپسىرمالار بەرىپ كەلەدى، دەپ حابارلايدى Ulys ءتىلشىسى.
ماڭعىستاۋ وبلىسى اكىمدىگىنىڭ مالىمەتىنە قااعاندا، سوڭعى بەس جىلدا وڭىرگە 3 ترلن تەڭگەدەن استام ينۆەستيسيا تارتىلىپ، ونىڭ ىشىندە بيىل 10 ايدا نەگىزگى كاپيتالعا سالىنعان ينۆەستيسيا كولەمى 839 ملرد تەڭگەنى، ناقتى كولەم يندەكسى – 144،7%-دى قۇرادى. اتالعان كورسەتكىش بويىنشا ماڭعىستاۋ وبلىسى ەلىمىزدە كوش باستاپ تۇر.
جالپى، ماڭعىستاۋ وبلىسىنىڭ ينۆەستيسيالىق الەۋەتى وتە زور وڭىرلەردىڭ ءبىرى. سوندىقتان وسى باعىتتاعى جۇمىستار ودان ءارى جالعاسىپ جاتىر.
وتكەن جىلى جالپى ينۆەستيسيا كولەمى 11 ملرد تەڭگەگە 11 ينۆەستيسيالىق جوبا ىسكە قوسىلدى. ناتيجەسىندە 500-دەن اسا جاڭا جۇمىس ورنى قۇرىلدى. ونىڭ ىشىندە 8 جوبا وڭدەۋ ونەركاسىبىنە تيەسىلى، ولار – ەت كومبيناتى، مەتالل پروكاتىن، ارنايى جابدىقتار مەن تەحنيكا، تەمىربەتون، پوليەتيلەن، انتيفريز ونىمدەرىن ءوندىرۋ ورىندارى.
بۇدان بولەك، جىل سوڭىنا دەيىن جالپى سوماسى 10 ملرد تەڭگەگە جۋىق 4 جوبانى ىسكە اسىرىپ، 100 جاڭا جۇمىس ورنىن قۇرۋ جوسپارلانىپ وتىر.
سونىمەن قاتار وڭىردە 2025 جىلعا دەيىن وڭىردە «نۇرلى جەر» مەملەكەتتىك باعدارلاماسى اياسىندا جالپى اۋدانى 7،3 ملن شارشى مەتر بولاتىن 67 مىڭ تۇرعىن ءۇيدى (پاتەرلەر مەن جەكە ۇيلەر) پايدالانۋعا بەرۋ جوسپارلانعان. ونىڭ ىشىندە حالىقتىڭ الەۋمەتتىك از قورعالعان توپتارى ءۇشىن 2،5 مىڭ جالدامالى پاتەر سالىنادى (151،2 مىڭ شارشى مەتر تۇرعىن ءۇي).
جىلدارعا ءبولىپ قاراعاندا:
2021 جىلى - 1201 مىڭ م2 نەمەسە 11،2 مىڭ تۇرعىن ءۇي؛
2022 جىلى - 1271،9 مىڭ م2 نەمەسە 11،7 مىڭ تۇرعىن ءۇي؛
2023 جىلى - 1448،6 مىڭ م2 نەمەسە 13،3 مىڭ تۇرعىن ءۇي؛
2024 جىلى - 1589،6 مىڭ م2 نەمەسە 14،6 مىڭ تۇرعىن ءۇي؛
2025 جىلى - 1767،6 مىڭ م2 نەمەسە 16،2 مىڭ تۇرعىن ءۇي.
بيىل جاپپاي تۇرعىن ءۇي قۇرىلىسى جۇرەتىن اۋدانداردى قاجەتتى ينجەنەرلىك ينفراقۇرىلىممەن قامتاماسىز ەتۋگە 4،5 ملرد. تەڭگە بولىنەدى. 2025 جىلعا دەيىن شىعىندار - 34،7 ملرد. تەڭگە. بەس جىل ىشىندە جۇرگىزىلەتىن جۇمىستىڭ ناتيجەسىندە 9،5 مىڭ جەر تەلىمىنە كوممۋنيكاسيالار تارتىلادى.
وتكەن جىلدان باستاپ مەملەكەت باسشىسىنىڭ تاپسىرماسىمەن «اۋىل اماناتى» جوباسى ىسكە اسىرىلۋدا. جوبا اياسىندا، اۋىل حالقىنىڭ تابىسىن ارتىرۋ ءۇشىن رەسپۋبليكالىق بيۋدجەتتەن 1،2 ملرد تەڭگە قاراجات ءبولىندى. قازىرگى تاڭدا، جالپى قۇنى 1،2 ملرد تەڭگەنى قۇرايتىن 165 جوبا ماقۇلداندى. ونىڭ ىشىندە:
· مال شارۋاشىلىعى سالاسىندا 111 جوبا؛
· ەگىن شارۋاشىلىعىندا 6 جوبا؛
· وزگە بيزنەس تۇرلەرىنە 48 جوبا ماقۇلداندى.
ماقۇلدانعان جوبالاردىڭ 112-ىنە شاعىن نەسيە بەرىلدى. ناتيجەسىندە بارلىعى 173 جاڭا جۇمىس ورنى اشىلدى، ونىڭ ىشىندە جۇمىسسىز 43 ادام شاعىن نەسيە الۋ ارقىلى جۇمىسپەن قامتىلدى.
سونىمەن قاتار ءوڭىردىڭ تۋريستتىك پوتەنسيالى اسا زور. «ماڭعىستاۋ – اسپان استىنداعى مۇراجاي» دەپ بەكەرگە ايتىلماعان. وسى جەرلەردى كورۋگە الىس-جاقىن شەت ەلدەردەن تۋريستتەر اعىلىپ كەلۋدە.
وبلىستا الەۋمەتتىك سالالارعا دا باسا نازار اۋدارىلىپ كەلەدى. 2023 جىلى ءبىلىم بەرۋ جۇيەسىن قارجىلاندىرۋعا 209 ملرد تەڭگە قاراستىرىلدى، ول وبلىس بيۋدجەتىنىڭ 43%-ى.
3-6 جاستاعى بالالاردى مەكتەپكە دەيىنگى تاربيەمەن جانە وقىتۋمەن قامتۋ – 100%، ال 2 جاستان 6 جاسقا دەيىنگى بالالاردى قامتۋ 88،6%-دى قۇرادى.
وبلىستا بارلىعى 188 جالپى ءبىلىم بەرەتىن مەكتەپ بار، ونىڭ ىشىندە 39-ى جەكە مەنشىك ءبىلىم ورداسى. سوڭعى 3 جىلدا وقۋشىلار سانى 25 مىڭعا ارتتى (2021 – 156 مىڭ، 2022 – 175 مىڭ، 2023 – 182 مىڭ). بيىل 3 972 ورىندىق 11 جەكەمەنشىك مەكتەپ اشىلدى (اقتاۋ – 6، جاڭاوزەن – 2، مۇنايلى – 3).
وسىنداي جوبالار كوپتەپ ىسكە اسۋدا. ول جوبالاردىڭ بارلىعى دەرلىك مۇنايلى ولكەننىڭ بارلىق تىرشىلىگىن قارا التىنعا عانا تىرەپ قويماي، باسقا ەكونوميكالىق مۇمكىندىكتەرىن اشۋعا باعىتتالعان.