بيىل ءبىزدىڭ اسىل اكەمىز، ارداقتى اتامىز، سوعىس جانە ەڭبەك ارداگەرى ورىن يسابەكۇلى 100 جاسقا تولار ەدى. ءومىرى ونەگەگە، ەڭبەگى ەرلىككە تولى اياۋلى جاننىڭ عيبراتتى عۇمىرىن ەسكە الۋ – ءبىزدىڭ پەرزەنتتىك پارىزىمىز.
ورىن يسابەكۇلى 1925 جىلى 6 اقپاندا جامبىل وبلىسى جۋالى اۋدانىنىڭ بەسجىلدىق اۋىلىندا دۇنيەگە كەلدى. 7 كلاستىق ءبىلىم الىپ، جاستايىنان ەڭبەككە ارالاسقان. ەلىنە تونگەن اۋىر كۇندەردە، 1942 جىلى 18 قاڭتاردا نەبارى 17 جاسىندا كەڭەس ارمياسىنىڭ قاتارىنا شاقىرىلىپ، 12 ناۋرىزدا وتانعا ادال قىزمەت ەتۋگە انت بەردى.
سوعىس جىلدارى 55ء-شى اتقىشتار پولكىندە كۋرسانت، كەيىن ءبولىم كومانديرى بولىپ قىزمەت اتقاردى. 1944 جىلدىڭ كوكتەمىنەن باستاپ 820 جانە 380ء-شى اتقىشتار پولكتەرىندە اعا كوماندير رەتىندە جاۋىنگەرلىك تاپسىرمالاردى ءمىنسىز ورىندادى.
1945 جىلدىڭ مامىرىنان 1946 جىلدىڭ قاراشاسىنا دەيىن اسكەري كومانديرلىك قىزمەت اتقارىپ، ۇلى وتان سوعىسىنىڭ سوڭىنا دەيىن جاۋىنگەرلىك ساپتا بولدى.
بەرلينگە دەيىن جەتىپ، براندەنبۋرگ قاقپاسىنىڭ تۇبىندە اۋىر جارالانىپ، گوسپيتالدا ەمدەلىپ، اقىرى ەلگە 1946 جىلى قاراشا ايىندا امان-ەسەن ورالدى. مايدانداعى ەرلىگى ءۇشىن «جاۋىنگەرلىك ەرلىگى ءۇشىن»، «ەرلىگى ءۇشىن»، «بەرليندى العانى ءۇشىن»، «گەرمانيانى جەڭگەنى ءۇشىن» مەدالدارىمەن جانە ءىى دارەجەلى «ۇلى وتان سوعىسى» وردەنىمەن ماراپاتتالدى.
1947 جىلى ومىرلىك سەرىگى، انامىز سەيتراحمان قىزى تۇرعىنمەن وتباسىن قۇرىپ، ءبىر شاڭىراقتىڭ ۇيىتقىسى اتاندى. 1950 جىلى سەمەي قالاسىنداعى اۋىلشارۋاشىلىق تەحنيكۋمىنا وقۋعا ءتۇسىپ، 1953 جىلى اگرونوم ماماندىعى بويىنشا ديپلوممەن ورالدى.
سوعىستان سوڭ ەل يگىلىگى ءۇشىن ەڭبەككە ارالاسىپ، 1953–1954 جىلدارى بەساعاش اۋىلىندا كولحوز ءتوراعاسى بولدى. كەيىن جامبىل اتىنداعى «جەمىس-جءۇزىم» سوۆحوزىندا اگرونوم، بريگادير، باس قويماشى سەكىلدى سان ءتۇرلى قىزمەتتەر اتقارىپ، زەينەتكە شىققانعا دەيىن تىنىمسىز ەڭبەك ەتتى. كەڭ ويلى، تەرەڭ ءبىلىمدى، كوكىرەگى وياۋ ازامات رەتىندە اۋىل-ايماعىنا سىيلى، ءقادىرلى بولدى. 1952 جىلدان باستاپ كوممۋنيستىك پارتيا مۇشەسى بولدى.
اكەمىزدىڭ ەسىمى تاراز قالاسىنداعى «جەڭىس» ساياباعىنداعى سوعىس ارداگەرلەرىنە ارنالعان مەموريالدىق تاقتادا جانە ماسكەۋدەگى ۇلى وتان سوعىسى ارداگەرلەرىنىڭ مۇراجايىندا التىن ارىپپەن جازۋلى.
وكىنىشكە قاراي، مايدانداعى اۋىر جاراقاتتىڭ سالدارى دەنساۋلىعىنا اسەر ەتىپ، 46 جاسىندا ينسۋلت الىپ، سودان باستاپ سىرقاتقا بوي الدىردى. الايدا، ومىرگە دەگەن قۇشتارلىعى مەن رۋحىنىڭ مىقتىلىعى ارقاسىندا ۇزاق جىلدار بويى كۇرەسىپ، 1986 جىلدىڭ 17 مامىرىندا 61 جاسىندا دۇنيەدەن ءوتتى. جان-تانىمەن ەلىن سۇيگەن ەردىڭ جارقىن بەينەسى جۇرەگىمىزدە ماڭگى ساقتالادى.
اكەمىز – ءبىز ءۇشىن اسقار تاۋ، جۇرەگى دارحان، ءسوزى مەن ءىسى ءبىر، ادامگەرشىلىگى بيىك تۇلعا ەدى. اينالاسىنا تەك جاقسىلىق دارىتقان، ۇلكەنگە ءىنى، كىشىگە اعا بولا بىلگەن جان بولاتىن. وتباسى ءۇشىن عانا ەمەس، بۇكىل اۋىل ءۇشىن «پاپا» بولعان جان. دوستارى ءار ۇلتتان، ورىس جانە نەمىس تىلدەرىن جەتىك مەڭگەرگەن كوزى اشىق، كوكىرەگى وياۋ ازامات بولاتىن. ەل-جۇرتىنا دەگەن جاناشىرلىعى ەرەكشە ەدى.
اسىل اكەمىز بەن اياۋلى انامىزدان 7 قىز، 1 ۇل تارادى. بۇگىندە ۇرپاقتارى – نەمەرەلەرى، شوبەرەلەرى، شوپشەكتەرى بۇكىل قازاقستانعا تاراپ، ءار سالادا ەڭبەك ەتىپ، وقىپ، وسىپ-وركەندەۋدە. ءبىر اۋلەتتىڭ عانا ەمەس، ءبىر قاۋىم ەلدىڭ تىرەگىندەي بولا بىلگەن اسىل ادامنىڭ عيبراتتى عۇمىرى ۇرپاققا ۇلگى.
ءاردايىم:
«ءارقاشاندا بيىك كورەتىن،
مەن باسقادان،
مەنىڭ اكەم، مەنىڭ اكەم
ەڭ جاقسى ادام...»
-دەگەن ولەڭ جولدارى ءبىزدىڭ اكەمىزدىڭ بەينەسىن ءدوپ باسىپ تۇرعانداي. ول – ءبىز ءۇشىن ماڭگىلىك اسقار تاۋ، جارىق جۇلدىز، ءومىرىمىزدىڭ تەمىرقازىعى بولىپ قالا بەرەدى.
بيىل اكەمىز 100 جاسقا تولار ەدى.
ءومىرى ونەگە، ءسوزى وسيەت، بەينەسى ماڭگى جادىمىزدا قالاتىن ارداقتى اكەمىزگە باس يەمىز.
ءسىز ءبىزدىڭ جۇرەگىمىزدە ماڭگى ءتىرىسىز.
يسابەكوۆتار اۋلەتى
