13 ناۋرىزدا بۇكىل وتباسىعا ارنالعان، كوپشىلىك كوپتەن كۇتكەن كومەديا – «مالاي» ءفيلمىنىڭ پرەمەراسى وتەدى. بۇل كارتينا «حولوپ» كاسسالىق فرانشيزاسىنىڭ رەسمي اداپتاسياسى. بۇعان دەيىن بۇل فيلم تۇركيا، موڭعوليا جانە فرانسيادا شىققان بولاتىن. وتاندىق نۇسقا قازاق تىلىندە ءتۇسىرىلىپ، جەرگىلىكتى مەنتاليتەت پەن ءازىل ەرەكشەلىكتەرى ەسكەرىلدى.
باستى كەيىپكەر – بايدىڭ مۇراگەرى چينا (جەڭىس وماروۆ). جاس جىگىت بايلىققا بەلشەسىنەن باتىپ، ىشكەنى الدىندا، ىشپەگەنى ارتىندا، وزىنە ءبارى رۇقسات دەپ ويلايدى. الايدا، ونىڭ اكەسى-وليگارح (جانداربەك سادىربايەۆ) ۇلىن ساباسىنا ءتۇسىرۋدى ويلاپ، ەرەكشە قادامعا بارادى. ەلدەن ەرەكشە پسيحولوگپەن (دۋلىعا اقمولدا) بىرىگىپ، ولار XIX عاسىرداعى قازاق اۋىلىنىڭ ءومىرىن قايتا جاڭعىرتادى جانە چينانى سول ورتاعا جىبەرەدى. فيلمدە “بايدىڭ بالاسى ادام بولا ما؟” – سۇراعىنا جاۋاپ ىزدەلەدى.
“الەمدىك كينودا ءساتتى تۋىندىلاردى نەگىزگە الىپ، ولاردىڭ اداپتاسياسىن ۇسىنۋ – كەڭ تارالعان ءارى تانىمال ءادىس. ءبىز دە وسى باعىتتى قولدانىپ، وزىمىزگە ۇلكەن تالاپ قويدىق. قازاقستان قوعامىندا ماجورلاردىڭ تاقىرىبى وتە وزەكتى، سول سەبەپتى “حولوپ” فرانشيزاسى بىزگە سايكەس كەلدى. بىزگە قازاق مەنتاليتەتىن، قۇندىلىقتارى مەن ءازىلىن ەسكەرە وتىرىپ، بەيىمدەۋ وتە ماڭىزدى بولدى. سونىمەن قاتار، “مالاي” – تولىقتاي قازاق تىلىندە تۇسىرىلگەن فيلم”، – دەپ اتاپ ءوتتى Unico كومپانياسىنىڭ باس پروديۋسەرى انارا جۋنۋسوۆا.
جەڭىس وماروۆ (Zheka Fatbelly) ءۇشىن دە بۇل جوبا ۇلكەن سىناق بولدى، سەبەبى بۇل ونىڭ ويناعان ءبىرىنشى باستى ءرولى. رەجيسسەر مەن ءتۇسىرىلىم الاڭىنداعى ارىپتەستەرىنىڭ ايتۋىنشا، بلوگەر ءوز ءرولىن تاماشا ورىنداپ، كادردا وتە ءساتتى وينادى، ءبىراق بۇل ءرول وعان وڭايعا تيگەن جوق.
“مەنىڭ كەيىپكەرىم نەشە ءتۇرلى قيىندىقتى باستان وتكەردى. فيزيكالىق جاعىنان وتە اۋىر بولدى، ءبىراق قىزىقتى ساتتەر دە از ەمەس ەدى. اسىرەسە، اتپەن ءجۇرۋ جانە شابۋ كەزدەرى قيىنعا سوقتى. ءقازىر سول ءتۇسىرىلىم كۇندەرىن ساعىنىشپەن ەسكە الامىن، دەمەك، ءبارى جاقسى ءوتتى”، – دەدى جەڭىس وماروۆ (چينا).
اۆتورلاردىڭ ايتۋىنشا، “مالاي” – وتباسىمەن بىرگە كورۋگە ارنالعان قىزىق ءارى كوڭىلدى فيلم.
“قازاقستاندا بالالار مەن ەرەسەكتەرگە بىردەي قىزىقتى بولاتىن فيلمدەر كوپ ەمەس. سوندىقتان “مالاي” جوباسىندا جۇمىس ىستەۋ ماعان قىزىق بولدى. چينانىڭ وقيعاسى مەن ونىڭ وتكەن عاسىر اۋىلىنداعى قىزىقتارى كىشكەنتاي كورەرمەندەردى كۇلدىرسە، ۇلكەندەر ءۇشىن ماجوردى تاربيەلەۋ تاقىرىبى وي سالۋى مۇمكىن”، – دەدى فيلم رەجيسسەرى ەرنار نۇرعالييەۆ.
فيلمگە دۋلىعا اقمولدا، لاۋرا مىرزاحمەت، جانداربەك سادىربايەۆ، ەرمەك شىنبولاتوۆ، ايدا قۇرمانعالييەۆا (مونا)، سابينا موۆلايەۆا، حاميت ەردەحان سىندى تانىمال تۇلعالار قاتىسقان. ايتا كەتسەك، ولاردىڭ كوپشىلىگى كورەرمەنگە بۇرىن-سوڭدى بولماعان ەرەكشە بەينەدە ۇسىنىلادى.
كورەرمەندەردىڭ پىكىرىنە قۇلاق تۇرسەك، بۇل فيلم ناۋرىزدىڭ باستى كومەدياسىنا اينالماق. تۇساۋكەسەر كۇنى 13 ناۋرىزعا بەلگىلەنىپ وتىر. بارلىق جاڭالىقتاردى @malay_film پاراقشاسىنان بىلە الاسىزدار.
