ءماجىلىس دەپۋتاتى، زاڭگەر ابزال قۇسپان الەۋمەتتىك جەلىدەگى جەكە پاراقشاسىندا وقىرماندارىنان كەلگەن حاتتاردى جاريالاپ جاتىر، دەپ حابارلايدى Ulys.
ابزال قۇسپان ەل ازاماتتارىنان زاڭ بۇزۋ فاكتىلەرى تۋرالى، اسىرەسە، بۇرىنعى شەنەۋنىكتەرگە قاتىستى كوپ ءارىز-وتىنىش تۇسەتىنىن ايتتى. زاڭگەر ەكس-اكىم دانيال احمەتوۆكە قاتىستى تۇسكەن اقپاراتتى جاريالادى.
«دەپۋتات رەتىندە باتىس قازاقستان وبلىسىنان سايلانسامدا، زاڭناما جانە سوت-قۇقىقتىق رەفورماسى كوميتەتىنىڭ مۇشەسى رەتىندە ماعان رەسپۋبليكانىڭ بارلىق وڭىرىنەن دەرلىك زاڭ، ءتارتىپ ساقتالۋى ماسەلەسىندە ارىز-شاعىمدار ءجيى تۇسەدى. سولاردى تەكسەرۋ ناتيجەسىندە، قۇقىق قورعاۋ ورگاندارى ارقىلى ءبىر ەمەس، بىرنەشە قىلمىستىق ءىستى تىركەتۋگە (قوزعاتۋعا) مۇرىندىق بولدىم. سونىڭ ىشىندە دانيال احمەتوۆكە قاتىستى ارىزدار لەگى توقتار ەمەس»، - دەپ جازدى دەپۋتات.
ءدال وسى احمەتوۆكە قاتىستى كەلەتىن ارىزداردىڭ ىشىنەن ابزال قۇسپان ءبىر مىسالدى جاريا ەتىپ، كۇدىكتى جايتتاردىڭ باسىن اشتى.
«دانيال احمەتوۆ اكىم بوپ تۇرعان كەزدە وسكەمەن جانە سەمەي قالاسى كوشەلەرىن جارىقتاندىرۋ ءۇشىن ەبرر (ەۆروپا قايتا قۇرۋ جانە دامۋ بانكى) ارقىلى 3، 6 ملرد، وعان قوسىمشا بيۋدجەت تاراپىنان 1، 2 ملرد، بارلىعى 4، 8 ملرد بولىنگەن ەكەن. شاعىم يەلەرى بۇل جوباعا دانيال احمەتوۆ تاراپىنان جەكە لوببي جاسالعانىنا دالەل رەتىندە ونىڭ اكىم بوپ تۇرعاندا بانكتىڭ لوندونداعى وفيسىنە كەلىسسوز جۇرگىزۋگە ءوزى بارعانىن ايتادى»، - دەپ جازعان دەپۋتات ماسەلە ءتىپتى لوببيدە ەمەس، اقشانىڭ جەلگە ۇشقانىندا دەيدى.
«ماسەلە سول ميللياردتاعان قاراجاتقا قويدىرعان شامداردىڭ باسىم بولىگىنىڭ جانىپ كەتكەندىگىندە جانە كەپىل ۋاقىتى ىشىندە اۋىستىرىلماعانىندا. سونىڭ سالدارىنان، وسكەمەن مەن سەمەيدە كوشە جارىعى جوق، الايدا، ول جاعداي ەكى وبلىستىڭ بيۋدجەتىن ەبرر الدىنداعى قارىز مىندەتتەمەلەرىنەن بوساتپايدى»، - دەيدى ول.
بۇل رەتتە ابزال قۇسپان قولىنداعى قۇجاتتارعا قاراپ، «وسى كۇماندى كەلىسىمگە قاتىسقان ەكى كومپانيانى – شقو اكىمدىگى اشقان «رەگيونالنىي سەنتر گچپ ۆكو» اق مەن تايۆاندا تىركەلگەن «Everlight Electronics Co. LTD» كومپانيا اتاپ وتكەن.
«ياعني، ءجىپتى شەتىنەن تارقاتاتىنى سياقتى، تەكسەرۋدى اكىمدىك جانىنان قۇرىلعان مەكەمەدەن باستاسا ءبىراز دۇنيەنىڭ باسى اشىلارى انىق. وسىعان بايلانىستى، شىعىستاعى اعايىنداردان تۇسكەن ارىز بەن ءوز تاراپىمنان قوسىمشا سۇراتقان قۇجاتتاردى ءتيىستى قۇقىق قورعاۋ ورگاندارىنا ءوز تالداۋىممەن قوسا جولدايمىن»، - دەپ جازدى ابزال قۇسپان.
دانيال احمەتوۆ 2014 جىلدان باستاپ 2023 جىلعا دەيىن شىعىس قازاقستان وبلىسىنىڭ اكىمى بولعان.
