ءبىز ءقازىر اقپارات عاسىرىندا ءومىر ءسۇرىپ جاتىرمىز. تەحنولوگيا قارىشتاپ دامىپ جاتقان كەزەڭدە زامان تالابىنا ساي ءبىلىمدى دە بىلىكتى، دامىعان، جان-جاقتى ۇرپاق تاربيەلەۋ بۇگىنگى كۇننىڭ باستى تالابى. ەل بولىپ تۇراقتى دامۋ ءۇشىن بىزگە ارينە ءبىرىنشى كەزەكتە ءبىلىم مەن مادەنيەت كەرەك. ادام بالاسىن ءبىلىم مەن پاراساتتىلىققا باۋلىپ، ءدۇيىم جۇرتتى تاربيەلەيتىن جەر ول - كىتاپحانا. ال وسى كيەلى وردانىڭ تىنىس-تىرشىلىگىنە جان بەرەتىن جاندار ارينە، كىتاپحاناشىلار.
قانشايىم يزامبەكوۆا كىتاپحانا سالاسىندا 40 جىلدان استام ۋاقىت ەڭبەك ەتىپ كەلەدى. بۇگىنگى تاڭدا ق ر ۇلتتىق كىتاپحاناسىندا كىتاپ قورىن تولىقتىرۋ قىزمەتىنىڭ جەتەكشىسى بولىپ جۇمىس ىستەيدى. كىتاپ قورىن ساقتاپ، قوردى تولىقتىرىپ، ۇلعايتىپ، ەل يگىلىگىنە جاراتۋدىڭ حاس شەبەرى. ماتەريالداردى جىكتەۋ، بيبليوگرافيا جانە تاعى باسقا كوپتەگەن قىزمەتتەردى اتقارادى.
«بالا كەزىمنەن كىتاپ وقىعاندى قاتتى جاقسى كورەتىنمىن. سودان كىتاپحاناشى بولسام ەكەن دەپ ارماندادىم. سونداعى ويىم، مول كىتاپتىڭ ورتاسىندا وتىرىپ الىپ قالاعان كىتابىمدى وقۋ. بالانىڭ ارمانى عوي ەندى. تىلەگىم ورىندالىپ، بيبليوگرافيا ماماندىعىنا وقۋعا ءتۇسىپ، ءقازىر ءوزىمنىڭ سۇيىكتى ماماندىعىم بويىنشا جۇمىس ىستەگەنىمە بيىل 42 جىل تولادى. جالپى سان ءتۇرلى ماماندىق بار عوي. ءبىراق مەنىڭشە كىتاپحاناشى ەڭ تارتىمدى، ەڭ قىزىقتى ماماندىق. وسى مادەني مەكەندە ءجۇرىپ ءبىلىمىمدى ارتتىردىم، ادامدارمەن قارىم-قاتىناس قۇرۋدى مەڭگەردىم، بارىنشا شىڭدالدىم. بۇل باعا جەتپەس كيەلى ماماندىق، سەبەبى كىتاپحانا ەڭ مادەنيەتتى مەكەن»، - دەپ وي تۇيىندەدى قانشايىم يزامبەكوۆا.
كىتاپ قورىن تولىقتىرۋ – كىتاپحاناشى جۇمىسىنىڭ ماڭىزدى تۇسى. كونە كىتاپتار مەن سيرەك قولجازبالاردى دۇرىس ساقتاۋ، ەلەكتروندى نۇسقاعا اينالدىرۋ، ماتەريالداردى سيفرلاندىرۋ سىندى جاۋاپتى جۇمىستار كوپ. ءوز ىسىنە ادال قىزمەتكەر رەتىندە قانشايىم اپاي ارىپتەستەرى مەن وقىرماندارىنىڭ اراسىندا سىي-قۇرمەتكە يە. ءاءلى دە كوپ وقيدى، ۇنەمى ىزدەنەدى، جاس كادرلارعا كورگەن-بىلگەنىن ۇيرەتەدى.
«قازاقستان رەسپۋبليكاسىنىڭ ۇلتتىق كىتاپحاناسىندا 24 ءبولىم جۇمىس ىستەيدى. 14 وقۋ زالى بار. سول زالداردىڭ بارلىعىندا وقىرماندار تولىق وتىرادى، بىزدەن اقپارات الادى. بۇگىندە ەشكىم كىتاپ وقىمايدى دەگەن سوزگە سەنبەيمىن. ويتكەنى ءبىزدىڭ زالدارىمىزدا وقىرماندار جەتكىلىكتى. قازىرگى تاڭدا كىتاپحاناشىلاردىڭ مارتەبەسى ءوسىپ، ايلىق جالاقىسى جىلدان جىلعا كوبەيىپ كەلەدى. جالپى ەلىمىزدە مادەنيەت سالاسىنا كوپ كوڭىل ءبولىنىپ جاتىر. مەملەكەت تاراپىنان قولداۋ بار. قولداۋسىز بولمايدى، ويتكەنى كءىتاپحاناشىنىڭ ەڭبەگى قوعام مەن مەملەكەتتىڭ دامىپ، وسىپ-وركەندەۋىنە وتە قاجەت. بۇنىڭ ءبارى ق ر پرەزيدەنتى قاسىم-جومارت توقايەۆتىڭ كىتاپحانالار مەن كىتاپحاناشىلاردىڭ الەۋمەتتىك جاعدايىنا ەرەكشە ءمان بەرۋىنىڭ ارقاسى.
«ادام بالاسى وز-وزىمەن وڭاشا قالىپ ويلاناتىن، ءبىلىم الەمىڭنە الاڭسىز سۇڭگيتىن، تىنىشتىقتا جان راحاتىنا بولەنەتىن جەر قايدا؟ دەسە مەن «كىتاپحانادا» دەر ەدىم. بىزگە كەلگەن وقىرمانداردىڭ العىسىنا قاراپ وسىنى بايقادىم. سوندىقتان دا كىتاپحاناشى مەن وقىرمان اراسىنداعى جىلى قارىم-قاتىناس بولۋى كەرەك. مۇندا ءجيى باس سۇعاتىن ادامدار ءبىر جاقىنىڭ سياقتى بولىپ قالادى، ءتىپتى ءبىزدىڭ جۇمىسىمىزعا شابىت بەرىپ، تۇراقتىلىق پەن سەنىمدىلىكتى نىعايتادى دەسەك بولادى. سوندىقتان دا وقىرمانعا بارىنشا جايلى ورتانى قالىپتاستىرۋعا تىرىسامىز»، - دەپ وي تۇيىندەدى تاجىريبەلى كىتاپحاناشى.
يتا كەتەلىك، كىتاپحاناشى ماماندىعى - ەڭ كونە ماماندىقتاردىڭ ءبىرى. كىتاپحانالار الەمدە ءتورت مىڭ جارىم جىلدىق تاريحى بار شۋمەر مادەنيەتى كەزەڭىنەن پايدا بولعان. سول زاماننان بەرى كىتاپحاناشىلار ءبىلىم مەن مادەنيەت جارشىسى بولىپ كەلە جاتىر.
