ءال-فارابي اتىنداعى قازاق ۇلتتىق ۋنيۆەرسيتەتى مەن جۋرناليستيكا فاكۋلتەتىنىڭ قۇرىلعانىنا 85 جىل تولۋىنا وراي «جۇمابەك كەنجالين–جۋرناليست. عالىم. ۇستاز. قايراتكەر» اتتى باسقوسۋ بولىپ ءوتتى.
«تۇلەكتەرىمىز–ءبىزدىڭ ماقتانىشىمىز» اتتى ستۋدەنتتەردىڭ وقۋ-دەمالىس الاڭىندا «ۇلت ۇستازدارىن ۇرپاعى ۇمىتپايدى» اتتى پورتتەر كورمەسى تانىستىرىلىپ، ءىس-شارا جۇمابەك كەنجالين اتىنداعى «باسپا ءسوز جانە جاڭا مەديا» وقۋ-شىعارماشىلىق زەرتحاناسىنىڭ سالتاناتتى اشىلۋىمەن جالعاستى. زەرتحانا – زاماناۋي تەحنيكامەن جابدىقتالعان تانىمدىق اۋديتوريالاردىڭ ءبىرى، جۇمابەك كەنجاليننىڭ دۇنيەگە كەلگەن شاعى مەن ءومىرىنىڭ سوڭىنا دەيىنگى ىزگى جولىنان، قۇندى كىتاپتارىنان، اسىل مۇراسىنان، «قازاق ادەبيەتى»، «اقيقات»، «انا ءتىلى» جۋرنال-گازەتتەرىندە اتقارعان قىزمەتىنەن حابار بەرىپ قانا قويماي، كەلەشەك جۋرناليستەردىڭ تاجىريبە جيناقتاپ، اقپارات الماسۋىنا زور مۇمكىندىك بەرەدى. ءالقاسوز جۇمىسىنا جۇمابەك كەنجالينمەن ءار جىلدارى قىزمەتتەس بولعان قوعام جانە مەملەكەت قايراتكەرلەرى، ۇستازدارى – ءلاتيپا مۇراتبەك قىزى، تۇرىمتاي تۇرلىباي قىزى، قوجابەرگەن كەرىمبەك ۇلى، سارباس اقتايەۆ، دامەگۇل سەردالى قىزى، قارىمدى قالامگەرلەر – ءسابيت دوسانوۆ، راۋشانبەك ءابساتتاروۆ، ساۋىتبەك ابدراحمانوۆ، زايىبى – ءاليما ءابدىراحمان قىزى مەن ۇلدارى – داستان مەن جاندوس، كۋرستاستارى، سىيلاس دوستارى، شاكىرتتەرى، بەلگىلى جۋرناليستەر، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ، جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى قاتىستى. زەرتحانانىڭ اشىلۋ سالتاناتىندا سارباس اقتايەۆ لەنتا قيىپ، جۋرناليستيكا سالاسىنىڭ مايتالماندارى مەن قىزمەتتەس دوستارى جۇمابەك كەنجاليننىڭ ومىرىنەن سىر شەرتىپ، يگى ىستەرى مەن ادامگەرشىلىك بولمىسىن ەسكە الدى.
جۇمابەك كەنجالين جۋرناليستيكا سالاسىنداعى العاشقى جولىن «ەگەمەن قازاقستان» گازەتىندە قاراپايىم ءتىلشى بولىپ باستاپ، رەداكتورلىققا دەيىنگى جولدى ءجۇرىپ ءوتتى. 1986-1988 جىلدارى «زەردە» («ءبىلىم جانە ەڭبەك») جۋرنالىندا جاۋاپتى حاتشى، باس رەداكتوردىڭ مىندەتىن اتقارۋشى، 1994-1996 جىلدارى «حالىق كەڭەسى» گازەتىنىڭ باس رەداكتورى، 1996 جىلى «اقيقات» جۋرنالىنىڭ باس رەداكتورى، 1997-1999 جىلدارى «قازاق ادەبيەتى» گازەتىنىڭ باس رەداكتورى بولىپ قىزمەت اتقاردى. ءومىرىنىڭ سوڭىنا دەيىن اقپارات سالاسىندا ەڭبەك ەتىپ، 2009-2017 جىلدارى «قازاق گازەتتەرى» سەرىكتەستىگىن باسقاردى، سەرىكتەستىك قۇرامىنداعى 6 باسىلىمنىڭ ۇزبەي شىعىپ تۇرۋى مەن دامۋىنا زور كۇش-جىگەرىن سالدى. گازەت نەمەسە جۋرنال رەداكسياسىنىڭ شتاتتىق قۇرىلىمىن ساقتاۋ، «قازپوشتا» اكسيونەرلىك قوعامىنا قاراستى ۇجىمداردىڭ تاراپ كەتۋىن بولدىرماۋ، پوليگرافيالىق كاسىپورىنداردىڭ جۇيەسىن ۇلعايتۋ سىندى ماقساتتاردى ۇستانىپ، گازەت-جۋرنالدىڭ تارالىمىن ارتتىردى. «جەلكىلدەپ وسكەن قۇراقتاي»، «شىندىقتى شىراق ەتىپ ۇستاڭىز»، «ۇلت رۋحىن ۇلىقتاعان ۇرپاقپىز»، «ساياسي مەنەدجمەنت جانە ءباسپاسوزدىڭ جۇرتشىلىقپەن بايلانىس ماسەلەلەرى»، «ەر جاۋكە مىنبەگەنمەن التىن تاققا»، «قالام قاناتى»، «ەلجاندىلىق مۇراتى جانە باسپا ءسوز بەدەلى» اتتى كىتاپتاردىڭ اۆتورى.
ج.كەنجالين اتىنداعى زەرتحانا بىلىكتى جۋرناليستەر دايارلاپ شىعارۋدا ۇلكەن ءرول اتقاراتىنى ءسوزسىز. ج.كەنجالين – جاس جۋرناليستەرگە ۇلگى بولارلىق ۇلتجاندى دارا تۇلعا. ج.كەنجاليننىڭ قالدىرعان ىزگى جولىن جالعاستىراتىن جۋرناليستەر مەن ۇرپاقتارى باردا «بۇگىنگىنىڭ ساكەنى» ەشقاشان دا ولمەيتىنىنە كوز جەتكىزگەندەي كۇي كەشتىك.
ايسۇلۋ سەزحان،
اباي اتىنداعى ورتا مەكتەپ-گيمنازياسىنىڭ
11-سىنىپ وقۋشىسى
