پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا توتەنشە جاعدايلار ۆيسە-مينيسترى باۋىرجان سىزدىقوۆتىڭ، باتىس وڭىرلەردىڭ، سونداي-اق سولتۇستىك قازاقستان وبلىسىنىڭ اكىمدەرىنىڭ سۋ تاسقىنىنا قارسى ءىس-شارالار تۋرالى باياندامالارى تىڭدالدى. بۇل تۋرالى ۇكىمەتتىڭ باسپا ءسوز قىزمەتى حابارلادى.
ۇكىمەت باسشىسى اتاپ وتكەندەي، ەلىمىزدە سۋ تاسقىنى جاعدايى بىرتىندەپ تۇراقتالىپ كەلەدى. اقمولا، اقتوبە، قاراعاندى، قوستاناي جانە پاۆلودار وبلىستارىندا ءقاۋىپتىڭ بەتى قايتتى. وتە كۇردەلى احۋال قالىپتاسقان پەتروپاۆل جانە قۇلسارى قالالارىندا سۋ تارتىلا باستادى.
جۇمىس ۋاقىتىندا تج ايماقتارىنان بارلىعى 119 مىڭنان استام ادام ءقاۋىپسىز ايماققا كوشىرىلدى. بۇگىندە ۇكىمەتتە، توتەنشە جاعدايلار مينيسترلىگىندە، وڭىرلەردە جەدەل شتابتار تاۋلىك بويى جۇمىس ىستەۋدە. پروبلەمالاردىڭ بارلىعى جەرگىلىكتى جەرلەردە جەدەل قارالىپ، شۇعىل شەشىمدەر قابىلدانۋدا.
ۇكىمەت باسشىسى مينيسترلەر كابينەتىنىڭ نازارىن سۋ تاسقىنى كەزىندە زارداپ شەككەندەرگە كەلتىرىلگەن شىعىنداردى وتەۋ جۇمىستارىنا اۋداردى. قازىرگى ۋاقىتتا 11 مىڭعا جۋىق وتباسى 100 اەك مولشەرىندە تولەم الدى.
«زارداپ شەككەندەرگە كەلتىرىلگەن شىعىنداردى وتەۋ تارتىبىنە تۇزەتۋلەر بەكىتىلدى. كەشە مەن ءتيىستى قاۋلىعا قوي قويدىم. 100 ايلىق ەسەپتىك كورسەتكىشكە قوسىمشا تاعى 150 اەك-كە دەيىن وتەماقى تولەيتىن بولامىز. وعان ادامدار توڭازىتقىش، ۇستەل، ورىندىقتار، ىدىس-اياق، كيىم-كەشەك سياقتى جوعالعان ءبىرىنشى كەزەكتەگى قاجەتتى زاتتاردى ساتىپ الا الادى. ازاماتتارعا ايتاتىنىم، سابىرلىق ساقتانىڭىزدار. ەشكىم دە كومەكسىز قالمايدى بۇل ماسەلەلەردىڭ بارلىعى پرەزيدەنتتىڭ جانە مەنىڭ جەكە باقىلاۋىمدا. سوندىقتان ءبىز وسى سىناقتان ابرويمەن وتەمىز دەپ بىلەمىن»، — دەپ اتاپ ءوتتى ولجاس بەكتەنوۆ.
سونداي-اق كاسىپكەرلەردىڭ شىعىندارى وتەلەدى.
سونىمەن قاتار پرەمەر-مينيستر كەيبىر وڭىرلەردە سۋ باسۋ ءقاۋپى ءالى دە سەيىلمەگەنىن اتاپ ءوتتى. وزەندەردە سۋ دەڭگەيىنىڭ كوتەرىلۋ فاكتىلەرى تىركەلۋدە.
وسىعان بايلانىستى توتەنشە جاعدايلار مينيسترلىگىنە اكىمدىكتەرمەن بىرگە سۋ تاسقىنىنا بايلانىستى جاعدايعا باقىلاۋدى كۇشەيتۋدى جالعاستىرۋ جانە جانە قاجەت بولعان جاعدايدا شۇعىل ارەكەت ەتىپ، حالىقتى كوشىرۋدى قامتاماسىز ەتۋ تاپسىرىلدى. ەكولوگيا مينيسترلىگى سۋ وبەكتىلەرى مەن وزەندەردە گيدروبەكەتتەر سانىن ۇلعايتۋى قاجەت.
«ءوڭىر اكىمدىكتەرى سۋ باسقان ۇيلەردى، عيماراتتار مەن نىسانداردى تەز ارادا تەحنيكالىق تەكسەرۋدى اياقتاسىن. سۋ كەتكەن جەرلەردە كوپكە سوزباي، تاسقىننان كەيىنگى تازارتۋ، دەزينفەكسيالاۋ جانە قالپىنا كەلتىرۋ جۇمىستارىن باستاۋ قاجەت»، — دەپ اتاپ ءوتتى پرەمەر-مينيستر.
ونەركاسىپ جانە قۇرىلىس مينيسترلىگىنە تۇرعىن ۇيلەردى، الەۋمەتتىك جانە ينجەنەرلىك ينفراقۇرىلىمدى قالپىنا كەلتىرۋ بويىنشا جەرگىلىكتى جەرلەردەگى بارلىق جۇمىستاردى ۇيلەستىرۋ ءۇشىن جەدەل توپ قۇرۋ تاپسىرىلدى.
«قۇرىلىس جانە جوندەۋ جۇمىستارىنىڭ ناقتى جوسپارى قاجەت. بۇل جاعداي بىزگە ينفراقۇرىلىمدى جاڭارتۋعا، ەلدى-مەكەندەردى كورىكتەندىرۋگە جاڭاشا كوزقاراستى قالىپتاستىرادى. ونىڭ ۇستىنە مەملەكەت باسشىسىنىڭ تاپسىرماسى بويىنشا “تازا قازاقستان” اۋقىمدى اكسياسى باستالدى. بارشاڭىزعا پرەزيدەنتتىڭ ءسوزىن ەستەرىڭىزگە سالعىم كەلەدى، بۇل ءبىر رەتتىك اكسيا نەمەسە ناۋقان ەمەس، تۇراقتى جۇمىسقا اينالۋى كەرەك. بۇل ەلدى-مەكەندەردى كورىكتەندىرۋگە قاتىستى جاڭاشا كوزقاراس قالىپتاستىرادى»، — دەپ اتاپ ءوتتى ولجاس بەكتەنوۆ.
