ۇقك بۇرىنعى باسشىسى كارىم ءماسىموۆتىڭ ورىنباسارى بولعان داۋلەت ەرعوجينگە تاعى ەكى باپ بويىنشا ايىپ تاعىلدى، دەپ حابارلايدى Ulys ۇقك باسپا ءسوز قىزمەتىنە سىلتەمە جاساپ.
كوميتەتتىڭ حابارلاۋىنشا، ەرعوجينگە قاتىستى تەرگەۋ جۇمىستارى ءالى جۇرگىزىلىپ جاتىر.
قازىرگى ۋاقىتتا وعان ق ر قك-نىڭ 218-بابى، 3-بولىگى، 3-تارماعى، ياعني «قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ (جىلىستاتۋ)» جانە ق ر قك-نىڭ 366-بابىنىڭ 4.4-بولىگى – «اسا ءىرى مولشەردە پارا الۋ» بويىنشا قۇدىك كەلتىرىلەدى.
وكق وتكەن باسپا ءسوز ءماسليحاتىندا سىبايلاس جەمقورلىققا قارسى ءىس-قيمىل اگەنتىگىنىڭ رەسمي وكىلى دانيار بيگايداروۆ «كاسپيي» فۋتبول كلۋبىندا جاسالعان جەمقورلىق جايلى ايتتى، دەپ حابارلايدى Azattyq Rýhy.
«ماڭعىستاۋ وبلىسى بويىنشا سىبايلاس جەمقورلىققا قارسى قىزمەت «كاسپيي» فۋتبول كلۋبى» شجق مكك بۇرىنعى ديرەكتورى مەن دەسترۋكتيۆتى ءدىني ورتا وكىلدەرىنە قاتىستى سوتقا دەيىنگى تەرگەۋ جۇرگىزۋدە. ولار زورلىق-زومبىلىق قولدانا وتىرىپ، اسا ءىرى مولشەردە اقشا بوپسالادى دەگەن كۇدىككە ءىلىنىپ وتىر»، - دەدى بيگايداروۆ.
ونىڭ ايتۋىنشا، ماڭعىستاۋ وبلىسى پروكۋراتۋراسىنىڭ ۇيلەستىرۋىمەن ءۇش كۇدىكتى قپك-نىڭ 128-بابى نەگىزىندە ۇستالىپ، ۋاقىتشا ۇستاۋ يزولياتورىنا قامالدى.
«قازىرگى ۋاقىتتا بۇرىنعى ديرەكتوردىڭ وقۋ-جاتتىعۋ جيىندارىن ۇيىمداستىرۋ ءۇشىن فۋتبول كلۋبىنا بولىنگەن بيۋدجەت قاراجاتىن جىمقىرۋ فاكتىسىنە قاتىستى ما، جوق پا تەكسەرىپ جاتىرمىز. تەرگەۋ جالعاسىپ جاتىر»، - دەدى رەسمي وكىل.
كوكتەمگى سۋ تاسقىنىنان زارداپ شەككەندەرگە كومەك رەتىندە جينالعان قايىرىمدىلىق اقشانى ۇرلادى دەگەن كۇدىكپەن قاماۋعا الىنعان پەريزات قايرات برەند سومكەلەر مەن زەرگەرلىك بۇيىمدارعا قۇمار بولعان. قارجى مونيتورينگى اگەنتتىگى تاراتقان اقپارات بويىنشا، پەريزات قايراتتىڭ ءبىر سومكەسىنىڭ ءوزى 25 ملن تەڭگە تۇرادى، دەپ حابارلايدى Ulys.
قايىرىمدىلىق قورىنىڭ باسشىسى سۋ تاسقىنىنان زارداپ شەككەندەرگە جانە پالەستينا حالقىنا گۋمانيتارلىق كومەك كورسەتۋ ماقساتىندا جينالعان 1،7 ملرد تەڭگەنى جىمقىردى دەگەن كۇدىككە ىلىنگەن.
بۇگىن قارجى مونيتورينگى اگەنتتىگى پەريزات قايراتتان تاركىلەنگەن مۇلىكتەردى كورسەتتى.
«پەريزات قايراتتىڭ تۇرعىلىقتى جەرىن ءتىنتۋ بارىسىندا قايىرىمدىلىققا جينالعان قاراجاتقا ساتىپ الىنعان قىمبات تەحنيكا، Cartier، Graff، Rolex، Bulgari، Gucci، Louis Vuitton، Versace، Chopard، Hermes، Dolce & Gabbana، Prada جانە تاعى باسقا تانىمال الەمدىك برەندتەردىڭ كيىم، اياق كيىم، زەرگەرلىك بۇيىمدارى، سومكەلەرى تاركىلەندى»، - دەلىنگەن حابارلامادا.
كۇدىكتىدەن تاركىلەنگەن قىمبات زەرگەرلىك بۇيىمداردىڭ جالپى قۇنى 70 ملن تەڭگەدەن اسادى. ماسەلەن، Graff برەندىنىڭ سىرعا-القالارى 10 ملن تەڭگەدەن باستالسا، Rolex ساعاتىن 7 ملن تەڭگەگە ساتىپ العان. ال Bulgari ساعاتى 6 ملن 750 مىڭ تەڭگە تۇرادى ەكەن.
بۇدان بولەك، پەريزات قايراتتىڭ برەند سومكەلەرگە دەگەن ماحابباتى دا ەرەكشە بولعان سىڭايلى. قۇقىق قورعاۋ ورگاندارى كۇدىكتىنىڭ ۇيىنەن جالپى قۇنى 110 ملن تەڭگەدەن اساتىن ونداعان سومكە تاپقان.
برەند سومكەلەردىڭ ەڭ ارزانى 1 ملن تەڭگە تۇرسا، ەڭ قىمباتى دا 25 ملن 600 تەڭگە بولىپ شىقتى. 2 ملن، 4 ملن، 14 ملن تەڭگەگە ساتىپ العان سومكەلەرى دە بار.
قما پەريزات قايراتتىڭ جيىرما شاقتى برەند سومكەسىنىڭ سۋرەتى مەن باعالارىن جاريالادى. پەريزات قايرات بارلىق سومكەسىنە P.K دەپ ءاتى-جونىنىڭ باس ارىپتەرىن جازدىرعان.
«قازاۆتوجول» كومپانياسىنىڭ بۇرىنعى ءتوراعاسى بيۋدجەت قاراجاتىن جىمقىرعانى ءۇشىن 8 جىلعا سوتتالدى، دەپ حابارلايدى Ulys باس كولىك پروكۋراتۋراسىنا سىلتەمە جاساپ.
«قازاۆتوجول» ۇك» اق-نىڭ بۇرىنعى ءتوراعاسى مەن باس مەردىگەرگە قاتىستى «جاقسى-ەسىل-بۋزۋلۋك» اۆتوجولىن كۇردەلى جوندەۋگە، سونىڭ ىشىندە ەسىل وزەنى ارقىلى وتەتىن كوپىردى سالۋعا بولىنگەن 200 ملن تەڭگە كولەمىندە مەملەكەت قاراجاتىن جىمقىرعان.
«كەلىسىمشارتتىڭ بۇزۋشىلىقتارمەن جاسالعاندىعى جانە بەرىلگەن اۆانستىڭ ىسىراپ ەتىلگەندىگى دالەلدەندى. جوبا بويىنشا جۇمىس باستالماعان. سوتتالعاندار 8 جىلعا باس بوستاندىعىنان ايىرىلدى. سونىمەن قاتار، سوت مەملەكەتكە كەلتىرىلگەن زالالدى ءوندىرىپ الدى. سوت ۇكىمى زاڭدى كۇشىنە ەنگەن جوق»، - دەلىنگەن باس كولىك پروكۋراتۋراسى حابارلاماسىندا.
