جەتىسۋ وبلىسى سارقان قالاسىنىڭ ماڭىنداعى شارۋا قوجالىقتارىنىڭ بىرىندە مايلى زىعىر وسىرىلە باستادى. ەگىس ناۋقانىنىڭ بارىسىمەن جۇمىس ساپارى اياسىندا اۋدانعا بارعان وبلىس اكىمى بەيبىت يسابايەۆ تانىستى، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.

«عالىم» شارۋا قوجالىعىندا بيىل100 گا مايلى زىعىر ەگىلدى. ءداندى جۇگەرى، سويا، ارپا، بيداي وسىرۋگە بەيىمدەلگەن بۇل شارۋاشىلىق وسى داقىلدى بيىل العاش رەت سەۋىپ وتىر.

- زىعىردىڭ اگروتەحنيكاسىن، تۇقىم نارىعىن زەرتتەي وتىرىپ، ءبىز «ورتاشا ليرينا» سورتىن وتىرعىزدىق. بۇل وتە ءونىمدى، قۇرامىندا مايى كوپ سورت. ءار گەكتارىنان 20-25 س الامىز، ال مايدىڭ مولشەرى كەمىندە 50% بولادى دەپ كۇتىپ وتىرمىز. ايماق اۋماعىندا مايلى داقىلداردى قايتا وڭدەيتىن بىرنەشە كاسىپورىن بار ەكەنىن ەسكەرسەك، شيكىزاتتى وتكىزۋدە قيىندىق تۋىندامايدى دەپ ويلايمىز. الدىن الا كەلىسىمدەر جاساسىپ تا قويدىق. سونىمەن قاتار زىعىر ءداندى داقىلداردىڭ اۋىسپالى ەگىسىنە دە پايدالى، - دەپ اتاپ ءوتتى شق باسشىسى عالىم راحمەتقالييەۆ.

اۋداننىڭ المالى اۋىلىنداعى «جۇماعالي» شارۋا قوجالىعىنىڭ ەگىستىكتەرىندە دە كوكتەمگى دالا جۇمىستارى قارقىندى ءجۇرىپ جاتىر. شارۋاشىلىقتا ەگىستىك تە، مال ءوسىرۋ دە قولعا الىنعان. مۇندا 537 باس ءىرى قارا، 600 باس ۇساق مال جانە 630 جىلقى ءوسىرىلىپ وتىر.

- بيىل ءبىز جازدىق ارپا، كۇنباعىس جانە ءبىرىنشى رەت قانت قىزىلشاسىن سەپتىك. ازىرگە قىزىلشانى 38 گەكتاردان باستاپ وتىرمىز. كەلەسى جىلى ۇلعايتۋ جوسپارىمىزدا بار، ويتكەنى بۇل تابىستى داقىل، ءارى وسى داقىلدى وسىرۋشىلەرگە مەملەكەتتىك قولداۋ كورسەتىلەدى. «كونۆيزا سمارت» جوعارى ءونىمدى تۇقىمىن سەۋىپ جاتىرمىز. شارۋاشىلىعىمىزدا قاجەتتى اۋىل شارۋاشىلىعى تەحنيكاسى بار، دەگەنمەن وتكەن جىلى اۋداندا سەرۆيستىك-دايىنداۋ ورتالىعىنا ارناپ ساتىپ الىنعان زاماناۋي تەحنيكا بىزگە ۇلكەن كومەك بولدى، وسى تەحنيكالاردىڭ قىزمەتتەرىن پايدالانىپ وتىرمىز. مىسالى، پنيەۆماتيكالىق سەپكىشتىڭ ارتىقشىلىعى سول، اۆتوپيلوتى بولعاندىقتان ونىڭ جىلدامدىعى جاقسى، ونىمەن كۇندىز دە، تۇندە دە جۇمىس ىستەي الاسىز. وسى تەحنيكانىڭ كومەگىمەن ءبىر كۇندە 30 گا جەر ەگۋگە بولادى، - دەيدى شق باسشىسى ەگەمەن جۇماعالي.

وسى ورايدا بەيبىت يسابايەۆ جەتىسۋ وبلىسىندا وندىرىلەتىن اۋىل شارۋاشىلىعى شيكىزاتىنىڭ 65%-ى وڭىردە قايتا وڭدەلەتىنىن، سونىڭ ىشىندە قانت وندىرىسىنە ەرەكشە كوڭىل ءبولىنىپ وتىرعانىن اتاپ ءوتتى.  

- مىسالى، وتكەن جىلى وبلىستىڭ 5 اۋدانىندا 8 جاڭا سەرۆيستىك-دايىنداۋ ورتالىعى قۇرىلدى، سونىڭ ارقاسىندا 30 شارۋا قوجالىعى قانت قىزىلشاسىن وندىرۋگە قاجەتتى جالپى سوماسى 2،5 ملرد.تەڭگەگە 62 بىرلىك تەحنيكا ساتىپ الۋعا مۇمكىندىك الدى. اۋىل شارۋاشىلىعىن دامىتۋ ءۇشىن، ونىمدىلىكتى ارتتىرۋ ءۇشىن وزىق تەحنولوگيالاردى مەڭگەرۋ كەرەك. بۇعان زاماناۋي اۋىل شارۋاشىلىعى تەحنيكاسى دا ۇلكەن ىقپال ەتەدى، - دەدى وبلىس اكىمى.

وتكەن جىلى سارقان اۋدانىندا 3 جاڭا سەرۆيستىك-دايىنداۋ ورتالىعى قۇرىلدى، ولارعا 4 سەپكىش، 3 قىزىلشا كومباينى جانە 3 پالەك جينايتىن ماشيناسى ساتىپ الىندى. ءقازىر اۋداندا 6 سدو جۇمىس ىستەيدى، وندا 30-عا جۋىق اۋىل شارۋاشىلىعى تەحنيكاسى بار. اۋداندا قانت قىزىلشاسىن ءوسىرۋدىڭ اگروتەحنولوگياسى دامىعانىن ەسكەرسەك، وتكەن جىلى ءتاتتى ءتۇبىر الاڭى 2 ەسەگە ۇلعايتىلدى، ال بيىل تاعى 900 گەكتارعا ارتادى. وسىلايشا، سارقان اۋدانىندا بۇل داقىلدىڭ القابى 3،8 مىڭ گەكتار بولماق.

جالپى وسى جىلى وبلىستىڭ اگروونەركاسىپتىك كەشەنىن دامىتۋعا 45 ملرد.تەڭگە ءبولىندى، ونىڭ 27 ملرد. تەڭگەسى نەمەسە 59% – سۋبسيديا.

قازاقستان حالقىنىڭ بىرلىگى كۇنىنە وراي الماتىنىڭ جەتىسۋ اۋدانىندا بىرەگەي ءىس-شارا ءوتتى.

الماتى اكىمدىگىنىڭ مالىمەتىنشە، «اينابۇلاق» شاعىن اۋدانىنداعى № 4 مامانداندىرىلعان بالالار-جاسوسپىرىمدەر سپورت مەكتەبىندە ەل تاريحىنداعى ەڭ ۇزىن — 1704 مەتر بولاتىن لاعمان دايىندالدى جانە بۇل فاكت قازاقستاننىڭ رەكوردتار كىتابىندا رەسمي تىركەلدى. جالپى 19 كەلى ۇننان قامىر يلەنىپ، 50-دەن استام اسپاز تاعامدى ەكى ساعاتتىڭ ىشىندە دايىنداعان.

— اسپازداردىڭ الدىندا قامىردى جىرتىپ الماي دايىنداۋ مىندەتى تۇردى. قيىندىقتارعا قاراماستان ءبىزدىڭ اسپازدار ونى وتە جاقسى دايىندادى، — دەدى جەتىسۋ اۋدانى انالار كەڭەسىنىڭ ءتورايىمى راحيما وماروۆا.

2015 جىلعى 18 ماۋسىمدا ەۋروپا كەڭەسىنىڭ مينيسترلەر كوميتەتى قازاقستان رەسپۋبليكاسىنىڭ باس پروكۋراتۋراسى باستاماشىلىق ەتكەن قىلمىستىق ىستەر بويىنشا قۇقىقتىق كومەك كورسەتۋ تۋرالى ەۋروپا كەڭەسىنىڭ كونۆەنسياسىنا قوسىلۋ جونىندەگى ءوتىنىمدى ماقۇلدادى.

اتالعان كونۆەنسياعا قاتىسۋ قازاقستاندىق قۇقىق قورعاۋ ورگاندارىنا قىلمىستىق ىستەر بويىنشا دالەلدەمەلەر الۋعا، زاڭسىز جولمەن شەتەلگە شىعارىلعان اكتيۆتەردى ەلگە قايتارۋعا، قىلمىسقا قارسى كۇرەس جانە حالىقارالىق قاۋىپسىزدىكتى قامتاماسىز ەتۋ سالاسىندا 46 ەۋروپالىق مەملەكەتپەن ىنتىماقتاستىقتىڭ تيىمدىلىگىن ارتتىرۋعا مۇمكىندىك بەرەدى. بۇل ەلىمىزدە «زاڭ مەن ءتارتىپ» تۇجىرىمداماسى اياسىندا حالىقارالىق ىنتىماقتاستىقتى دامىتۋ ارقىلى زاڭدىلىقتى نىعايتۋعا باعىتتالعان مەملەكەتتىك ساياساتقا سايكەس كەلەدى.

سونىمەن قاتار، اتالعان كوپجاقتى حالىقارالىق قۇجاتقا قوسىلۋ قازاقستاندى قىلمىسقا قارسى ءىس-قيمىل سالاسىندا ءاربىر ەۋروپالىق مەملەكەتپەن جەكە ەكىجاقتى شارتتار جاساسۋ قاجەتتىلىگىنەن بوساتادى.

ايتا كەتۋ كەرەك، قازاقستان وسى كونۆەنسياعا قوسىلۋ ءۇشىن 20 جىلدان استام ۋاقىت بويى قادامدار جاساپ كەلەدى، الايدا بۇرىنعى وتىنىمدەر ەۋروپا كەڭەسىنە مۇشە كەيبىر مەملەكەتتەردىڭ قارسىلىقتارىنا بايلانىستى ۇنەمى قابىلدانباعان.

مۇنداي شاقىرتۋدى الۋ قازاقستاننىڭ قىلمىستىق قۇقىقتىق جۇيەسىنە، ونىڭ ىشىندە زاڭ ۇستەمدىگىنە، ادام قۇقىقتارى مەن بوستاندىقتارىنىڭ ساقتالۋىنا ەۋروپالىق قاۋىمداستىق تاراپىنان سەنىمنىڭ بەلگىسى جانە قازاقستاندىق پروكۋرورلار مەن ديپلوماتتاردىڭ كوپجىلدىق قاجىرلى ەڭبەگىنىڭ ناتيجەسى بولىپ تابىلادى.