بۇگىن تالدىقورعاندا ەل پرەزيدەنتىنىڭ بالالارعا ارنالعان «قوش كەلدىڭ، جاڭا جىل!» اتتى جاڭا جىل شىرشاسى ءوتىپ، وندا اۋدان-قالالاردان كەلگەن 200 بالانى وبلىس اكىمى بەيبىت يسابايەۆ قۇتتىقتادى، دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
«جاستار» سپورت سارايىندا وتكەن مەرەكەلىك شاراعا كوپ بالالى، از قامتىلعان، تولىق ەمەس وتباسىلارىنان شىققان بالالار، جەتىم بالالار، ەرەكشە قاجەتتىلىگى بار بالالار، وقۋ وزاتتارى، ونەرلى ورەندەر كەلدى.
مەرەكەلىك شارا فلەشموب بيىمەن باستالدى. مۇنان سوڭ ەكراندا ەل پرەزيدەنتىنىڭ فوتوسى مەن بالالاردى جاڭا جىلمەن قۇتتىقتاۋى كورسەتىلدى.
بالالارعا قۇتتىقتاۋ تىلەگىن جەتكىزگەن وبلىس اكىمى:
- جاڭا جىل كوڭىلگە قۋانىش، جۇرەككە ءۇمىت سىيلايتىن، يگى ارمان-تىلەكتەر ەسەلەنەتىن مەرەكە. سوندىقتان ءارقاشان ارماندارىڭ اسقاق، الار اسۋلارىڭ بيىك بولسىن دەگىم كەلەدى. مەملەكەت باسشىسى قاسىم-جومارت كەمەل ۇلى توقايەۆ وزدەرىڭدى ىستىق ىقىلاسپەن قۇتتىقتاپ، جاقسى تىلەگىن بىلدىرۋدە. مەن ءوز زامانداستارىنىڭ ىشىندە مول بىلىمىمەن، جارقىن ونەرىمەن الدا جۇرەتىن جەتىسۋلىق بۇلدىرشىندەردىڭ بولاشاقتا ەل يگىلىگى ءۇشىن ايانباي قىزمەت ەتەتىن ازامات بولىپ وسەتىندىگىنە سەنىمىم مول، - دەدى ول.
بۇدان ءارى شىرشا شامى جاعىلىپ، وبلىس اكىمى بالالارمەن بىرگە شىرشانى اينالىپ، قۋانىشتارىن ءبولىستى. بالالارعا پرەزيدەنتتىڭ اتىنان جاڭا جىلدىق سىيلىقتار، اتاپ ايتقاندا پلانشەت، ريۋكزاك، جاڭا جىلدىق تاتتىلەر، قۇتتىقتاۋ حاتىن تاپسىردى.
ءتۇرلى ونەر ۇجىمدارى، انيماتورلار، كولۋندار، ەرتەگىلەر مەن مۋلتفيلمدەر كەيىپكەرلەرى مەرەكەلىك قويىلىمدارىن كورسەتتى. بالالارعا ءتۇرلى ويىندار ۇيىمداستىرىلىپ، ءتاتتى دامدەر ۇسىنىلدى.
بۇگىنگى مەرەكەگە كەلگەن بالالار تاماشا كوڭىل كۇيدە پىكىر ءبىلدىردى.
- مەن كوپ بالالى وتباسىنان شىققان وقۋ وزاتىمىن. ۇيدە 8 قىزبىز، ءبارىمىز بىر-بىرىمىزبەن تاتۋمىز. بۇگىنگى پرەزيدەنتتىڭ جاڭا جىل مەرەكەسى وتە كوڭىلدى ءوتىپ جاتىر. بارشا دوستارىمدى جاڭا جىل مەرەكەسىمەن قۇتتىقتايمىن، - دەدى پانفيلوۆ اۋدانى باسقۇنشى اۋىلىنداعى مەكتەپتىڭ وقۋشىسى ايشا الجانبەك.
«اينالايىن» بالالار ءۇيىنىڭ تاربيەلەنۋشىسى ليۋدميلا كيم:
- بۇگىنگى مەرەكە ماعان وتە ۇنادى. كوپشىلىكتىڭ الدىنا شىعىپ، تىلەگىمدى ايتتىم. بىزگە جاڭا جىلعا پلانشەت سىيعا تارتتى. شىرشا تويى بىزگە كوتەرىڭكى كوڭىل كۇي سىيلادى، - دەدى ول.
ساكەن ءابىلمانسۇر، تالدىقورعان قالاسىنىڭ № 16 مەكتەپ-گيمنازياسىنىڭ 4 سىنىپ وقۋشىسى:
- مەن «التىن ساقا»، «اقبوتا»، «كەنگۋرۋ» وليمپيادالارىنىڭ جەڭىمپازىمىن. بۇگىنگى مەرەكەگە قۋانا-قۋانا كەلدىم. اياز اتامەن، اقشاقارمەن، ءتۇرلى ەرتەگى كەيىپكەرلەرىمەن بىرگە ءان ايتىپ، بيلەپ، ويىن ويناپ، جاڭا جىلدى كوتەرىڭكى كوڭىل كۇيمەن تويلادىق، - دەدى.
