جەتىسۋ وبلىسىندا تاعى 7500 مىڭعا جۋىق ادام گازعا قوسىلۋعا مۇمكىندىك الدى. رەسپۋبليكا كۇنى قارساڭىندا كوكسۋ، ەسكەلدى، قاراتال اۋداندارىنىڭ 6 اۋىلدىق ەلدى مەكەنىنە گاز جەتكىزىلدى، دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
اتاپ ايتقاندا، كوكسۋ اۋدانىنىڭ جەتىجال، جەڭىس، ەڭبەكشىقازاق اۋىلدارى، ەسكەلدى اۋدانىنىڭ ەشكىولمەس، جەتىسۋ اۋىلدارى، قاراتال اۋدانىنىڭ كوكپەكتى اۋىلى كوگىلدىر وتىنعا قوسىلدى. سونىڭ ناتيجەسىندە كوكسۋ اۋدانىندا 13 اۋىل، ەسكەلدى اۋدانىندا 12 اۋىل، قاراتال اۋدانىندا 11 اۋىلعا گاز جەتكىزىلدى. اتالعان اۋداندار كەلەسى جىلدىڭ سوڭىنا دەيىن تولىق گازداندىرىلادى.
- تالدىقورعاننان كوكپەكتى اۋىلىنا كوشىپ كەلگەنىمىزگە 4 جىل بولدى. قىس بويى اعاشتى ايتپاعاندا، 4 تونناداي كومىر جاعىپ شىعاتىنبىز. كۇيەۋىم جۇمىس بارىسىمەن ءىسساپارعا ءجيى كەتەدى. ۇيدە كىشكەنتاي بالامەن كومىر كىرگىزۋ، وت جاعۋ، كۇل شىعارۋ وڭاي ەمەس. وعان قوسا كومىر جاققاننان ءۇيدىڭ ءىشىن تەز ىس الىپ قالاتىن. ەندى گاز كەلىپ قۋانىپ جاتىرمىز. گازدىڭ ارقاسىندا جىلۋ دا، تازالىق تا بىرگە كەلدى، - دەيدى قاراتال اۋدانى كوكپەكتى اۋىلىنىڭ تۇرعىنى دانيا تولەۋبەرگەنوۆا.
ەسكەلدى اۋدانىنىڭ تۇرعىندارى دا قۋانىشتارىن جاسىرمادى. مۇندا ءبىر كۇندە ەكى اۋىلعا گاز قوسىلدى.
- باياعىدا بىلتەلى شاممەن وتىرعان كەزدى دە كوردىك. كەيىن اۋىلعا ەلەكتر جارىعى، اۋىز سۋ جەتكىزىلدى، جول سالىندى. ەندى مىنە گاز كەلگەنىنە كۋا بولىپ وتىرمىز. ارينە بۇل اۋىلداستارىمىز ءۇشىن قوس قۋانىش بولىپ وتىر. جەرلەستەرىمدى ۇلىق مەرەكەمەن قۇتتىقتايمىن، وسىنداي جاقسى جاڭالىقتار مولايا بەرسىن، - دەدى جەتىسۋ اۋىلىنىڭ قارت تۇرعىنى كۇلسارا سەيىلبەكوۆا.
وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ مالىمەتىنشە، اۋىلدارعا گاز كىرگىزۋ كەزىندە بيزنەستىڭ الەۋمەتتىك جاۋاپكەرشىلىگى اياسىندا الەۋمەتتىك ءالجۋاز توپتار ساناتىنداعى بىرنەشە وتباسى دەمەۋشىلەر ەسەبىنەن گازعا تەگىن قوسىلدى.
جالپى بيىلعى جىلدىڭ سوڭىندا وبلىس تۇرعىندارىنىڭ 56،5% گازداندىرىلادى دەپ جوسپارلانىپ وتىر.
