جەتىسۋ وبلىسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اقسۋ، الاكول، سارقان، ەسكەلدى، كوكسۋ، قاراتال، كەربۇلاق اۋداندارداعى جانە پانفيلوۆ شەكارا ماڭىنداعى 15 دارىگەرلىك امبۋلاتوريانى، 39 فەلدشەرلىك-اكۋشەرلىك جانە 5 مەديسينالىق پۋنكتتى قوسا العاندا 59 نىساننىڭ قۇرىلىسى باستالدى. جالپى وڭىردە قابىلدانعان شارالاردىڭ ارقاسىندا سوڭعى 2 جىلدا دەنساۋلىق ساقتاۋ نىساندارىن جاڭارتۋ دەڭگەيى 50% -دان استى، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
وبلىستىق دەنساۋلىق ساقتاۋ باسقارماسىنىڭ مالىمەتىنشە، ءبىر عانا شالعاي الاكول اۋدانىندا ۇلتتىق جوبا اياسىندا 9 زاماناۋي دەنساۋلىق ساقتاۋ نىسانىنىڭ قۇرىلىسى باستالدى. بۇل ەكپىندى، جايپاق، بەسكول اۋىلدارىنداعى 3 دارىگەرلىك امبۋلاتوريا جانە جاناما، ساپاق، ءۇشبۇلاق، قىزىلقايىڭ، قاينار جانە اقجار اۋىلدارىنداعى 6 فەلدشەرلىك-اكۋشەرلىك پۋنكت.
وسىلايشا، اقجار اۋىلىنداعى فاپ-تىڭ دايىندىق دارەجەسى شامامەن 40% -دى قۇرايدى.
مەردىگەر ۇيىم وكىلى ءقۇربانالى وماروۆتىڭ ايتۋىنشا، قۇرىلىس جۇمىستارى تامىز ايىنىڭ باسىندا باستالعان.
- ءبىزدىڭ مىندەتىمىز - نىسان سالۋ، ىرگەلەس اۋماقتى اباتتاندىرۋ، قورشاۋ ورناتۋ. سونداي-اق، ءبىز 35 ملن. تەڭگەگە جۋىق سوماعا زاماناۋي مەديسينالىق جابدىقتار ساتىپ الۋعا ءوتىنىم بەردىك. ياعني ءبىز نىساندى دايىن كۇيدە تاپسىرامىز. شەتتەن كەلگەن مامانداردان باسقا 10 جەرگىلىكتى تۇرعىن تارتىلعان، بارلىق قاجەتتى تەحنيكا بار. ياعني، بىزدە مەرزىمىندە ورىنداۋعا بارلىق مۇمكىندىك بار، - دەپ اتاپ ءوتتى ق.وماروۆ.
اقجار اۋىلىندا 1500 ادام تۇرادى. سالىنىپ جاتقان فەلدشەرلىك-اكۋشەرلىك پۋنكت 60 جىلدارى سالىنعان بەيىمدەلگەن عيماراتتا ورنالاسقان ەسكىرگەن مەديسينالىق پۋنكتتىڭ ورنىنا سالىنادى.
- اۋىلداعى مەدپۋنكت ەسكىرگەن جانە نورمالار مەن تالاپتارعا سايكەس كەلمەيدى، قىستا مەدپۋنكت سالقىن بولادى. سوندىقتان دا اۋىل تۇرعىندارى وزدەرىندە زاماناۋي دەنساۋلىق ساقتاۋ مەكەمەسىنىڭ پايدا بولۋىنا، ياعني مەديسينالىق قىزمەت كورسەتۋ ساپاسىنىڭ ارتۋىنا وتە قۋانىشتى. شىلدە ايىندا ءبىزدىڭ اۋىلدىق وكرۋگتىڭ قوڭىر اۋىلىندا بلوكتى-مودۋلدى مەديسينالىق پۋنكت ىسكە قوسىلعاندىعىن اتاپ وتكىم كەلەدى. وتكەن جىلى مۇندا مەكتەپ جوندەلىپ، 150 ورىندىق جاڭا مادەنيەت ءۇيى سالىندى، مۇنىڭ ءبارى قۋانتادى، سەبەبى اۋىل تۇرعىندارىنىڭ ءومىر ءسۇرۋ ساپاسىن ارتتىرۋعا تىكەلەي اسەر ەتەدى، - دەپ قورىتىندىلادى اقجار اۋىلدىق وكرۋگىنىڭ اكىمى ەلەس جاپارعالييەۆ.
وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەڭگىروۆ اتاپ وتكەندەي، جەرگىلىكتى بيۋدجەت ەسەبىنەن جانە اۋىل تۇرعىندارىنا كورسەتىلەتىن مەديسينالىق قىزمەتتەردىڭ ساپاسىن ارتتىرۋ ماقساتىندا وڭىردە بلوكتى-مودۋلدى مەديسينالىق پۋنكتتەر سالىنۋدا.
- الاكول اۋدانىنا كەلەتىن بولساق، وتكەن جىلى قارلىعاش، بايزەرەك، ىنتالى اۋىلدارىندا بلوكتى-مودۋلدى مەديسينالىق پۋنكتتەر ورناتىلدى. بيىلعى جىلى وسىنداي نىساندار بيباقان، ارقارلى جانە قوڭىر اۋىلدارىندا پايدالانۋعا بەرىلدى. سونداي-اق، دوستىق، قابانباي جانە اقتۇبەك اۋىلدارىنا 3 سانيتارلىق اۆتوكولىك ساتىپ الىندى. جىل سوڭىنا دەيىن اۋداندىق اۋرۋحانا زاماناۋي مەديسينالىق جابدىقتارمەن قامتاماسىز ەتىلەدى. بۇدان باسقا، 200 توسەكتىك ستاسيونارى بار ورتالىق ەمحانا قۇرىلىسى ءۇشىن جوبالىق-سمەتالىق قۇجاتتاما ازىرلەنۋدە.
جالپى سوڭعى 2 جىلدا الاكول اۋدانىنا ينفراقۇرىلىمدىق جانە الەۋمەتتىك نىسانداردىڭ قۇرىلىسىنا، سونداي-اق جوبالاۋ جۇمىستارىنا وبلىستىق بيۋدجەتتەن 32،2 ملرد تەڭگە ءبولىندى.
