جەتىسۋ وبلىسى سارقان اۋدانىنىڭ اۋىلدارىندا قاتارىنان ءۇش الەۋمەتتىك ماڭىزى بار نىسان ىسكە قوسىلدى. شەكارالاس امانبوكتەر اۋىلىندا 500-دەن استام تۇرعىنى بار جاڭا بلوكتى-مودۋلدى مەديسينالىق پۋنكت پەن اۋىلدىق اكىمدىك پايدالانۋعا بەرىلدى. ءدال وسىنداي مەديسينالىق پۋنكت 600-دەن استام ادام تۇراتىن اباي اۋىلىندا دا ەل يگىلىگىنە ۇسىنىلدى، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
امانبوكتەر مەن اباي اۋىلدارىنداعى 60-شى جىلدارى سالىنعان بۇرىنعى ەكى مەديسينالىق پۋنكت تە قازىرگى سانيتارلىق نورمالارعا سايكەس كەلمەيتىن.
- بۇگىنگە دەيىن مەديسينالىق كومەك 1965 جىلى سالىنعان عيماراتتا كورسەتىلىپ كەلدى. بۇل ءبىراز قولايسىزدىق تۋعىزدى. ەندى قاجەتتى جابدىقتارى بار، جاڭا، زاماناۋي مەديسينالىق مەكەمەدە مەديسينالىق قىزمەت كورسەتۋدىڭ دە ساپاسى ارتادى. عيمارات جىلى، جارىق، جايلى، مۇندا جۇمىس ىستەۋ دە قولايلى، - دەدى دەنساۋلىق ساقتاۋ سالاسىنىڭ ارداگەرى، امانبوكتەر اۋىلىنىڭ تۇرعىنى كۇلپاش جانتەلوۆا.
1974 جىلى سالىنعان امانبوكتەر اۋىلدىق اكىمدىگى اپاتتى جاعدايدا بولعان. ەندى جاڭا عيمارات بارلىق تالاپتارعا ساي كەلەدى، ماماندار ءۇشىن ىڭعايلى جۇمىس كابينەتتەرى قاراستىرىلعان.
جاڭا بلوكتى-مودۋلدى مەديسينالىق پۋنكت سالتاناتتى تۇردە اشىلعان اباي اۋىلىنىڭ تۇرعىندارى دا ريزا.
- تۇرعىندار عانا ەمەس، ءبىز دە قۋانىشتىمىز. ويتكەنى، ماتەريالدىق بازا ەسكىرگەندە، وعان قوسا عيمارات سانيتارلىق نورمالارعا سايكەس كەلمەسە ساپالى مەديسينالىق كومەك كورسەتۋ دە قيىن. ەندى، مىنە، جاڭا مەديسينالىق پۋنكت سالىندى. مۇندا العاشقى، جەدەل مەديسينالىق كومەك كورسەتۋ، سكرينينگ، ۆاكسيناسيا جۇرگىزۋ، بالالى ايەلدەردى تەكسەرۋ، ناۋقاستاردى ورتالىق اۋرۋحاناعا جىبەرۋ، پاتروناج ۇيىمداستىرۋ جۇمىستارىنا قاجەتتى جاعداي بار، - دەدى اباي اۋىلىنداعى مەدپۋنكتتىڭ اعا مەدبيكەسى جامال دولانبايەۆا.
جالپى وتكەن جىلى سارقان اۋدانىندا ەشكىولمەس، ك. قازىبايەۆ جانە بىرلىك اۋىلدارىندا 3 بلوكتى-مودۋلدى مەديسينالىق پۋنكت ىسكە قوسىلعان، سونداي-اق بيىل چەركاسك اۋىلىندا دارىگەرلىك امبۋلاتوريا پايدالانۋعا بەرىلدى.