پرەزيدەنت قاسىم-جومارت توقايەۆ سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ەلىمىزدەگى سىبايلاس جەمقورلىققا قارسى ءىس-قيمىل شارالارى تۋرالى ەسەبىن تىڭدادى، دەپ حابارلايدى اقوردا.
قاسىم-جومارت توقايەۆقا جوعارى لاۋازىمدى تۇلعالاردىڭ قاتىسى بار قىلمىستاردىڭ جولىن كەسۋ جۇمىستارى جالعاسىپ جاتقانى جونىندە مالىمەت بەرىلدى.
اسحات جۇماعاليدىڭ ايتۋىنشا، ۆەدومستۆو 2022 جىلدان باستاپ مەملەكەت پەن كۆازيمەملەكەتتىك سەكتور سۋبەكتىلەرىنە 1 تريلليون 90 ميلليارد تەڭگە سوماسىندا مۇلىكتىك اكتيۆتەر مەن قاراجاتتىڭ قايتارىلۋىن قامتاماسىز ەتكەن. ءبىلىم بەرۋ ينفراقۇرىلىمىن قولداۋ قورىنا 153،3 ميلليارد تەڭگە اۋدارىلعان. وسى قارجىعا ءقازىردىڭ وزىندە 50-دەن استام مەكتەپ اشىلعان. سونداي-اق تاعى 30 ءبىلىم وشاعىن سالۋ جوسپارلانعان.
مەملەكەت باسشىسىنا بۇعان دەيىن بەرگەن تاپسىرمالارىنىڭ ورىندالۋ بارىسى تۋرالى باياندالدى. اتاپ ايتقاندا، اگەنتتىك ۇلتتىق بانكپەن جانە قارجى مينيسترلىگىمەن بىرلەسىپ، «سيفرلىق تەڭگە» پلاتفورماسى ارقىلى جۇزەگە اسىراتىن «اقشانى بوياۋ» جوباسىن ىسكە قوستى. اسحات جۇماعالي پرەزيدەنت جولداۋىندا جۇكتەگەن مىندەتتەرگە ساي جول قۇرىلىسى مەن اۋىل شارۋاشىلىعى سالالارىندا سىبايلاس جەمقورلىقتى جويۋ جۇمىستارى جۇرگىزىلىپ جاتقانىن ايتتى.
سونىمەن قاتار «جايلى مەكتەپ» ۇلتتىق جوباسىنا مونيتورينگ جاسالىپ جاتىر. تەكسەرۋ بارىسىندا قاراجاتتى ءتيىمسىز پايدالانۋعا جانە نىسانداردى تاپسىرۋ ۋاقىتىن كەشىكتىرۋگە سەبەپ بولاتىن سىبايلاس جەمقورلىق تاۋەكەلدەرى تالدانادى.
بۇدان بولەك، قاسىم-جومارت توقايەۆقا پەداگوگتەردىڭ ەڭبەكاقى قورىنان ميللياردتاعان قارجى جىمقىرۋعا جول بەرگەن سىبايلاس جەمقورلىق فاكتورلارىن جويۋ شارالارى تۋرالى ايتىلدى. بيىل اگەنتتىكتىڭ باستاماسىمەن بيۋدجەت پروسەستەرىن اۆتوماتتاندىرۋعا، قازىناشىلىقتى ءبىلىم بەرۋ مەكەمەلەرىنىڭ ەسەپ جۇيەلەرىمەن ينتەگراسيالاۋعا، تولەم قۇجاتتارىنا قول قويۋ كەزىندە بيومەتريانى پايدالانۋعا باعىتتالعان سيفرلىق شەشىمدەر ەنگىزىلدى.
پرەزيدەنتكە حالىقارالىق قاتىناستار، كادر ساياساتى، نورماتيۆتىك-قۇقىقتىق اكتىلەر ازىرلەۋ پروسەسى سەكىلدى ۆەدومستۆونىڭ باسقا دا باستى باعىتتارى بويىنشا اتقارىلعان جۇمىستار تۋرالى اقپارات بەرىلدى.
كەزدەسۋ سوڭىندا مەملەكەت باسشىسى ەلىمىزدەگى سىبايلاس جەمقورلىقپەن كۇرەستى كۇشەيتۋ جونىندە ءبىرقاتار تاپسىرما بەردى.
