بيىل ءساۋىر ايىنان باستاپ قازاقستاندا دەكرەتتىك تولەمدەردى ەسەپتەۋ تارتىبىنە قاتىستى وزگەرىس كۇشىنە ەندى. ەندى جۇكتىلىك پەن بوسانۋعا بايلانىستى الەۋمەتتىك تولەم 7 ەڭ تومەنگى جالاقىدان اسپايتىن ورتاشا ايلىقپەن ەسەپتەلەدى. ياعني ءبىر ەمەس، بىرنەشە جۇمىستا قاتار ىستەپ، ايىنا 595 مىڭ تەڭگەدەن ارتىق تابىس تاۋىپ جۇرگەن جۇكتى ايەل دەكرەتكە شىققاندا ەڭ كوپ دەگەندە 2 499 000 تەڭگە الادى. ال كەيبىر انالاردىڭ 3 391 500 تەڭگە الۋعا دا قۇقىعى بار.
مىسالى، قىزمەتكەر ايەل جۇمىسىنان 2025 جىلعى ساۋىردە دەكرەتكە شىقسا، ونىڭ ورتاشا ايلىق كىرىسىن انىقتاۋ كەزىندە 2024 جىلعى ساۋىردەن 2025 جىلعى ناۋرىزعا دەيىنگى كەزەڭ ەسكەرىلەدى.
«ەگەر سوڭعى 12 ايداعى ورتاشا ايلىق كىرىس 595 000 تەڭگەدەن كوپ بولسا (جۇمىس بەرۋشىلەردىڭ سانىنا قاراماستان)، وندا ول ايەلگە جۇكتىلىككە جانە بوسانۋعا بايلانىستى الەۋمەتتىك تولەم بىلاي تاعايىندالادى: ەمحانا پاراعى 126 كۇنگە بەرىلگەن جاعدايدا – 2 499 000 تەڭگە؛ ەمحانا پاراعى 170 كۇنگە بەرىلگەن جاعدايدا – 3 391 500 تەڭگە»، - دەپ ءتۇسىندىردى ەڭبەك جانە حالىقتى الەۋمەتتىك قورعاۋ مينيسترلىگى.
ايتا كەتەرى، يادرولىق سىناقتىڭ زاردابىن تارتقان ايماقتا تۇراتىن جانە جەڭىلدىكتەر مەن وتەماقىلارعا قۇقىعىن راستايتىن كۋالىگى بار ايەلدەرگە ەمحانا پاراعى 170 كۇنگە بەرىلەدى. ياعني وسى ساناتقا كىرەتىن انالاردىڭ دەكرەتتىك تولەمى 3،4 ميلليون تەڭگەنى قۇرايدى.
دەگەنمەن ورتاشا ايلىق كىرىسى 595 مىڭ تەڭگەدەن اساتىن ايەلدەر جۇمىس بەرۋشى ارقىلى قوسىمشا تولەم الا الادى. ەڭبەك كودەكسىنە سايكەس، جۇمىس بەرۋشى قوردان تولەنگەن سومانى شەگەرىپ، ورتاشا جالاقىسىن ساقتاي وتىرىپ، جۇكتىلىككە جانە بوسانۋعا بايلانىستى دەمالىسقا اقى تولەيدى. بۇل ەڭبەك شارتىندا نەمەسە ۇجىمدىق شارتتا، جۇمىس بەرۋشىنىڭ اكتىسىندە كوزدەلۋى مۇمكىن. ەگەر مۇنداي ەرەجە بولماسا، قىزمەتكەر ونى سول قۇجاتتارعا ەنگىزۋدى تالاپ ەتۋگە قۇقىلى.
ال سوڭعى 12 ايداعى ورتاشا تابىسى 595 مىڭ تەڭگەدەن تومەن ايەلدەر ءۇشىن جۇكتىلىككە جانە بوسانۋعا بايلانىستى الەۋمەتتىك تولەمدى تاعايىنداۋ ءتارتىبى وزگەرمەيدى.
سەگىزىنشى ساۋىردەن كۇشىنە ەنگەن بۇل وزگەرىستەردىڭ جۇمىس ىستەمەيتىن ايەلدەرگە ەش قاتىسى جوق. ولار سول كۇيى ءسابي دۇنيەگە كەلگەندە مەملەكەتتەن بەرىلەتىن ءبىرجولعى تولەم مەن بالا كۇتىمىنە بايلانىستى جاردەماقىنى الا بەرەدى.
بالا تۋعاندا بەرىلەتىن ءبىرجولعى مەملەكەتتىك جاردەماقى:
- ءبىرىنشى، ەكىنشى، ءۇشىنشى بالاعا – 38 اەك نەمەسە 149 416 تەڭگە؛
- ءتورتىنشى جانە ودان كەيىنگى بالالارعا – 63 اەك نەمەسە 247 716 تەڭگە.
ال وتباسىندا ەگىز، ۇشەم نە تورتەم دۇنيەگە كەلسە، ءبىرجولعى جاردەماقى ءار سابيگە بولەك تولەنەدى.
