پرەزيدەنت قاسىم-جومارت توقايەۆ قازاقستاننىڭ بىلىكتى جاستارىنان  قۇرالعان جاڭا ەليتا جاساقتاۋ جايىن سايلاۋالدى «يگىلىك بارشاعا! ساباقتاستىق. ادىلدىك. ورلەۋ» دەپ اتالاتىن  باعدارلاماسىندا ايتقان بولاتىن. ول ءۇشىن دارىندى جاستاردى قولدايتىن پرەزيدەنتتىك كادرلىق رەزەرۆ قۇرىلاتىنىن دا مالىمدەگەن ەدى. «مەملەكەتتىك قىزمەتتىڭ بارلىق دەڭگەيىندە جاڭا دارىندى باسقارۋشىلاردى قولداۋ ءۇشىن پرەزيدەنتتىك كادرلىق رەزەرۆ قۇرىلادى. ءبىزدىڭ جاستار - وتە دارىندى ءارى كرەاتيۆتى، ماقساتقا ۇمتىلىپ تۇرادى. سول سەبەپتى، قازاقستاننىڭ بولاشاعى سەنىمدى قولدا دەپ ايتا الامىن»، - دەگەن بولاتىن مەملەكەت باسشىسى. بولاشاقتا قازاقستاننىڭ باسقارۋشى ەليتاسى قۇرامىنا ازىرشە 300 جاس ماماندى ىرىكتەپ الۋ جوسپارلانعان.   

ق ر مەملەكەتتىك قىزمەت ىستەرى اگەنتتىگىنىڭ باسپا ءسوز قىزمەتى پرەزيدەنتتىڭ كادرلىق رەزەرۆىنە ىرىكتەۋدىڭ قىركۇيەك ايىنىڭ بىرىنەن باستالاتىنىن جاريالادى. وزدەرىنىڭ باقتارىن سىناپ كورگىسى كەلەتىن جاستارعا ارناپ رەزەرۆكە وتكىسى كەلەتىندەرگە قويىلاتىن تالاپتاردى تومەندە تولىق جاريالاپ وتىرمىز.  

پرەزيدەنتتىك كادر رەزەرۆى الداعى رەفورمالاردىڭ لوكوموتيۆى بولاتىن جاستار ءۇشىن اشىق جانە ءتيىمدى الەۋمەتتىك ءليفتتى قۇرۋ ماقساتىندا قالىپتاستىرىلادى.

جاسى 35-تەن استام ەمەس، جوعارى ءبىلىمى جانە 5 جىلدان كەم ەمەس جۇمىس ءوتىلى بار قازاقستان رەسپۋبليكاسىنىڭ ازاماتى ىرىكتەۋگە قاتىسا الادى.

بۇل رەتتە پرەزيدەنت تاعايىندايتىن مەملەكەتتىك ساياسي قىزمەتشىلەر ىرىكتەۋگە قاتىسپايدى.

ازاماتتار پرەزيدەنتتىك كادر رەزەرۆىنە 3-جىلدىق مەرزىمگە الىنادى. وسى كەزەڭنىڭ ىشىندە ءتيىستى بوس ورىن بولعان جاعدايدا ادام ساياسي نەمەسە جوعارى باسقارۋشى اكىمشىلىك لاۋازىمىنا، ۇلتتىق باسقارۋشى حولدينگتەردىڭ نەمەسە كومپانيالاردىڭ جوعارى باسقارۋشى لاۋازىمىنا تاعايىندالۋى مۇمكىن.

پرەزيدەنتتىك رەزەرۆتەن تاعايىنداۋدى كوزدەيتىن لاۋازىمدار قىزمەتتىڭ باعىتتارىن ەسكەرۋىمەن توپتاستىرىلعان:

لاۋازىمداردىڭ سالالىق توبى:

(مينيسترلەر، ولاردىڭ ورىنباسارلارى،

وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرىنىڭ ءبىرىنشى ورىنباسارلارى مەن ورىنباسارلارى؛

ورتالىق اتقارۋشى ورگاندار كوميتەتتەرىنىڭ ءتوراعالارى؛

ۇلتتىق باسقارۋشى حولدينگتەردىڭ باسقارمالارىنىڭ، ۇلتتىق حولدينگتەردىڭ، ۇلتتىق كومپانيالاردىڭ ءتوراعالارى جانە مۇشەلەرى)؛

سالالىق لاۋازىمداردىڭ توبى قىزمەتتىڭ مىناداي باعىتتارىن قامتيدى:

ەكونوميكالىق ساياسات جانە مەملەكەتتىك جوسپارلاۋ؛

الەۋمەتتىك ساياسات؛

ينفراقۇرىلىمدى جانە رەزەرۆتى دامىتۋ؛

سىرتقى ساياسات؛

قۇقىقتىق ساياسات پەن قاۋىپسىزدىك؛

وڭىرلىك لاۋازىمداردىڭ توبى:

(وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرى؛

وبلىستىق ماڭىزى بار قالالاردىڭ، وبلىستار اۋداندارىنىڭ جانە قالالارداعى اۋدانداردىڭ اكىمدەرى)؛

اكىمشىلىك لاۋازىمداردىڭ توبى:

(ورتالىق اتقارۋشى ورگانداردىڭ جاۋاپتى حاتشىلارى؛

ورتالىق مەملەكەتتىك ورگانداردىڭ اپپارات باسشىلارى؛

جاۋاپتى حاتشى لاۋازىمى ەنگىزىلمەگەن ورتالىق اتقارۋشى ورگاندار اپپاراتتارىنىڭ باسشىلارى؛

وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرى اپپاراتتارىنىڭ باسشىلارى).

لاۋازىمدار توبىن تانداۋ الداعى كانديدات جوباسىنىڭ تاقىرىبىن ايقىندايدى، سونداي-اق پرەزيدەنتتىك رەزەرۆكە الىنعان جاعدايدا لاۋازىمعا تاعانيىنداۋ كەزىندە ەسكەرىلەدى.

پرەزيدەنتتىك رەزەرۆكە كانديدات ءبىرقاتار كەزەڭدەردەن وتەدى.

ءبىرىنشى. قاتىسۋ ءۇشىن قۇجاتتاردى تاپسىرۋ

قۇجاتتاردى تاپسىرۋ ءراسىمى اۆتوماتتاندىرىلعان.

ۇسىنىلعان مالىمەتتىڭ جانە قۇجاتتاردىڭ شىنايلىعى ىرىكتەۋدىڭ ءاربىر كەزەڭىندە تەكسەرىلەدى.

ەكىنشى. كانديداتتاردىڭ تەوريالىق بىلىمدەرىن تەستىلەۋدەن ءوتۋ

تەستىلەۋدەن ءوتۋ ءراسىمى اۆتوماتتاندىرىلعان، ونلاين-رەجيمىندە وتكىزىلەدى.

تەستىلىك تاپسىرمالار كانديداتتىڭ تەوريالىق تايىندىعىن، تالدامالىق  جانە سىن تۇرعىسىنان ويلاۋ دەڭگەيىن انىقتاۋعا باعىتتالعان.

ىرىكتەۋدىڭ كەلەسى كەزەڭىنە جىبەرىلەتىن ەڭ جوعارى ناتيجەلەردى كورسەتكەن كانديداتتاردىڭ سانىڭ كادر رەزەرۆى جونىندەگى ۇلتتىق كوميسسياسى ايقىندايدى.

ءۇشىنشى. بەرىلگەن تاقىرىپقا ەسسە جازۋ

ەسسە جازۋ ءراسىمى اۆتوماتتاندىرىلعان، ونلاين رەجيمىندە وتكىزىلەدى.

ەسسە جازۋ بارىسىندا كانديداتتاردىڭ ساۋاتتىلىعى، قيسىندىلىعى جانە دالەلدىلىگى، تۇيىندەردىڭ نەگiزدiلiگi، ۇسىنىستارى باعالانادى.

ەسسە جازۋ ۋاقىتى مەن كولەمى شەكتەۋلى.

ءتورتىنشى.  سالالىق كوميسسيالاردىڭ الدىنادا جوبانى ۇسىنۋ

جوبانىڭ تاقىرىبى ىرىكتەۋگە قاتىسۋ ءۇشىن قۇجات تاپسىرعاندا كانديدات تاڭداعان لاۋازىمدار توبىنا سايكەس كەلۋى قاجەت.

كەزەڭ جوبالاردىڭ بەينەپرەزەنتاسياسى فورماتىندا وتكىزىلەدى.

جوبا ءتيىستى سالاعا قاتىستى وزەكتى ماسەلەنى، ونى شەشۋ بويىنشا ۇسىنىستاردى، تاسىلدەردىڭ نەگىزدەمەلەرىن قامتۋ قاجەت.

بەسىنشى. قۇندىلىقتاردى، موتيۆاسيانى جانە قۇزىرەتتەردى باعالاۋدى ءوتۋ

بۇل كەزەڭ كانديداتتاردىڭ جەكە قۇندىلىقتارىن، مەملەكەتتىك قىزمەتتە جۇمىس ىستەۋ موتيۆاسياسىنىڭ دەڭگەيىن، سونداي-اق باسقارۋشىلىق قۇزىرەتتەرىن ايقىنداۋعا باعىتتالعان. 

باعالاۋدى ساراپشىلار وتكىزەدى.

التىنشى. ساراپتامالىق كوميسسيادا اڭگىمەلەسۋدەن ءوتۋ

كوميسسيا پرەزيدەنت اكىمشىلىگىنىڭ بەيىندىك بولىمدەرى مەڭگەرۋشىلەرىنىڭ قاتىسۋىمەن پرەزيدەنت اكىمشىلىگىنىڭ باسشىسى ورىنباسىرىنىڭ توراعالىعىمەن قالىپتاستىرىلادى.

ساراپتامالىق كوميسسيا وتىرىسىنىڭ ناتيجەلەرى بويىنشا كادر رەزەرۆى جونىندەگى ۇلتتىق كوميسسيانىڭ قاراۋىنا ۇسىنىلعان بارىنشا دايارلانعان كانديداتتاردىڭ ءتىزىمى قالىپتاستىرىلادى.

جەتىنشى. كادر رەزەرۆى جونىندەگى ۇلتتىق كوميسسيادا اڭگىمەلەسۋدەن ءوتۋ

ۇلتتىق كوميسسييادا پرەزيدەنت اكىمشىلىگىنىڭ باسشىسى ءتوراعالىق ەتەدى.

كوميسسيانىڭ وتىرىسى ناتيجەسىندە كانديداتتاردى پرەزيدەنتتىك رەزەرۆىنە الۋ شەشىمى قابىلدانادى.

رەزەرۆتەگى ادامداردى لاۋازىمعا تاعايىنداۋدان بۇرىن ولاردى وقىتۋ كوزدەلەدى.

وقۋ شەڭبەرىندە اتالعان ادامدار حالىقپەن جۇمىس ىستەۋگە، حالىقتىڭ الدىندا سويلەۋگە، بەلگىسىزدىك جاعدايدا جۇمىس ىستەۋگە قاجەتتى قۇزىرەتتەردى ۇلعايتۋ ماقساتىندا مەملەكەتتىك ورگانداردا جانە ۇيىمداردا تاعىلىمدامادان وتەدى.

photo: mfa.gov.kz