قازاقستان رەسپۋبليكاسى پرەزيدەنتىنىڭ 2020 جىلعى 15 قاڭتارداعى جارلىعىمەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى ەرەكشە مارتەبەگە يە بولدى. ۋنيۆەرسيتەتىمىزدىڭ رەكتورى بولاتبەك ابدراسيلوۆ ۋنيۆەرسيتەت ۇجىمىنا جاعىمدى جاڭالىقتى جەتكىزىپ، قازاقستان پرەزيدەنتى قاسىم-جومارت توقايەۆتىڭ ەرەكشە مارتەبە بەرۋ تۋرالى جارلىعىمەن تانىستىرعان.
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى بولاتبەك ابدراسيلوۆ:
— ەكى مەملەكەتتىڭ شەشىمىمەن قۇرىلعان وقۋ وردامىز كيەلى تۇركىستاندا اشىلۋىنىڭ ءوزى تاريحي ورنى بار. ءبىزدىڭ ۋنيۆەرسيتەت نەگىزىن ياساۋي ىلىمدەرىنەن الاتىن، سول كەزدەگى مەدرەسەلەردىڭ جالعاسى دەپ قاراساق تا بولاتىن سياقتى. ۋنيۆەرسيتەتىمىز ەلباسى ن.نازاربايەۆتىڭ جارلىعىمەن اشىلدى، ەلىمىزدىڭ پرەزيدەنتى ق.توقايەۆتىڭ 2020 جىلعى 15 قاڭتارداعى جارلىعىمەن ەرەكشە ستاتۋسقا يە بولىپ وتىرمىز. مەملەكەت تاراپىنان بيىلعى ءبىلىم مەن عىلىمنىڭ دامۋىنا قولداۋ كورسەتىلۋدە. ۋنيۆەرسيتەتىمىزدىڭ الدىنا قويعان مىندەتتەر مەن جوسپارلاردى جۇزەگە اسىرۋدا بەرىلگەن تاپسىرمالاردى ۋاقىتىندا ساپالى ورىنداۋىمىز كەرەك.
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ I ۆيسە-پرەزيدەنتى جەنگيز تومار:
-بۇگىن ءبىزدىڭ ۋنيۆەرسيتەتىمىز ءۇشىن وتە ماڭىزدى كۇن. ءبىزدىڭ ۋنيۆەرسيتەتىمىز ەرەكشە مارتەبەگە يە بولىپ وتىر. ق.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ اتىنان تۇركى دۇنيەسىنىڭ اقساقالى ن.نازاربايەۆتىڭ قولداۋىنا جانە قازاقستان رەسپۋبليكاسىنىڭ پرەزيدەنتى ق.توقايەۆقا العىس بىلدىرەمىز. ۋنيۆەرسيتەتتىڭ ەرەكشە مارتەبەسى بىزگە اكادەميالىق جانە باسقارۋشىلىق دەربەستىك بەرە وتىرىپ، ديسسەرتاسيالىق كەڭەس اشىپ، Ph.D. دوكتورانتتارىن وزىمىزدە قورعاتۋعا دارەجەسىن تاعايىنداۋعا، ءبىلىم بەرۋ ستاندارتتارىن، باعدارلامالارىنىڭ مازمۇنىن انىقتاۋعا كوپ مۇمكىندىك جاسايدى. ا.ياساۋي بابامىزدىڭ كەسەنەسىنىڭ جانىندا تۇركى الەمىنىڭ رۋحاني استاناسىندا قىزمەت ەتىپ جاتقانىمىزعا قۋانىشتىمىز.
بۇگىنگى كۇنى الەمنىڭ بىردە-بىر مەگاپوليسى بىرەگەي مازمۇنمەن تولتىرىلعان جانە سۇرانىسقا ساي كاسىبي ماماندار دايارلاۋدى دامىتۋدىڭ باعىتتارىن انىقتايتىن عىلىمي جانە ءبىلىم بەرۋ مەكەمەسى بولماسا، ەكونوميكالىق ورتالىق بولا المايدى. قازاقستان پرەزيدەنتى قاسىم-جومارت توقايەۆ بۇل ماسەلەگە، ياعني، ءبىلىم بەرۋ ساپاسىن ارتتىرۋعا، ونىڭ حالىقارالىق ستاندارتتارعا ساي بولۋىنا، عىلىم مەن ءبىلىمنىڭ ينتەگراسياسىنا باسا نازار اۋدارىپ وتىر. بۇل، اسىرەسە، تۇركى الەمىنىڭ مادەني-رۋحاني ورتالىعى بولۋ جانە تۇركىستان وبلىسىنىڭ ءبىلىم بەرۋ — عىلىمي حابى رەتىندە دامۋ مىندەتتەرى تۇرعان تۇركىستان قالاسى ءۇشىن وتە ماڭىزدى.
ۋنيۆەرسيتەتىمىزدىڭ ەرەكشە مارتەبە العانىنا ۇجىمنىڭ، ارداگەر ۇستازدار اتىنان العىس ءبىلدىرىپ، قۇتتىقتاۋ ءسوزىن العان ۋنيۆەرسيتەت ارداگەرلەر كەڭەسىنىڭ ءتوراعاسى بالعاباي ناكيپوۆ:
— بۇگىن ۋنيۆەرسيتەتىمىزدە ۇلكەن قۋانىشتى كۇن. ولاي دەيتىنىم، مەملەكەت باسشىسىنىڭ جارلىعىمەن وقۋ وردامىز ەرەكشە مارتەبەگە يە بولدى. بۇل ءبىزدىڭ كوپتەن كۇتكەن جاڭالىعىمىز بولاتىن. مىنە، وسى ەرەكشە مارتەبەگە بولاتبەك سەرىكباي ۇلىنىڭ باسشىلىعىمەن جەتىپ وتىرمىز. العاش كەلگەن كەزدە الدىڭعى قاتارلى وقۋ ورىندارىنىڭ قاتارىنا كوتەرىلىمىز دەگەن ءسوزىن ىسپەن دالەلدەپ وتىر. سىزگە، ارداگەر- ۇستازدارىمىزدىڭ اتىنان العىسىمدى بىلدىرەمىن. ۋنيۆەرسيتەتتە 186 ارداگەر-ۇستاز بار، ونىڭ 83ء-ى قىزمەتىن جالعاستىرىپ كەلە جاتىر. ولاردىڭ بارلىعى دەرلىك عىلىمي دارەجەلى ۇستازدار. ارداگەر-ۇستازدار ۋنيۆەرسيتەتتىڭ وركەندەۋىنە قىزمەت ەتە بەرەمىز. ۇجىمنىڭ ىنتىماعى ارتىپ، بىرلىگى نىعايا بەرسىن. بۇگىنگى كۇننىڭ قۋانىشى قۇتتى بولسىن! — دەپ تىلەگىن جەتكىزدى
.
ۋنيۆەرسيتەتتىڭ ەرەكشە مارتەبەسى وعان ۇلكەن اكادەميالىق جانە باسقارۋشىلىق دەربەستىك بەرە وتىرىپ، Ph.D. فيلوسوفيا دوكتورى مەن سالا بويىنشا دوكتور دارەجەسىن تاعايىنداۋعا، ءبىلىم بەرۋ باعدارلامالارىنىڭ مازمۇنىن انىقتاۋعا جانە جەكە ۇلگىدەگى ديپلومداردى بەرۋگە مۇمكىندىك جاسايدى. ءبىلىم بەرۋ گرانتىنىڭ قۇنى دا ارتاتىن بولادى. بۇل پروفەسسورلىق-وقىتۋشىلىق قۇرامنىڭ جالاقىسىن ارتتىرۋعا جانە ماتەريالدىق-تەحنيكالىق قامتاماسىز ەتۋدى جاڭارتۋعا مۇمكىندىك بەرەدى. بۇل شارالاردىڭ بارلىعى ۋنيۆەرسيتەتكە عىلىمي جانە پەداگوگيكالىق كادرلاردى تارتۋعا، وسى ايماقتىڭ دامۋىنا سەرپىن بەرىپ، ونىڭ الدىنا قويىلعان ماقساتتارعا جەتۋگە ىقپال ەتەتىن بولادى.
ۋنيۆەرسيتەت 1992 جىلى ەلباسى ن.ءا.نازاربايەۆتىڭ باستاماسىمەن قازاقستاننىڭ ەجەلگى قالاسى تۇركىستاندا قۇرىلدى، بۇگىندە قازاقستانداعى بىرەگەي حالىقارالىق ۋنيۆەرسيتەت بولىپ تابىلادى. ۋنيۆەرسيتەت حالىقارالىق كورپوراتيۆتىك باسقارۋدىڭ بىرەگەي جۇيەسىنە — ۇكىمەتارالىق وكىلەتتى كەڭەسكە، سەناتقا جانە باسقارۋشى كەڭەسكە يە. ءبىلىم بەرۋ قازاق، تۇرىك، ورىس جانە اعىلشىن تىلدەرىندە جۇرگىزىلەدى.
سۋرەتتەر مەن اقپاراتتار http://ayu.edu.kz سايتىنان الىندى.
