قازاقستان حالقى اسسامبلەياسى 1995 جىلعى 1 ناۋرىزدا كونسۋلتاتيۆتىك-كەڭەسشى ورگان رەتىندە قۇرىلدى.
قازاقستان حالقى اسسامبلەياسىن قۇرۋ يدەياسى العاش رەت 1992 جىلى ەل تاۋەلسىزدىگىنىڭ 1 جىلدىعىنا ارنالعان قازاقستان حالقىنىڭ ءبىرىنشى فورۋمىندا جاريالاندى.
وسى جىلدار ارالىعىندا اسسامبلەيا قارقىندى دامىپ، ەلەۋلى وزگەرىستەردى باستان كەشىردى. ونىڭ دامۋى بارىسىندا ەتنوسارالىق تولەرانتتىلىق جانە قوعامدىق كەلىسىمنىڭ قازاقستاندىق ۇلگىسى قالىپتاستى. بۇگىندە اسسامبلەيا مەملەكەت باسشىسى ءتوراعالىق ەتەتىن كونستيتۋسيالىق ورگان بولىپ تابىلادى.
ەلىمىزدەگى بارلىق ەتنوستار اراسىنداعى شىنايى كەلىسىم مەن بىرلىكتە تۇرمىس كەشۋى، ەڭ الدىمەن، قازاق حالقىنىڭ ءاتا-داستۇرى مەن كەڭپەيىلدىگى، ۇلتتىق ءدىلىنىڭ كەڭدىگى - ورتاق ءۇيىمىز قازاقستاندعى بەيبىتشىلىك پەن تۇراقتىلىقتىڭ كەپىلى ەكەندىگىنە داۋ جوق.
اسسامبلەيا قالاي قۇرىلدى؟
دەگەنمەن قازاقستان تاۋەلسىزدىك العان كەزەڭدە، ەل باسشىلىعى الدىندا حالىقتىڭ كەلىسىمىن ساقتاپ قالۋ، قوعامنىڭ بارلىق كۇش-الەۋەتىن ءبىر ماقساتقا جۇمىلدىرۋ باستى نازاردا بولدى. سەبەبى 100-دەن استام ەتنوس وكىلدەرىنىڭ باسىن بىرىكتىرمەسە، «باس-باسىنا بي بولىپ»، ءارقايسىسى «كورپەنى وزىنە تارتۋ ءۇردىسى» باستالار ەدى. سونىمەن قاتار ساياسي كۇشتەر دە بۇل جاعدايدى ءوز پايدالارىنا جاراتار ەدى.
قازاقستانداعى بارلىق ەتنوس وكىلدەرىنىڭ مۇددەسىن قامتاماسىز ەتۋشى ۇيىم قۇرۋ تۋرالى يدەيانى العاش رەت ق ر تۇڭعىش پرەزيدەنتى نۇرسۇلتان نازاربايەۆ 1992 جىلدىڭ جەلتوقسانىندا وتكەن قازاقستان حالقىنىڭ ءبىرىنشى فورۋمىندا ايتتى. القالى جيىندا مەملەكەت باسشىسى بايانداما جاساپ، قازاقستان دامىعان ەلدەر قاتارىنا قوسىلىپ، ەل تۇرعىندارى تابىستى، ءال-اۋقاتى جوعارى تۇرمىستا ءومىر ءسۇرۋ دەڭگەيىنە جەتۋ ءۇشىن حالىقتىڭ ىنتىماعى، بىرلىگى مەن تاتۋلىعىنىڭ نەگىزگى ءرول اتقاراتىنىن ەرەكشە اتاپ ءوتتى. وسىلايشا، 1995 جىلعى ناۋرىز ايىندا قازاقستان رەسپۋبليكاسىنىڭ پرەزيدەنتى جانىنان كونسۋلتاتيۆتى-كەڭەستىك ورگان رەتىندە قازاقستان حالقى اسسامبلەياسى قۇرىلدى.
قازىرگى تاڭدا اسسامبلەيا ەتنوسارالىق جانە كونفەسسياارالىق قاتىناستار سالاسىنداعى مەملەكەتتىك ساياساتتى جۇزەگە اسىرۋشى ماڭىزدى قۇرالعا اينالىپ، ەلىمىزدە تۇرمىس كەشىپ وتىرعان بارلىق ەتنوستاردىڭ ءوزارا تەڭ قۇقىقتى قاتىناسىن قامتاماسىز ەتۋشى الاڭ ءرولىن اتقارۋدا. وسى ۋاقىتتار ارالىعىندا اتالعان قۇرىلىم قوعامداعى تۇراقتىلىقتى ساقتاۋشى قۇرالعا اينالعانىن ۋاقىتتىڭ ءوزى دالەلدەپ وتىر. اسسامبلەيانىڭ نەگىزگى باعىتى ەلىمىزدى مەكەندەگەن بارلىق ۇلتتار مەن ۇلىستاردى ورتاق ماقساتقا جۇمىلدىرۋ بولىپ تابىلادى.
اتالعان بەدەلدى ۇيىمنىڭ ومىرشەڭدىگىنىڭ ەڭ باستى ەرەكشەلىگى – ول ەتنوستىق توپتاردىڭ قىزمەتىن باقىلاۋمەن اينالىساتىن قاراپايىم ۇيىمعا عانا اينالىپ قويماي، سونىمەن قاتار ەلىمىزدەگى بارلىق ۇلت پەن ۇلىستىڭ مۇددەلەرىن ءبىر ارناعا توعىستىرۋشى، بارلىق ازاماتتاردىڭ ەتنوستىق، ءدىني ەرەكشەلىكتەرىنە قاراماستان قۇقىعى مەن بوستاندىعىن ساقتاۋشى تولىققاندى ساياسي ينستيتۋتقا اينالۋىندا.
قالىپتاسۋ كەزەڭدەرى
جالپى الاتىن بولساق، قازاقستان حالقى اسسامبلەياسىنىڭ قالىپتاسۋى بىرنەشە كەزەڭنەن تۇرادى.
ءبىرىنشى كەزەڭ – 1995-2002 جىلدار ارالىعى. سوڭعى قابىلدانعان جاڭا كونستيتۋسيادا مەملەكەتتىك تۇعىردىڭ باسىم باعىتتارى دەپ جالپى ازاماتتىق قاعيداتتار تولىقتاي قاراستىرىلدى. ەسكى اتا زاڭداعى قازاقستاندىقتاردى بايىرعى ۇلت جانە كەيىننەن قونىس اۋدارعان ەتنوستار دەپ ەكىگە ءبولۋ قىسقارتىلىپ، مەملەكەتتىك ءتىل رەتىندە قازاق ءتىلى جاريالاندى. اتالعان ماسەلەلەر قوعامنىڭ بىرىگۋىن جەدەلدەتىپ، جۇرتشىلىق تاراپىنان تولىقتاي قولداۋعا يە بولدى. جاڭا كونستيتۋسيا زاڭنامالىق دەڭگەيدە ەتنوستاردىڭ ۇلتىنا، تىلىنە، دىلىنە، دىنىنە، ناسىلىنە قاراماستان تەڭ قۇقىقتىلىقتى قامتاماسىز ەتتى.
وسىلايشا قازاقستان حالقى اسسامبلەياسىنىڭ بىرىكتىرۋشى كۇشى، ەلىمىزدەگى بارلىق ەتنوستاردى جۇمىلدىرۋشى قاسيەتى مەملەكەتتىك ۇلتتىق ساياساتتىڭ باستى تۇعىرىنا اينالدى. اسسامبلەيا ەتنومادەني بىرلەستىكتەردى دامىتا وتىرىپ، ساياسي، قۇقىقتىق جانە مادەني باعىتتا قازاقستاندىق جاڭا ۇلگىنى تاجىريبەگە ەنگىزدى.
اسسامبلەيا توتاليتارلىق «بىركەلكىلىك» جۇيەسىنەن شىققان ەتنوستاردىڭ ءداستۇرى، ءتىلى مەن مادەنيەتىن قالپىنا كەلتىرۋگە، دامىتۋعا تولىق جاعداي جاسالۋىنا كۇش سالىپ، حالىق ىقىلاسىنا بولەندى. وسىلايشا، «سانالۋاندىق ارقىلى بىرلىككە» دەگەن باعىتتا دامىعان ەتنوسارالىق قاتىناستىڭ قازاقستاندىق ۇلگىسى قالىپتاستى.
ەكىنشى كەزەڭ – 2002 جىلدان باستاپ قازىرگى ۋاقىتقا دەيىن – قوعامدى جۇمىلدىرۋ كەزەڭى دەپ سانالادى. قازاقستان حالقى اسسامبلەياسى ەل ەكونوميكاسىنىڭ قايتا تۇلەپ، تۇراقتى دامۋ قارقىنىنا ىلەسۋى، قوعامدى دەموكراتيالاندىرۋ ۇدەرىستەرىنىڭ جەدەل دامۋى كەزەڭىندە ماڭىزدى قوعامدىق-ساياسي ماسەلەلەردى شەشۋدە الدىڭعى قاتاردان كورىندى. قازاقستان حالقى اسسامبلەياسىنىڭ مەملەكەتتىك دامۋدىڭ كوپتەگەن ماسەلەلەرىنە ارالاسۋى ەتنوستىق نەگىزدە پارتيالار قۇرۋ، ەتنوسارالىق قاتىناستار سالاسىن ساياساتتاندىرۋدان ساقتاۋعا نەگىز بولدى. بۇل كەزەڭ ارالىعىندا ورتا مەرزىمگە ارنالعان قازاقستان حالقى اسسامبلەياسىنىڭ ستراتەگياسى، تىلدەردى دامىتۋدىڭ مەملەكەتتىك باعدارلاماسى، «قوعامدى جۇمىلدىرۋ يدەياسى – قازاقستان دامۋىنىڭ شارتى رەتىندە» كونسەپسياسى قابىلدانىپ، جۇزەگە اسىرىلىپ جاتىر.
2007 جىلى جۇرگىزىلگەن كونستيتۋسيالىق رەفورمالاردىڭ ارقاسىندا قازاقستان حالقى اسسامبلەياسى جاڭا كونستيتۋسيالىق مارتەبەگە يە بولىپ، ەلىمىزدىڭ باس زاڭ شىعارۋشى ورگانىنا ءوز وكىلدەرىن سايلاۋ قۇقىعىن يەلەندى. وسى جىلى اسسامبلەيا اتىنان پارلامەنت ماجىلىسىنە دەپۋتاتتار سايلانىپ، ەلىمىزدەگى ەتنوسارالىق قاتىناستاردى نىعايتۋدا بۇگىنگى كۇندە ناتيجەلى ەڭبەك ەتۋدە. ولار 60-قا جۋىق زاڭ جوباسىن ازىرلەۋگە قاتىستى؛ ازاماتتار كوتەرگەن ماسەلەلەر بويىنشا مەملەكەتتىك ورگاندارعا جۇزدەگەن حاتتار جولداندى، اسسامبلەيا تۋرالى زاڭنامالىق قۇجاتتىڭ جوباسىن ازىرلەدى. قازاقستان حالقى اسسامبلەياسى ءۇشىن 2008 جىل وتە ماڭىزدى، ناتيجەلى جىل بولدى – اسسامبلەيانىڭ بەيبىتشىلىك پەن كەلىسىمدى نىعايتۋ باعىتىنداعى ءرولىن ءنورماتيۆتى-قۇقىقتىق تۇرعىدا ۇيلەستىرەتىن «قازاقستان حالقى اسسامبلەياسى تۋرالى» زاڭ قابىلداندى.
ءبىر شاڭىراق استىنداعى تاتۋلىق
قازىرگى تاڭدا ەلىمىزدە 600-دەن استام ەتنومادەني بىرلەستىك، 4 ۇلتتىق تەاتر، دوستىق ۇيلەرى جانە 195 جەكسەنبىلىك مەكتەپ جۇمىس ىستەيدى، ەتنوس تىلدەرىندە 35 گازەت-جۋرنال باسىلىپ شىعادى.
قازاقستان حالقى اسسامبلەياسى ەتنوسارالىق قاتىناس سالاسىنىڭ بارلىق ماسەلەسىنە دەن قويىپ، مەملەكەتتىك ورگاندارمەن بەلسەندى قارىم-قاتىناستا جۇمىس ىستەپ وتىر. وسى ورايدا ءبىلىم جانە عىلىم، ىشكى ىستەر مينيسترلىكتەرىمەن بىرلەسكەن ءىس-شارالار جوسپارى بەكىتىلىپ، مادەنيەت جانە اقپارات، سىرتقى ىستەر، ادىلەت مينيسترلىكتەرىمەن ءبىرقاتار باعىتتار بويىنشا ناقتى شارالار اتقارىلۋدا. ۇلتتىق اكادەميالىق كىتاپحانا جانىنان اسسامبلەياعا ارنالعان دەپوزيتاريي اشىلدى.
اسسامبلەيا جانىنان دۇنيەگە كەلگەن كەلەسى ءبىر ءىرى جوبا – قوعامدىق قور. اتالعان قور ەلىمىزدەگى تۇراقتىلىق پەن كەلىسىمدى نىعايتۋعا باعىتتالعان ءار ءتۇرلى جوبالاردى قارجىلاندىرۋمەن اينالىسۋدى ماقسات ەتكەن.
ەلىمىزدىڭ ءار وڭىرلەرىندە قازاقستان حالقى اسسامبلەياسىنىڭ باستاماسىمەن مەملەكەتتىك ساياسات پەن ەلىمىزدىڭ قوعام بىرلىگىن نىعايتۋ باعىتىنداعى ماقسات-مىندەتتەرىن حالىققا تۇسىندىرۋمەن اينالىساتىن ارنايى اقپاراتتىق-ناسيحات توپتارى قۇرىلىپ، ناتيجەلى ەڭبەك ەتۋدە. بۇگىنگى تاڭدا 500-گە جۋىق ادام ەل ىشىندە ۇگىت- ناسيحاتتا جۇمىستارىن جۇرگىزۋدە.
حالىق بىرلىگى – مەملەكەتتىلىك نەگىزى. قوعامدىق بىرلىكتى تۋ ەتىپ، قازاقستاندى بولاشاعى كۇشتى، وركەندەپ، دامىعان ەل قاتارىنا قوسۋدا اسسامبلەيانىڭ اتقارىپ وتىرعان ءرولى وراسان.
اسسامبلەيا بارلىق سالادا بەلسەندى
پرەزيدەنت قاسىم-جومارت توقايەۆ اسسامبلەيا جۇمىسىنا ەرەكشە ءمان بەرىپ كەلەدى.
"اسسامبلەيا – كەيبىر ادامدار ايتىپ جۇرگەندەي، جاساندى ۇيىم ەمەس. اسسامبلەيا – ەل بىرلىگىن ءىس جۇزىندە ورنىقتىرا تۇسەتىن ءتيىمدى قۇرىلىم. بۇگىندە بۇل – كونستيتۋسيالىق مارتەبەسى بار ماڭىزدى قوعامدىق ورگان. اسسامبلەيا وتە اۋقىمدى قايىرىمدىلىق شارالارىن دەر كەزىندە جانە جەدەل ۇيىمداستىرىپ كەلەدى. مۇنىڭ ءبارى كوپ جىلدىق جۇيەلى جۇمىستىڭ ناتيجەسى ەكەنى ءسوزسىز. اسسامبلەيا دۇنيەگە كەلگەن جىلدان بەرى اتقارعان قىزمەتى مەن ءجۇرىپ وتكەن سارا جولى قازاقستاندىق ەتنوسارالىق جانە كونفەسسياارالىق كەلىسىم ۇلگىسى الەمدىك قاۋىمداستىق الدىندا بەدەلدى ۇيىمداردىڭ ءبىرى بولىپ، ەل قوعامىنىڭ قۇرامداس بولىگىنە اينالدى"، - دەگەن ەدى مەملەكەت باسشىسى.
اسسامبلەيا ەلىمىزدىڭ بارلىق سالالارىندا بەلسەندى جۇمىس اتقارۋدا. اسىرەسە ۇيىمنىڭ جاستارى وتە بەلسەندى. مۇنداي پىكىردى ق ر پرەزيدەنتى جانىنداعى قسزي ساياسي زەرتتەۋلەر ءبولىمىنىڭ باس ساراپشىسى دۋلات وتەعالي دا راستايدى. ونىڭ ايتۋىنشا وتباسى ينستيتۋتىن ساقتاۋعا اسسامبلەيا جانىندا «اقساقالدار كەڭەسى» مەن انالار كەڭەسىنىڭ ءرولىن ەرەكشە.
«انالار كەڭەسى جالپى 252،5 مىڭنان استام ادامنىڭ قاتىسۋىمەن 6 مىڭنان استام ءىس-شارا وتكىزگەن. سونىمەن بىرگە، قازاقستاننىڭ بارلىق وڭىرلەرىندە مىڭنان استام ەتنومادەني بىرلەستىكتەر جۇمىس ىستەيدى جانە قحا جۇمىسىن ۇيلەستىرەتىن جانە قامتاماسىز ەتەتىن 34 دوستىق ءۇيى بار. بۇل قازىرگى كەزدە اسسامبلەيا قۇرىلتاي بارىسىندا ايقىندالعان جالپىعا ورتاق قۇندىلىقتاردى، نەگىزگى يدەولوگەمالاردى قازاقستاندىق قوعامدا كەڭىنەن ناسيحاتتاۋ جانە تاراتۋ الەۋەتىنە يە ەكەنىن كورسەتەدى»، - دەيدى دۋلات وتەعالي.
بۇعان قوسا «جاستار اسسامبلەياسى» ۇيىمى دا وتە بەلسەندى. اتالعان جاستار ۇيىمنىڭ قاتارىندا 9 مىڭنان استام استام ادام بار. «جاستار اسسامبلەياسى» قوعامدىق ۇيىمنىڭ ءتوراعاسى تيمۋر جۇمىربايەۆتىڭ سوزىنشە، بۇل ناعىز پاتريوتتار. ولار وزدەرىنىڭ كۇندەلىكتى قوعامدىق جۇمىستارى ارقىلى ۇلت بىرلىگىن نىعايتۋعا ولشەۋسىز ۇلەس قوسىپ ءجۇر. جاستار ءبىلىم مەن عىلىمدى دامىتۋدا، قوعامدى ىزگىلەندىرۋدە، تازالىق ساقتاۋدا، قايىرىمدىلىق جاساۋدا جانە باسقا دا سالالاردا الدىڭعى شەپتەن كورىنەدى. جالپى «جاستار اسسامبلەياسى» قحا تىنىسى مەن اۋقىمىن كەڭەيتە تۇسۋدە.
قحا-نىڭ جاڭا ميسسيالارى
قحا قۇرىلعان كەزەڭنەن باستاپ اتاپ ايتقاندا كونسۋلتاتيۆتىك-كەڭەسشى ورگاننان قازاقستان قوعامىنىڭ مۇددەلەرىن زاڭدى قورعاي الاتىن مىعىم ينستيتۋتقا اينالدى. ۇستىمىزدەگى جىلى ءساۋىر ايىندا وتكەن قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا مەملەكەت باسشىسى قاسىم-جومارت توقايەۆ اسسامبلەيانىڭ جاڭا 3 باعىتىن ايقىندادى. پرەزيدەنتتىڭ اتالعان جيىندا ايتقان سوزىنە سۇيەنىپ ايتاتىن بولساق، ءبىرىنشى اسسامبلەيا جۇمىسىن ەلىمىزدىڭ جاڭا گۋمانيتارلىق يدەولوگيالىق دوكتريناسىمەن ۇيلەستىرۋ قاجەت. اتىراۋدا ناۋرىز ايىندا وتكەن ۇلتتىق قۇرىلتايدا تاۋەلسىزدىك جانە وتانشىلدىق، بىرلىك جانە ىنتىماق، ادىلدىك پەن جاۋاپكەرشىلىك، زاڭ جانە ءتارتىپ، ەڭبەكقورلىق پەن كاسىبيلىك، جاسامپازدىق پەن جاڭاشىلدىق دەگەن سياقتى ۇعىمدارعا ايىرىقشا ءمان بەرىلگەن. اسسامبلەيا وسى اتالعان قاعيداتتاردى ورنىقتىرۋ ىسىندە اسسامبلەيا باستى ءرول اتقارۋعا ءتيىس.
ەكىنشى، قازىرگى كەزدە الەمدىك كاتاكليزم بەلەڭ الىپ، كوپتەگەن ەلدەردە اراسىندا تۇراقسىزدىق، ءدىن، ۇلت ارالىق قاقتىعىستار بەلەڭ الۋدا. سوندىقتان ىشكى تۇراقتىلىق پەن بىرلىكتى ساقتاۋ، سىرت كوزدەردىڭ ارانداتۋشىلىعىنا ءتۇسىپ قالماۋ، ەلدەگى تۇراقتىلىق پەن تىنىشتىقتى نىعايتا ءتۇسۋ اسا ماڭىزدى. بۇل باعىتتا دا اسسامبلەيانىڭ ميسسياسى وراسان، مۇنى دا پرەزيدەنت باسا ايتا كەلە: «...ءبىزدىڭ مىندەتىمىز – قوعامدا ءوزارا قۇرمەت پەن سەنىمدى نىعايتا ءتۇسۋ. سونداي-اق ءدىني، ايماقتىق نەمەسە الەۋمەتتىك-ەكونوميكالىق الشاقتىقتى بولدىرماۋ ءۇشىن بارشاعا ورتاق جاڭا قاعيداتتار مەن ۇستانىمدار ويلاستىرۋ. اسسامبلەيانىڭ وسى كۇردەلى ماسەلەگە بايلانىستى اتقارىپ جاتقان قىزمەتى ايرىقشا ماڭىزدى»، - دەدى.
ءۇشىنشى، اسسامبلەيانىڭ ينستيتۋسيونالدىق الەۋەتىن نىعايتۋ قاجەتتىگى. مەملەكەت باسشىسى «اسسامبلەيا مەملەكەتتىك شەشىم قابىلداۋ ۇدەرىسىنە جانە رەفورمالاردى ىلگەرىلەتۋ ىسىنە بەلسەنە قاتىسۋى كەرەك. سوندىقتان ونىڭ عىلىمي-ساراپتامالىق الەۋەتىن دامىتۋ قاجەت. ەتنو-الەۋمەتتىك شيەلەنىس وشاقتارىن انىقتاۋعا جانە ونداي وقيعالاردىڭ الدىن الۋعا باسا ءمان بەرىلۋگە ءتيىس»، - دەدى.
سونىمەن قاتار اسسامبلەيانىڭ بىرلىك، تىنىشتىق پەن ەتنوساراالىق تاتۋلىقتى نىعايتۋدان بولەك، قايىرىمدىلىق جاساۋ، قوعامدى ىزگىلەندىرۋ باعىتىنداعى اسا اۋقىمدى جۇمىستارىن ەرەكشە ايتا كەتكەن ءجون. كوكتەمدە بولعان تاسقىن اپاتى كوپشىلىك ءۇشىن سىناق بولدى. وسى قيىن ساتتە قازاقستان حالقى اسسامبلەياسى ءبىر جاعادان باس، ءبىر جەڭنەن قول شىعارىپ، وزدەرىنىڭ مىقتى دامىپ كەلە جاتقان اۋقىمدى قوعامدىق ۇيىم ەكەنىن تاعى دا ءبىر دالەلدەدى. بۇل جاعدايعا دا پرەزيدەنت جوعارىدا اتالعان جيىندا ەرەكشە توقتالىپ ءوتتى.
«جۇرتقا جان-جاقتى كومەك بەرۋ ءۇشىن دەرەۋ اسسامبلەيانىڭ رەسپۋبليكالىق جانە ايماقتىق شتابتارى قۇرىلدى. «جۇرەكتەن جۇرەككە» دەگەن اۋقىمدى اكسيا جۇرگىزىلىپ جاتىر. اپات ايماقتارىنا 1500 توننادان استام ازىق-تۇلىك جانە ەڭ قاجەتتى تاۋارلار جولداندى. ونىڭ جالپى سوماسى شامامەن 770 ميلليون تەڭگە بولدى. سۋ تاسقىنىمەن كۇرەسكە ەتنومادەني بىرلەستىكتەردىڭ 12 مىڭعا جۋىق وكىلى قوسىلدى. ولار قايىرىمدىلىق جانە گۋمانيتارلىق كومەك جيناۋعا جۇمىلدى. سونداي-اق جۇرتتى قاتەردەن حاباردار ەتۋگە جانە ءقاۋىپسىز جەرگە كوشىرۋگە اتسالىستى. مۇنىڭ ءبارى – ءوزارا جاناشىر جانە تىلەۋلەس بولۋدىڭ ايقىن كورىنىسى»، - دەدى قاسىم-جومارت توقايەۆ.
P.S. كەلەسى جىلى قازاقستان حالقى اسسامبلەياسىنىڭ قۇرىلعىنىنا 30 جىل تولادى. وسى 30 جىلدا اسسامبلەيا ۇلكەن دامۋ كەزەڭدەرىنەن ءوتتى. ءتۇرلى رەفورمالاردى باستان وتكەردى. وسى جىلدار ىشىندە تۇراقتىلىق پەن تاتۋلىقتىق قازاقستاندىق ۇلگىسىن جاساۋعا بەرىك ىرگەتەس قالادى.
اۆتورى: مارا كەلەس
