بۇگىن فۋتزالدان قازاقستان ۇلتتىق قۇراماسى وزبەكستاندا ءوتىپ جاتقان الەم چەمپيوناتىنىڭ شيرەك فينالىندا 2016 جىلعى جاھاندىق دودانىڭ جەڭىمپازى – ارگەنتينا فۋتزالشىلارىمەن وينايدى. ماچ ەلوردا ۋاقىتىمەن ساعات 20:00-دە باستالادى. ويىن تاشكەنتتەگى «حۋمو ارەنا» سپورت كەشەنىندە وتەدى.
قازاقستان قۇراماسى الەم بىرىنشىلىگىنىڭ توپتىق كەزەڭىندە يسپانيا، جاڭا زەلانديا جانە ليۆيا قۇرامالارىمەن D توبىندا وينادى. ءۇش تۋردا 7 ۇپاي جيناپ، توپتان ەكىنشى ورىنمەن پلەي-وفف كەزەڭىنە جولداما الدى. 1/8 فينالدا 2021 جىلعى الەم چەمپيوناتىنىڭ جەڭىمپازى پورتۋگاليا قۇراماسىنان باسىم ءتۇسىپ (2:1)، شيرەك فينالعا جولداما الدى.
ارگەنتينا فۋتزالشىلارى س توبىندا ۋكراينا، اۋعانستان جانە انگولا قۇرامالارىمەن سىنعا ءتۇسىپ، 9 ۇپايمەن ءوز توبىندا كوش باستادى. ال پلەي-وفف كەزەڭىندە حورۆاتيانى 2:0 ەسەبىمەن جەڭىپ، شيرەك فينالدا قازاقستانعا قارسىلاس اتاندى.
قازاقستان مەن ارگەنتينا فۋتزالشىلارى بۇگىنگە دەيىن ەكى مارتە كەزدەسىپ، ەكى قۇراما ءبىر-بىر مارتەدەن جەڭىسكە جەتكەن. 2016 جىلعى الەم چەمپيوناتىنىڭ توپتىق كەزەڭىندەگى العاشقى ويىندا ارگەنتينالىقتار 1:0 ەسەبىمەن جەڭىسكە جەتسە، جۋىردا عانا الماتىدا ۇيىمداستىرىلعان جولداستىق كەزدەسۋدە ءبىزدىڭ جىگىتتەر 3:2 ەسەبىمەن باسىم ءتۇستى.
ايتا كەتسەك، فۋتزالدان قازاقستان ۇلتتىق قۇراماسى 2016 جىلعى ەۋروپا چەمپيوناتىنىڭ قولا، ازيا چەمپيوناتىنىڭ كۇمىس جانە قولا جۇلدەگەرى (1999، 2000). 2021 جىلى ليتۆادا وتكەن الەم چەمپيوناتىندا 4-ورىن الدى. سونداي-اق قاتارىنان ءتورتىنشى مارتە الەم چەمپيوناتىنا قاتىسىپ كەلەدى (2000، 2016، 2021 جانە 2024).
