قازاقستان مۇسىلماندارىنىڭ ءدىني باسقارماسى كوپشىلىككە ۇندەۋ جولدادى.
«وزدەرىڭىز كوز جەتكىزىپ وتىرعانداي، ەلىمىزدە توتەنشە جاعداي مەرزىمى اياقتالعانىمەن، جۇقپالى ىندەتتىڭ ءقاۋپى تولىق سەيىلگەن جوق. بۇل – كارانتين رەجيمىنىڭ تالاپتارىنا باعىنىپ، ساقتىق شارالارىنا اسا ءمان بەرۋىمىز قاجەت دەگەن ءسوز. قازاقستان مۇسىلماندارى ءدىني باسقارماسى باس سانيتارلىق دارىگەردىڭ كارانتيندىك رەجيمنىڭ كەزەڭدىك تالاپتارىن ساقتاۋ بويىنشا قاۋلىسىن نەگىزگە الىپ جانە قازىرگى جاعدايدى ەسكەرە كەلە، جاماعاتپەن وقىلاتىن بەس ۋاقىت، جۇما، تاراۋىق نامازدارىنا قاتىستى قويعان ۋاقىتشا شەكتەۋدى ءوز كۇشىندە قالدىردى. كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى جەدەل شتابتىڭ قاۋلىسىنا سايكەس وسىنداي شەشىم قابىلداندى. ال جاماعاتپەن وقىلاتىن نامازداردىڭ مەرزىمىن الداعى ۋاقىتتا قوسىمشا حابارلايمىز» دەلىنگەن ۇندەۋدە.
بيىلعى رامازاننىڭ قاسيەتتى ءقادىر كەشى مامىر ايىنىڭ 19-نان 20-نا قاراعان تۇنگە سايكەس كەلىپ وتىر. 19 مامىردا مەشىت تاڭعى ساعات 07:00 مەن كەشكى 20:00 ارالىعىندا جۇمىس ىستەيدى.
«وسى رەتتە بارشاڭىزدى ءقادىر كەشىن ءوز ۇيلەرىڭىزدە وتكىزۋ قاجەتتىگىن قاپەرلەرىڭىزگە سالامىز. تارتىپكە باعىنۋدى سۇرايمىز. بۇل – ءسىز بەن ءبىزدىڭ، ءوز وتباسىمىز بەن ەڭ جاقىن تۋىستارىمىزدىڭ دەنساۋلىعى مەن ءومىرىنىڭ يگىلىگى ءۇشىن قابىلدانعان شەشىم. وسى ۇندەۋگە تۇسىنىستىك تانىتىپ، كارانتين تالاپتارىن ساقتايسىزدار دەگەن سەنىمدەمىز. وسى رەتتە بارشا قاۋىمدى قاسيەتتى ءقادىر تۇنىندە تۇركىستان وبلىسىنداعى تاسقىن سۋدان زارداپ شەككەن جەرلەستەرىمىزگە دۇعا جاساۋعا ۇندەيمىز» دەدى قمدب.
قازاقستان مۇسىلماندارى ءدىني باسقارماسى قاسيەتتى ءقادىر كەشىندە قۇران حاتىم دۇعاسىن، ۋاعىز-ناسيحات پەن پايدالى دارىستەردى ونلاين رەجيمدە وتكىزەدى. ۇيدە وتىرىپ، ونلاين رەجيمدە دۇعاعا قاتىسىپ، ناسيحات تىڭداۋعا تولىق مۇمكىندىك بار.
