.jpg)
ناۋرىز جاڭارۋ ايى. ۇلىستىڭ ۇلى كۇنى “قازاقستان” تەلەراديوكورپوراسياسى دا جاڭارىپ، كوكتەمگى ماۋسىمىن باستاماق. وسى تاقىرىپقا قاتىستى بۇگىن ورتالىق كوممۋنيكاسيالار قىزمەتىندە “قازاقستان” رترك اق باسقارما ءتوراعاسى ەرلان قارين ارنايى بريفينگ بەردى. «قازاقستان» كورپوراسياسىنىڭ قۇرامىنا كىرەتىن تەلەارنالاردىڭ كوكتەمگى ماۋسىمعا ارنالعان جاڭا جوبالارى مەن ديماش قۇدايبەرگەننىڭ استانادا وتەتىن كونسەرتىنە دايىندىق جۇمىستارى جايلى ايتىپ بەردى.
ەرلان ءقاريننىڭ ايتۋىنشا: «ءبىز تەك جاڭا جىلعا ەمەس، نەگىزگى مەرەكەلەرگە ارنايى ەفيرلىك كەستە دايىنداپ وتىرامىز، ونىڭ الدىندا تاۋەلسىزدىك مەيرامىنا دا ارنايى جوبالار ۇسىندىق. بيىلعى كوكتەمگى تەلەماۋسىمدا دا ۇلتتىق ارنا ناۋرىز مەرەكەسىنە ارنايى بىرنەشە جوبالار شىعارادى، ونىڭ ىشىندە «ناۋرىز-دۋمان» اتتى مەرەكەلىك جوبا، سونداي-اق، تۇركيا، قىرعىزستان، وزبەكستان ەلدەرى مەن وبلىستارى قاتىساتىن «قوش كەلدىڭ، ءاز ناۋرىز» حالىقارالىق تەلەكوپىرىن ورناتامىز. تەلەكوپىردە، تىكەلەي ەفير ارقىلى سول ەلدەردىڭ جانە ەلىمىزدىڭ ايماقتارىندا ناۋرىز مەرەكەسىن تويلاۋ ءداستۇرى جايلى سيۋجەتتەر مەن ارنايى سۇحباتتار ۇسىنىلادى.
سونىمەن قاتار، ادەتتەگىدەي بىرنەشە جاڭا جوبالار، دەرەكتى فيلمدەر مەن تەلەحيكايالار شىعادى. وزدەرىڭىز بىلەسىزدەر، ۇلتتىق ارنانىڭ باستى ماقساتتارىنىڭ ءبىرى كورەرمەن سۇرانىسىن ەسكەرە وتىرىپ، جاقسى تالعام قالىپتاستىراتىن باعدارلامالار جاساۋ، اسىرەسە وتاندىق تەلەحيكايالار ارقىلى ۇلتىمىزدىڭ تۇرمىس-سالتىن كورسەتىپ قانا قويماي، وقيعاداعى تاعدىرلار ارقىلى رۋحاني مادەنيەتىن قالىپتاستىرۋ.
13 ناۋرىزدان باستاپ، ۇلتتىق ارنا ەفيرىندە «توپىراققا تامعان تەر» اتتى جاڭا تەلەحيكايا شىعادى. تەلەحيكايادا ەڭبەك، تۋعان جەر، التىن بەسىك – اۋىل ءومىرى تەرەڭدەي كورىنىس تاپقان.
ال، 21 ناۋرىزدان باستاپ «EQUUS. جىلقى تاريحى» تريلوگياسى كورەرمەنگە جول تارتادى. «EQUUS» جىلقى جانۋارىنىڭ ادامزات تاريحىنداعى ءرولىن اشىپ، ورتالىق ازيادا جىلقىنىڭ شىعۋ تەگى تۋراسىنداعى جاڭالىقتاردى باياندايدى. سونىمەن قاتار، «الەمدىك دىندەر كوشباسشىلارىن بىرىكتىرگەن قازاقستان»، «الەكساندر كولياديننىڭ التىن سوقپاعى» اتتى دەرەكتى فيلمدەر ەفيرگە جول تارتادى.
ال، تەلەجوبالارعا كەلەر بولساق، 6 جاڭا جوبا مەن ارنانىڭ تۇراقتى باعدارلامالارى جاڭارتىلىپ شىعاتىن بولادى. ونىڭ اراسىندا جاستارعا ارنالعان «سەرپىن» باعدارلاماسى، جاڭا ساراپتامالىق «جاھان-ساراپ» جوباسى، قازاقتىڭ جاڭا ورىنداۋشىلارى مەن كومپوزيتورلارىن تانىستىراتىن «New qazaq wave» اتتى 4 ءبولىمدى كونسەرت تۇسىردىك، سونداي-اق «بەۋ» مۋزىكالىق توك-شوۋى، «كىم بىلگىر؟» ينتەللەكتۋالدىق جوباسى جانە «ءازىل-مازىر» جوباسى شىعاتىن بولادى. جاڭا كوكتەمگى تەلەماۋسىمدا ۇلتتىق ارنانىڭ تۇراقتى باعدارلامالارى، كورەرمەننىڭ كوزايىمىنا اينالعان: تاڭشولپان، اقپارات، اپتا، ماسەلە، مىنبەر، قارەكەت، شاڭىراق، شيپاگەر، دارا جول، پاراسات مايدانى، ۇلى دالا سازى، ايتىس، تۇنگى ستۋديا، قايىرلى كەش، قازاقستان باعدارلامالارى جالعاسىن تاپپاق.»
سونداي-اق، «Qazsport» تەلەارناسىنىڭ باستى جاڭالىقتارىنىڭ ءبىرى، الداعى ۋاقىتتا كورەرمەندەر فۋتبولدان ەۋروپانىڭ 5 ۇزدىك ۇلتتىق چەمپيوناتىنىڭ ەڭ قىزىقتى ماچتارىن تىكەلەي ەفيردە تاماشالاي الادى. سپورتسۇيەر قاۋىم 2019 جىلدىڭ 2-12 ناۋرىز ارالىعىندا رەسەيدىڭ كراسنويارسك قالاسىندا وتەتىن قىسقى ۋنيۆەرسيادا ويىندارىن تاماشالايتىن بولادى. سونىمەن قاتار، ءساۋىردىڭ 29-نان مامىردىڭ 5ء-ى ارالىعىندا استانادا وتەتىن حوككەيدەن حالىقارالىق ءتۋرنيردى دە «Qazsport» تەلەارناسى تىكەلەي ەفيردە كورسەتەتىن بولادى. الامان بايگەدە بەلارۋس، وڭتۇستىك كورەيا، ۆەنگريا، سلوۆەنيا جانە ليتۆا ەلىنەن كەلگەن حوككەيشىلەر ب ا ق سىناسادى. ايتا كەتەيىك، UEFA چەمپيوندار مەن ەۋروپا ليگاسىنىڭ ويىندارى دا تەلەارنا ەفيرىنەن جالعاسىن تاپپاق.
ال، «balapan» ارناسى 4 ناۋرىزدان باستاپ جاڭا جانە جاڭارتىلعان جوبالار ۇسىنباق. اتاپ ايتقاندا، تەلەارنا كونتەنتى تانىمدىق، ويىن-ساۋىقتىق، وتباسىلىق باعدارلامالارمەن تولىقتىرىلادى. بارلىق دۇنيەگە بالانىڭ كوزىمەن قاراي وتىرىپ، ولاردىڭ تاڭداۋىن، قالاۋىن ءتۇسىنۋ ارقىلى اتا-انا مەن بالانىڭ ارا-قاتىناسىن جاقسارتۋعا قۇرىلعان «بالامەن سۇحبات» اتتى جاڭا باعدارلاما ەفيرگە شىعادى. سونداي-اق، بۇلدىرشىندەرگە كوتەرىڭكى كوڭىل-كۇي سىيلايتىن «تاڭجارىق» ويىن-ساۋقتىق باعدارلاماسى جانە ءارتۇرلى تاقىرىپتا قىزىقتى مالىمەت الۋعا، ءتۇرلى ويىندار ارقىلى بالانىڭ زەيىنىن كوتەرىپ، حابارلاسقان كورەرمەنمەن كەرى بايلانىس ورناتۋعا مۇمكىندىك بەرەتىن «كىم تاپقىر» جوباسى تىكەلەي ەفيردە شىعاتىن بولادى.
«Tamasha tv» ارناسى دا ءوز كورەرمەندەرىنە جاڭا ماۋسىمدا جالپى سانى 14 جوبا ۇسىناتىن بولادى. اتاپ وتسەك، «كۇلتوبە»، «تamasha_Like»، «ءازىل-داستان» جانە ت.ب. جوبالار ەفيرگە جول تارتادى.
بريفينگ بارىسىندا ەرلان قارين 2019 جىلدىڭ 29 ماۋسىمىندا استانادا وتەتىن ديماش قۇدايبەرگەننىڭ «ارناۋ» اتتى شىعارماشىلىق كونسەرتىنىڭ دايىندىق جۇمىستارى جايىندا ايتىپ ءوتتى.
«وزدەرىڭىز بىلەتىندەي، «قازاقستان» كورپوراسياسىنىڭ
ۇيىمداستىرۋىمەن ديماش قۇدايبەرگەننىڭ «ارناۋ» اتتى شىعارماشىلىق كونسەرتىن قولعا الىپ وتىرمىز. قازىرگى ساتتە دايىندىق جۇمىستارى قىزۋ ءجۇرىپ جاتىر. بۇل اۋقىمدى جوباعا بىلىكتى مامانداردى تارتىپ وتىرمىز. كونسەرتتىڭ دەكوراسيا ەسكيزدەرى، تەحنيكالىق جابدىقتاۋ جۇمىستارى قاراستىرىلىپ وتىر، سەبەبى بۇل جوبا تەحنيكالىق تۇرعىدان كۇردەلى. شىعارماشىلىق جاعىنان ايتا كەتسەم، ءار نومەر ەكسكليۋزيۆتى بولادى. ازىرشە بۇل قۇپيا بولىپ قالا بەرمەك. ارنايى ەففەكتىلەر قولدانىلادى. بيلەتتىڭ ساتىلىمى الداعى ەكى اپتا ىشىندە باستالادى. ونى 3 كۇن بۇرىن حابارلايتىن بولامىز. »-دەدى ەرلان قارين. سونداي-اق قوعامدىق رەزونانس تۋدىرعان «جۋسان» وپەراسياسىنا قاتىستى جۋرناليستەردىڭ ساۋالىنا جاۋاپ بەرگەن ەرلان تىنىمباي ۇلى كوركەم ءفيلمنىڭ سەناريي دايىندالىپ قويعانىن، شىلدە-تامىز ايىندا ءتۇسىرىلۋ جۇمىستارى باستالاتىنىن جەتكىزدى.
