ەلباسى نۇرسۇلتان نازاربايەۆ وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆپەن تەلەفون ارقىلى سويلەستى. Elbasy.kz سايتىندا جاريالانعان اقپارعا قاراعاندا، نۇرسۇلتان نازاربايەۆ شاۆكات ميرزيەيەۆتى تۋعان كۇنىمەن قۇتتىقتاپ، زور دەنساۋلىق جانە مەملەكەتتىك قىزمەتىنە تولاعاي تابىس، ال باۋىرلاس وزبەكستان حالقىنا باق-بەرەكە تىلەگەن.
سونىمەن قاتار، سايتتاعى اقپاراتتا «تاراپتار سوڭعى جىلدارى قول جەتكىزىلگەن ۋاعدالاستىقتاردىڭ ارقاسىندا قازاقستان-وزبەكستان اراسىنداعى كوپقىرلى ىنتىماقتاستىق تىڭ سەرپىن الىپ، جاڭا ساپالى دەڭگەيگە كوتەرىلگەنىن اتاپ ءوتتى.
ءوزارا ساۋدا كولەمىنىڭ ارتۋىمەن جانە ەكونوميكالىق قاتىناستاردىڭ نىعايۋىمەن قاتار مادەني-گۋمانيتارلىق بايلانىستاردىڭ بەلسەندى دامىپ كەلە جاتقانىنا نازار اۋدارىلدى. اتاپ ايتقاندا، 2018 جىلى قازاقستانداعى وزبەكستان جىلى تابىستى ءوتتى، بيىل وزبەكستانداعى قازاقستان جىلى اياسىندا ءىس-شارالار وتكىزىلۋدە.
نۇرسۇلتان نازاربايەۆ پەن شاۆكات ميرزيەيەۆ كۇن تارتىبىندەگى وڭىرلىك ماسەلەلەردى دە تالقىلادى.
تاراپتار تاتۋ كورشىلىك رۋحىندا جانە ەكى ەل حالقىنىڭ يگىلىگى جولىندا دامىپ كەلە جاتقان قازاقستان-وزبەكستان ستراتەگيالىق قاتىناستارى ودان ءارى نىعايا تۇسەتىنىنە سەنىم ءبىلدىردى» دەپ جازىلعان.