بۇگىن سارسەنبىنىڭ ءساتى كۇنى ياعني 27ء-شى اقپان كۇنى «نۇر وتان» پارتياسىنىڭ كەزەكتى XVIII سەزى وتەدى. باس پارتيانىڭ 20 جىلدىعىنا وراي ۇيىمداستىرىلعان جيىندا پارتيالىق ورگانداردىڭ ەسەبى تىڭدالىپ، «نۇر وتاننىڭ» 2030 جىلعا دەيىنگى جاڭا باعدارلاماسى تالقىلانادى. سونىمەن قاتار، ساياسي ۇيىمنىڭ جارعىسىنا وزگەرتۋلەر مەن تولىقتىرۋلار ەنگىزىلىپ، پارتيا ساياسي كەڭەسىنىڭ قۇرامى جاڭارتىلادى.
پرەزيدەنت ۇكىمەتتى وتستاۆكاعا جىبەرۋگە قاتىستى ارنايى مالىمدەمەسىندە ۇكىمەتتىڭ جاڭا باسشىلىعى ءومىر ءسۇرۋ دەڭگەيىن ارتتىرۋعا، ەكونوميكانى ىنتالاندىرۋعا، ستراتەگيالىق مىندەتتەردى جۇزەگە اسىرۋعا باعىتتالعان ناقتى شارالار ازىرلەۋگە ءتيىس ەكەنىن نىعارلاي كەلە بىلاي دەگەن بولاتىن:
«مەن «نۇر وتان» پارتياسىنىڭ جاقىندا وتەتىن سەزىندە الەۋمەتتىك قولداۋدى كۇشەيتۋگە جانە ازاماتتاردىڭ تۇرمىس ساپاسىن ارتتىرۋعا ارنالعان ءبىرقاتار شارالار ۇسىنامىن. وسى ماقساتپەن بيۋدجەتتەن جانە ۇلتتىق قوردان قوماقتى قارجى بولىنەتىن بولادى.
بۇل قاراجات مىناداي مىندەتتەردى شەشۋگە باعىتتالادى:
- از قامتىلعان ازاماتتارعا الەۋمەتتىك قولداۋ كورسەتۋ ءىسىن كۇشەيتۋ.
- حالىقتىڭ الەۋمەتتىك تۇرعىدان ءالسىز توپتارىنىڭ باسپانا جاعدايىن جاقسارتۋ مۇمكىندىكتەرىن ارتتىرۋ.
- وڭىرلەردى دامىتۋ ساياساتىن تۇبەگەيلى وزگەرتۋ.
ۇكىمەت پەن بارلىق دەڭگەيدەگى اكىمدەردىڭ جۇمىسى وسى مىندەتتەردى جۇزەگە اسىرۋعا باعىتتالۋى ءتيىس.
ۇكىمەت پەن وڭىرلەردىڭ يەلىگىندەگى قاراجات كوزدەلگەن ماقساتقا ساي جۇمسالماي وتىر. مۇنىڭ بارىنە باقىلاۋ ورناتىلادى. وسى تاقىرىپتار جونىندە «نۇر وتان» پارتياسىنىڭ سەزىندە تولىعىراق ايتىلاتىن بولادى».
دەمەك، بۇل جولعى بيلىك پارتياسى قۇرىلتايىندا جاڭا ۇكىمەتكە قانداي مىندەتتەر جۇكتەلەتىنىن كورىپ، «نۇر وتان» پارتياسىنىڭ 2030 جىلعا دەيىن ارنالعان جاڭا باعدارلاماسىنىڭ مازمۇنىمەن تانىسامىز. قالاي بولعاندا دا، الەۋمەتتىك سالاعا باسىمدىق بەرىلەتىنى ءسوزسىز.
