ەل ىشىندە «قونايەۆ زامانىندا قازاق دالاسىندا ۇلكەن-كىشى 40 قالا بوي كوتەرگەن» دەيتىن دەرەك ايتىلىپ ءجۇر. حالىقتىڭ وسى 40 جىلدا ەڭبەككە ارالاسقان بىرنەشە بۋىننىڭ ەڭبەگىن ءبىر عانا ساياسي تۇلعانىڭ ەسىمىمەن بايلانىستىرىپ قابىلداۋىنىڭ ءوزى قونايەۆتىڭ مەملەكەت قايراتكەرى رەتىندەگى سالماعىنان حابار بەرەدى.
تۇلعانى جاقسى تانىپ، جاقىن ارالاسقان ادامداردىڭ ءبارى ەستەلىكتەرىندە ونىڭ قىزمەتتەگى لاۋازىمىن باس پايداسىنا، ماتەريالدىق جاعدايىن قامسىزداندىرۋعا پايدالانباعانىن ەرەكشە اتايدى. قىزمەتتەن بوساعاننان كەيىن شىن مانىندە قاراپايىم زەينەتكەردىڭ كۇنكورىس دەڭگەيىمەن بىردەي تۇرمىس كەشۋى - سول ەستەلىكتەردىڭ شىن ەكەنىنە ايعاق.
دىنمۇحامەد احمەت ۇلى قونايەۆ 1912 جىلى 12 قاڭتاردا قازىرگى الماتى قالاسىندا دۇنيەگە كەلگەن. 1930 جىلى الماتىداعى №14 ورتا مەكتەپتى بىتىرگەن دىنمۇحامەدتى قازاقستان ولكەلىك كومسومول كوميتەتى 1931-1936 جىلدارى ماسكەۋدەگى ءتۇستى مەتالل ينستيتۋتىنا وقۋعا جىبەرەدى. 1936 جىلى وسى ينستيتۋتتان تاۋ-كەن ينجەنەرى ماماندىعىن الىپ شىققان ول 1937-1939 جىلدارى بالقاش مىس قورىتۋ كومبيناتىنىڭ قوڭىرات رۋدنيگىنە جۇمىسقا ورنالاسىپ، وندا بۇرعىلاۋ ستانوگىنىڭ ءماشينيسى، سەح باستىعى، رۋدنيكتىڭ باس ينجەنەرى جانە ونىڭ ديرەكتورى بولدى.
«ۋيكيپەديا» اشىق ەنسيكلوپەدياسىنىڭ مالىمەتىنە سۇيەنسەك، قونايەۆ ەل باسقارعان 1960-1986 جىلدارى قازاق جەرىندە 68 جۇمىسشىلار كەنتى، 43 قالا پايدا بولعان. ونىڭ ىشىندە رۋدنىي، ەكىباستۇز، اقتاۋ، نيكولسكيي، ستەپنوگورسك، تەمىرتاۋ، جاڭاتاس، كەنتاۋ ارقالىق قالالارى بار.
قايراتكەردىڭ وسى ەڭبەگىن ءتيىستى دەڭگەيدە ەسكەرۋ ماقساتىمەن الماتى وبلىسىنىڭ قازىرگى ورتالىعى دىنمۇحامەد قونايەۆتىڭ ەسىمىمەن اتاۋ تۋرالى شەشىم قابىلدانعان.
