بۇگىن تۇركىنىڭ تاۋ تۇلعاسى، ءازىربايجاننىڭ ۇلتتىق كوشباسشىسى ءارى بۇرىنعى پرەزيدەنتى گەيدار الييەۆتىڭ تۋعان كۇنى. بۇل كۇندى ءازىربايجاندىقتار ەسكە الىپ، ەرەكشە اتاپ وتەدى. باكۋدە ەڭ الدىمەن گەيدار الييەۆتىڭ قابىرىنە گۇلدەستەسى قويىلادى. تاعزىم ەتۋ شاراسىنا پرەزيدەنتتەن باستاپ بيلىك وكىلدەرىنىڭ بارلىعى، سونىمەن قاتار، ۇلت كوشباسشىسى گەيدار الييەۆتىڭ وتباسى مۇشەلەرى دە قاتىسادى. قازاقستانداعى باۋىرلاس ەلدىڭ ەلشىلىگى دە ۇلت ليدەرىنە ارنالاعان شارانى ەلوردادا جوعارى دەڭگەيدە ۇيىمداستىردى. اتاپ ايتقاندا، «ۇلتتىق كوشباسشىلاردىڭ تاۋەلسىز مەملەكەت قۇرۋداعى ءرولى» تاقىرىبىندا تاعىلىمدى كونفەرەنسيا ءوتتى. القالى جيىندا ءازىربايجاننىڭ قازاقستانداعى ەلشىسى راشاد ماممادوۆ جانە بەلگىلى عالىمدار مەن قوعام قايراتكەرلەرى ءسوز الىپ، تاقىرىپقا قاتىستى تولىمدى ويلارىن ورتاعا سالدى. سونىمەن قاتار، ءازىربايجاننىڭ جالپىۇلتتىق ليدەرىنىڭ تۋعانىنا 96 جىل تولۋىنا ارنالعان شارادا گەيدار الييەۆتىڭ ءومىربايانى مەن ساياسي تۇلعاسى جانە قايراتكەرلىك قىرىنان سىر شەرتەتىن فوتوكورمە جۇرتشىلىقتىڭ نازارىن اۋداردى.
ءبىر قىزىعى، بۇل كۇنى باكۋ قالاسىندا «گۇلدەر مەرەكەسى» شاراسى ءداستۇرلى تۇردە وتەدى. سونىمەن بىرگە، ۇلتتىق كوشباسشىنىڭ تۋعان كۇنى قارساڭىندا ەلدىڭ بارلىق اۋماعىندا «گەيدار الييەۆ مەكتەبى» دەپ اتالاتىن ءداستۇرلى ساباقتار مەن تاقىرىپتىق عىلىمي-تاجىريبەلىك كونفەرەنسيالار، ءار ءتۇرلى جيىندار، شارالار وتكىزىلەدى. جالپىۇلتتىق كوشباسشى گەيدار الييەۆتىڭ ءومىرى مەن قىزمەتى، قايراتكەرلىك بولمىسى مەن تاريحي شەشىمدەرى ساباققا ارقاۋ بولادى.
