«قازگيدرومەت» رمك سينوپتيكتەرى 2024 جىلعى قاراشا مەن 2025 جىلعى ناۋرىزعا ارنالعان كونسۋلتاتيۆتىك ماۋسىمدىق اۋا رايى بولجامىن جاريالادى. بولجامعا سايكەس، كۇز بەن قىستا جاۋىن-شاشىن نورمادان اسىپ تۇسەدى جانە كۇننىڭ انومالدى تۇردە سۋيتىن كەزەڭدەرى بولادى، دەپ حابارلايدى Ulys.
سينوپتيكتەردىڭ بولجامىنا سۇيەنسەك، قىستا تەمپەراتۋرا رەجيمى كليماتتىق نورما شەگىندە بولجانعان. جاۋىن-شاشىن كوپجىلدىق نورمادان اسادى. الايدا جاۋىن-شاشىننىڭ توقتاۋى مەن تەمپەراتۋرانىڭ ءانومالدى تومەن فونىمەن (سولتۇستىك، ورتالىق جانە شىعىس ايماقتاردا تۇندە 30-45°C اياز، ەلدىڭ باتىسى مەن وڭتۇستىگىندە 25-35 °C اياز) سيپاتتالاتىن كەزەڭدەر بولادى.
«قىستىڭ العاشقى ەكى ايى جەلتوقسان جانە قاڭتاردا قازاقستاننىڭ باسىم بولىگىندە اۋا تەمپەراتۋراسى نورمادا بولادى دەپ بولجانادى. تەك قاڭتاردا ەلدىڭ باتىسىندا، سولتۇستىك-باتىسىندا (باتىس قازاقستان، اتىراۋ، ماڭعىستاۋ وبلىستارىندا، اقتوبە وبلىسىنىڭ باسىم بولىگىندە، قوستاناي وبلىسىنىڭ سولتۇستىك-باتىسىندا) نورمادان 1°س جوعارى بولادى.
جەلتوقسان ايىندا جاۋىن-شاشىن مولشەرى رەسپۋبليكانىڭ باسىم بولىگىندەگى نورمادان كوپ بولادى دەپ بولجانىپ وتىر.
باتىس قازاقستان، اقتوبە، قىزىلوردا، ۇلىتاۋ وبلىستارىندا، تۇركىستان وبلىسىنىڭ باسىم بولىگىندە، اتىراۋ وبلىسىنىڭ سولتۇستىگىندە، قوستاناي، اقمولا وبلىستارىنىڭ وڭتۇستىگىندە، قاراعاندى جانە جامبىل وبلىستارىنىڭ سولتۇستىك-باتىسىندا نورما شاماسىندا بولجانعان.
ماڭعىستاۋ وبلىسىندا، اتىراۋ وبلىسىنىڭ باسىم بولىگىندە، اقتوبە وبلىسىنىڭ وڭتۇستىك-باتىسىندا نورمادان از بولجاندى»، - دەلىنگەن سينوپتيكتەر بولجامىندا.
قاڭتار ايىندا جاۋىن شاشىن مولشەرى رەسپۋبليكانىڭ باسىم بولىگىندە نورما شاماسىندا بولادى.
سولتۇستىك قازاقستان، شىعىس قازاقستان وبلىستارىندا، اقمولا، پاۆلودار وبلىستارىنىڭ باسىم بولىگىندەگى، قوستاناي وبلىسىنىڭ سولتۇستىك-شىعىسىندا، اقتوبە وبلىسىنىڭ وڭتۇستىك-باتىسىندا، قىزىلوردا وبلىسىنىڭ باتىس جارتىسىندا نورمادان كوپ بولادى؛
باتىس قازاقستان، اتىراۋ جانە ماڭعىستاۋ وبلىستارىنىڭ باسىم بولىگىندە نورمادان از بولجانىپ وتىر.
اقپان ايىندا رەسپۋبليكانىڭ باسىم بولىگىندە اۋا تەمپەراتۋراسى نورمادان 1°س-قا جوعارى. ەلىمىزدىڭ سولتۇستىك ايماقتارىندا نورما شاماسىندا بولجاندى. بەلسەندى سيكلوندار اسەرىنەن جاۋىن-شاشىن ەلىمىزدىڭ كوپتەگەن ايماقتارىندا نورمادان اسىپ تۇسەدى. جاۋىن-شاشىن رەسپۋبليكانىڭ وڭتۇستىك-باتىس جارتىسىندا كليماتتىق نورما شەگىندە بولجانادى.