پرەزيدەنت ىشكى ىستەر ءمينيسترى ەرجان سادەنوۆتى قابىلدادى، دەپ حابارلايدى اقوردا.
قاسىم-جومارت توقايەۆقا ەلىمىزدەگى كريمينوگەندىك احۋال تۋرالى مالىمەت بەرىلدى. ۇسىنىلعان اقپاراتقا سايكەس جىل باسىنان بەرى قىلمىس دەڭگەيى تومەندەگەن. ۇرلىق، توناۋ، قاراقشىلىق، بۇزاقىلىق، سونداي-اق تۇرمىستىق زورلىق-زومبىلىق، ماس كۇيىندە جانە كوشەلەردە جاسالاتىن قۇقىق بۇزۋشىلىقتاردىڭ سانى ايتارلىقتاي ازايعان.
مينيستر قىلمىسكەرلەردى ىزدەستىرۋ جۇمىسىنىڭ ناتيجەسى تۋرالى دا باياندادى. اتاپ ايتقاندا، جىل باسىنان بەرى 782 ادام، ونىڭ ىشىندە 79 ازامات شەتەلدە ۇستالدى. ىزدەۋدە جۇرگەن 16 ادام ەلگە ەكستراديسيالاندى.
پرەزيدەنتكە ادام كوپ جينالاتىن جەرلەردە ازاماتتاردىڭ قاۋىپسىزدىگىن قامتاماسىز ەتۋ جونىندە اقپارات بەرىلدى. تەرروريستىك ارەكەت تۇرعىسىنان العاندا وسال ەكى مىڭنان استام نىسان، سونىڭ ىشىندە مەكتەپتەر، جوعارى وقۋ ورىندارى، ساۋدا جانە ويىن-ساۋىق ورتالىقتارى، كونسەرت زالدارى مەن باسقا دا تاريحي-مادەني عيماراتتار تەكسەرىلدى.
سونىمەن قاتار ەرجان سادەنوۆ كوشى-قون ءىسىن باقىلاۋ جۇمىستارى جايىندا ەسەپ بەردى. جىل باسىنان بەرى ەلىمىزگە 4،2 ميلليون شەتەل ازاماتى كەلىپ، ونىڭ 4 ميلليونعا جۋىعى شەكارادان كەرى شىققان. ولاردىڭ 90 پايىزى – تمد ازاماتتارى.
مەملەكەت باسشىسىنا ۇيىمداسقان، كيبەر جانە ەسىرتكى قىلمىستارىنا قارسى ءىس-قيمىل جونىندەگى، سونداي-اق قۇقىق بۇزۋشىلىقتاردىڭ، ونىڭ ىشىندە تۇرمىستىق زورلىق-زومبىلىقتىڭ الدىن الۋ، سۋ تاسقىنى سالدارىن جويۋ، جول قاۋىپسىزدىگىن قامتاماسىز ەتۋ، كەزەكتەن تىس اتتەستاسيالاۋ باعىتتارىنداعى تاپسىرمالارىنىڭ ورىندالۋ بارىسى تانىستىرىلدى.
بۇدان بولەك، مينيستر كوشەلەردەگى قاۋىپسىزدىك دەڭگەيىن ارتتىرۋ جانە قۇقىق بۇزۋشىلىقتارعا مۇلدە توزبەۋشىلىك قاعيداتىن قامتاماسىز ەتۋ ءۇشىن قابىلدانىپ جاتقان شارالار تۋرالى ايتتى.
كەزدەسۋ سوڭىندا قاسىم-جومارت توقايەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە ءبىرقاتار تاپسىرما بەردى.
