بەرىك ءابدىعالي ۇلىنىڭ "ۇمىتىلعان قاھارماندار" اتتى كىتابىنىڭ تۇساۋكەسەرى ءوتتى
«Nur Otan» پارتياسىنىڭ ورتالىق اپپاراتىندا «ۇمىتىلعان قاھارماندار» اتتى جاڭا كىتاپ كوپشىلىككە تانىستىرىلدى. بۇل ەڭبەككە ۇلى وتان سوعىسىندا ەرلىگىمەن كوزگە ءتۇسىپ، جوعارى ناگرادالارعا ۇسىنىلعانىمەن ءتۇرلى سەبەپتەرگە بايلانىستى ءتيىستى ماراپاتىنا قول جەتكىزە الماعان باتىرلار تۋرالى مالىمەتتەر جيناقتالعان. كىتاپتىڭ جانە جالپى جوبانىڭ اۆتورى، بەلگىلى قوعام قايراتكەرى بەرىك ءابدىعالي ۇلى. پارتيا باسپا ءسوز قىزمەتىنىڭ حابارلاۋىنشا، جاڭا ەڭبەك «Nur Otan» پارتياسىنىڭ «ارداگەرلەردى ارداقتايىق» پارتيالىق جوباسى اياسىندا جارىق كوردى. سالتاناتتى راسىمگە پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ، بەلگىلى مەملەكەت جانە قوعام قايراتكەرلەرى، پارلامەنت دەپۋتاتتارى، ۇكىمەتتىك ەمەس ۇيىمداردىڭ وكىلدەرى جانە كىتاپقا ەسىمدەرى ەنگىزىلگەن باتىرلاردىڭ ۇرپاقتارى قاتىستى.
«Nur Otan» پارتياسى ءتوراعاسىنىڭ ءبىرىنشى ورىنباسارى جوبانىڭ باستى ماقساتى ۇمىت قالعان ارداگەرلەرىمىزدىڭ ەسىمدەرىن دارىپتەپ، ولاردىڭ ەرلىكتەرىن كەڭىنەن ناسيحاتتاۋ ەكەنىن ايتتى.
– وسى يگىلىكتى ءىسىمىز ارقىلى ءبىز جاس ۇرپاقتى وتانسۇيگىشتىككە تاربيەلەۋدى ماقسات تۇتتىق. كەزىندە وزدەرى كورە الماي كەتكەن قۇرمەت پەن ماراپاتتى بۇگىنگى ۇرپاقتارىنا كورسەتىپ، اتالارىمىزدىڭ ەرلىكتەرىن دارىپتەۋدى كوزدەدىك. بۇل – بۇگىنگى بەيبىت كۇنىمىزدىڭ كەپىلى بولعان اكەلەرىمىز بەن اتالارىمىزدىڭ الدىنداعى پەرزەنتتىك بورىشىمىز، – دەدى ماۋلەن اشىمبايەۆ.
سونىمەن قاتار ول اتالعان ەڭبەكتى بەرىك ءابدىعالي ۇلىنىڭ «زابىتىە گەروي. گەروي سوۆەتسكوگو سويۋزا» اتتى جيناعىنىڭ جالعاسى دەپ قابىلداۋعا دا بولاتىنىن جەتكىزدى. ب.ءابدىعالي ۇلىنىڭ بۇعان دەيىن دە وسى سالادا زەرتتەۋلەر جۇرگىزىپ، 2015 جىلى جوعارىدا اتالعان جيناقتى جارىققا شىعارعان بولاتىن.
«ۇمىتىلعان قاھارماندار» اتتى جاڭا ەڭبەككە كەڭەس وداعىنىڭ باتىرى اتاعىنا ۇسىنىلعان 133 مايدانگەر تۋرالى مالىمەتتەر ەنگىزىلگەن. ولاردىڭ كوپشىلىگى جاياۋ اسكەر. سونداي-اق ارتيللەريست، پۋلەمەتشى، ساپەر، تانكيست، تانكىگە قارسى وزدىگىنەن جۇرەتىن (سۋ، يسۋ) اتقىش، مەرگەن، سانيتار، بايلانىسشى، كاۆالەريست، دەسانتشى، اۋە دەسانتى، ۇشقىش، ينجەنەرلىك اسكەر جانە ىىحك-نىڭ (نكۆد) قىزمەتكەرلەرى بار.
جيناققا تەك ماراپاتتاۋ پاراقشاسى تىزىمىنەن تابىلعان ارداگەرلەر عانا ەنگىزىلگەن. دەگەنمەن، پارتيا ءتوراعاسىنىڭ ءبىرىنشى ورىنباسارى ەلىمىزدە سوعىستا ەرەن ەرلىك كورسەتسە دە لايىقتى ماراپاتىن الا الماعان باتىرلارىمىز تىزىمدەگىدەن الدەقايدا كوپ ەكەنىنە نازار اۋداردى.
– ەرلىكتەرى ەسكەرىلسە دە، دەر كەزىندە ەلەنبەي قالعان باتىرلارىمىزدىڭ بۇدان دا كوپ ەكەنى بەلگىلى. سول سەبەپتى «Nur Otan» پارتياسى وسى باعىتتا ەڭبەكتەنىپ جۇرگەن ازاماتتارعا قولداۋ كورسەتۋدى ودان ءارى جالعاستىرا بەرەدى. بۇگىن كوپشىلىككە تانىستىرىلعان جاڭا تۋىندى ءبىزدىڭ اۋقىمدى جۇمىسىمىزدىڭ ءبىرىنشى كەزەڭى عانا. كەلەسى كەزەڭدە باستامانىڭ اياسىن كەڭەيتىپ، باتىرلارىمىزدىڭ ەسىمدەرىن مەكتەپتەرگە، كوشەلەرگە جانە اۋىلدارعا بەرۋ ءىسىن قولعا الساق دەگەن جوسپارىمىز بار. الداعى ۋاقىتتا سول جوسپارلارىمىزدىڭ دا جۇزەگە اساتىنىنا سەنەمىز، – دەدى ماۋلەن اشىمبايەۆ.
سونداي-اق ول ەكىنشى دۇنيەجۇزىلىك سوعىسىنا باعا بەرمەستەن بۇرىن وعان ەڭ الدىمەن ادامداردىڭ تاعدىرى، قاراپايىم حالىقتىڭ ەرلىگى تۇرعىسىنان قاراۋ كەرەكتىگىن ايتتى.
– قازىرگى تاڭدا ۇلى وتان سوعىسى تۋرالى ءتۇرلى پىكىرلەر ايتىلىپ ءجۇر. ءبىراق ءبىز سول كەزدە اتالارىمىز بەن اكەلەرىمىز، اجەلەرىمىز بەن انالارىمىز باتىرلىق پەن باتىلدىقتىڭ، قايرات پەن قاجىرلىقتىڭ، سابىر مەن ءتوزىمنىڭ جارقىن ۇلگىسىن كورسەتكەنىن كەڭىنەن ناسيحاتتاۋىمىز كەرەك. ولار باستارىنا تۇسكەن اۋىر جاعدايعا قاراماستان ادامي قاسيەتتەرى مەن ومىرلىك ۇستانىمدارىنان اينىماي، وتان ءۇشىن وتقا تۇسۋدەن تارتىنعان جوق. سوندىقتان سول ءبىر سۇراپىل جىلدار تۋرالى ايتقان كەزدە الدىمەن وسىنداي ساتتەرگە نازار اۋدارعان ءجون، – دەدى «Nur Otan» پارتياسى ءتوراعاسىنىڭ ءبىرىنشى ورىنباسارى.
ءوز كەزەگىندە جوبا اۆتورى بەرىك ءابدىعالي ۇلى سوعىس جىلدارىندا 497 وتانداسىمىز كەڭەس وداعىنىڭ باتىرى اتاعىنا يە بولعانىن، الايدا ۇسىنىلعانداردىڭ سانى بۇدان دا كوپ ەكەنىن ايتتى.
– وكىنىشكە قاراي، كوپتەگەن جاۋىنگەرگە قاhارمان اتاعى قايتىس بولعان سوڭ بەرىلدى. رەسەي، بەلارۋس، ۋكراينا جانە باسقا دا ەۋروپا ەلدەرىندە ميلليونداعان بەلگىسىز جانە اتى ساقتالماعان جاس باتىرلار ماڭگىلىككە قالدى. سوعىس الاڭدارىندا ىزدەستىرۋ جۇمىستارى ءالى كۇنگە دەيىن جالعاسۋدا. ءبىزدىڭ ءار باتىرىمىز ەستە ساقتاۋعا، قۇرمەت كورسەتۋگە لايىق. ولاردىڭ ەسىمدەرى ەشقاشان ۇمىتىلىپ كەتپەۋى كەرەك. سەبەبى ولاردىڭ ءارقايسىسى ناعىز قاhaرماندار، – دەدى بەرىك ءابدىعالي ۇلى.
بۇدان باسقا، اۆتور سەگىز بىردەي وتانداسىمىزدىڭ ەكى رەت باتىر اتاعىنا ۇسىنىلعانىن تىلگە تيەك ەتتى. ولاردىڭ ەكەۋى كاپيتاندار ساعادات نۇرماعامبەتوۆ پەن سەيتحان تەمىربايەۆ. ەكى رەت ۇسىنىلعانىمەن ولار ءبىر رەت بولسىن باتىر اتاعىن الدى. ال قالعاندارىنا ەكى رەتىندە دە بەرىلمەگەن.
– ولاردىڭ اراسىندا ساپەرلەر – قاتارداعى جاۋىنگەر قۇدايبەرگەن جانسەرىكوۆ جانە اعا سەرجانت ءمىنايقۇل ساعىندىقوۆ، اتقىشتار روتاسىنىڭ كومانديرى، لەيتەنانت قابىش كوكتايەۆ، 248 جاۋدىڭ كوزىن جويعان مەرگەن، اعا سەرجانت زەيتىن بايجانوۆ جانە مايور ۆ.گۋتوۆ پەن لەيتەنانت ۆ.گۋتوۆسكيي بار، – دەگەن بەرىك ءابدىعالي ۇلى الداعى ۋاقىتتا بۇل باعىتتا جۇمىستار ءارى قاراي جالعاساتىنىن جەتكىزدى.
ال حالىق قاھارمانى مۇحتار التىنبايەۆ ۇلى وتان سوعىسىنا قاتىسقان جانە سول كەزدە تىلدا ەڭبەك ەتكەن كەز كەلگەن ادامعا قۇرمەت كورسەتۋ بارشامىزدىڭ باستى مىندەتىمىز بولۋى كەرەكتىگىن ايتتى.
– جۇلدىزىن السا دا، الماسا دا، ءبىز ءۇشىن سوعىسقا قاتىسقان اعا بۋىننىڭ ءبارى باتىر. بۇل – ءبىزدىڭ ەلىمىزدىڭ تاريحى. قانداي پىكىر ايتىلسا دا تاريحتى ەشكىم جوققا شىعارا المايدى. سوندىقتان ءبىز جەڭىستى جاقىنداتقان، سوعان ۇلكەن ۇلەس قوسقان باتىرلارىمىزدى وسىلاي دارىپتەپ، تەك ءوز ەلىمىزدىڭ كولەمىندە ەمەس، ودان تىس اۋديتوريالارعا دا كەڭىنەن ناسيحاتتاۋىمىز كەرەك، – دەدى مۇحتار التىنبايەۆ.
ودان بولەك، باسقوسۋدا ءماجىلىس دەپۋتاتى باقىتبەك سماعۇل، «قاھارمان» قورىنىڭ ديرەكتورى سابىر قاسىموۆ جانە كىتاپقا ەسىمى ەنگىزىلگەن باتىر ءمىنايقۇل ساعىندىقوۆتىڭ ۇلى مارات ساعىندىقوۆ ءسوز الىپ، اتقارىلعان جۇمىستىڭ ماڭىزى مەن ءمانى تۋرالى پىكىرلەرىن ءبىلدىردى. ءىس-شارانى بەلگىلى جۋرناليست، كورنەكتى قالامگەر نۇرتورە ءجۇسىپ جۇرگىزىپ وتىردى.
