بۇگىن وبلىس اكىمى بەيبىت يسابايەۆ «جەتىسۋ» كاسىبي ۆولەيبول كلۋبىنىڭ جاتتىقتىرۋشىلار قۇرامىمەن جانە ويىنشىلارىمەن كەزدەسىپ، قازاقستان كۋبوگىنداعى جەڭىسىمەن قۇتتىقتادى. ەسكە سالساق، ايەلدەر كومانداسى كۋبوك جەڭىمپازى اتانسا، ال ەرلەر كومانداسى ءىىى ورىنعا يە بولدى، دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
- ەلىمىزدىڭ ۇلىق مەرەكەسى - رەسپۋبليكا كۇنى قارساڭىندا سىزدەر وبلىسىمىز ءۇشىن، جالپى بارشا جانكۇيەرلەر ءۇشىن ۇلكەن سىي جاسادىڭىزدار. سىزدەردىڭ بۇل جەتىستىكتەرىڭىز - قاجىرلى ەڭبەكتىڭ ايقىن ناتيجەسى عانا ەمەس، سونىمەن قاتار رۋح مىقتىلىعىنىڭ، توپتىق جۇمىس پەن كاسىبي شەبەرلىكتىڭ جارقىن مىسالى. ەل كۋبوگىنىڭ قورىتىندىسى بويىنشا ءبىزدىڭ ايەلدەر كومانداسى وسىمەن توعىز دۇركىن چەمپيون اتانىپ وتىر. ەرلەر كومانداسى دا قۋانتتى، بۇل كومانداداعى ويىنشىلاردىڭ كوپشىلىگى جەرگىلىكتى سپورتشىلارىمىز. ەكىنشى جىل ۇلتتىق ليگادا ويناپ، بيىل بىردەن جۇلدەلى ءىىى ورىنعا يە بولدىڭىزدار. بارشاڭىزدى وسى ايتۋلى سپورتتىق جەتىستىكتەرىڭىزبەن قۇتتىقتايمىن! - دەدى كلۋب باسشىلىعىنا جانە بارلىق جاتتىقتىرۋشىلار قۇرامىنا العىسىن بىلدىرگەن ءوڭىر باسشىسى.
سپورتشىلاردىڭ جەتىستىگىن تىلگە تيەك ەتكەن ب.يسابايەۆ كلۋبتىڭ بۇرىنعى چەمپيوندىق داڭقىن قايتاراتىن كەز كەلگەنىن اتاپ ءوتتى، سونداي-اق قاجەتتى قولداۋ جالعاساتىنىن دا ايتتى. ەسكە سالساق، كلۋبتىڭ ايەلدەر كومانداسىنىڭ قورجىنىندا ەل چەمپيوناتىنداعى 8 جەڭىس بار. ءوز كەزەگىندە ايەلدەر كومانداسىنىڭ باس باپكەرى ماركو گرشيچ وبلىس باسشىلىعىنا قولداۋى ءۇشىن العىس ءبىلدىرىپ، كوماندانىڭ چەمپيوندىق اتاعىن قايتارۋعا بار كۇش-جىگەرلەرىن جۇمسايتىندىقتارىن ايتىپ ۋادە بەردى.
كەزدەسۋ بارىسىندا قاتىسۋشىلار كلۋبتىڭ الداعى جوسپارلارىنا توقتالدى. ايەلدەر كومانداسىنىڭ كاپيتانى كارينا دەنيسوۆا جاقىندا سپورتشىلارعا ارنالعان جاڭا ۆولەيبول ورتالىعى مەن تۇرعىن ءۇيدىڭ سالىنىپ بەرىلگەنى ساپالى جاتتىعۋعا كوپ كومەك بولعانىن اتاپ ءوتتى.
- ءبىزدىڭ ۆولەيبول ورتالىعىنىڭ ەلىمىزدە بالاماسى جوق، وندا جاتتىعۋعا قاجەتتى جاعدايلاردىڭ ءبارى بار. قازاقستان كۋبوگىنداعى جەڭىس - بۇل ءبىزدىڭ ءارقايسىمىزدىڭ كۇندەلىكتى ەڭبەگىمىزدىڭ، فيزيكالىق جانە مورالدىق جاعىنان كورسەتىلگەن قولداۋدىڭ ناتيجەسى. ماۋسىم ەندى باستالىپ جاتىر، دەگەنمەن ءبىز دۇرىس باعىتتا كەلە جاتقانىمىزدى دالەلدەدىك، كۋبوكتى تالدىقورعانعا الىپ كەلدىك، – دەدى ك.دەنيسوۆا.
كەزدەسۋدى قورىتىندىلاي كەلە وبلىس اكىمى سپورتشىلارعا قۇرمەت گراموتالارى مەن العىس حاتتار تابىس ەتتى، سونداي-اق الداعى جارىستاردا جەڭىستى جولدىڭ جالعاستى بولۋىنا تىلەكتەستىك ءبىلدىردى:
- الدا قاراشادان باستاپ ساۋىرگە دەيىن ۇلتتىق ليگا ويىنشىلارى اراسىندا وتەتىن قازاقستان چەمپيوناتىنا قاتىسۋ مىندەتى تۇر. سىزدەردەن جوعارى ناتيجە كۇتەمىز. وتكەن ويىندا قاجىرلى مىنەز تانىتىپ، ساپالى ويىن كورسەتتىڭىزدەر، وسكەلەڭ ۇرپاق سىزدەردەن ۇلگى الىپ، سىزدەرگە قاراپ وسەدى، - دەپ ءسوزىن قورىتىندىلادى بەيبىت يسابايەۆ.
