پرەزيدەنت استانا قالاسىنداعى «اتامەكەن» ەتنو-مەموريال كەشەنىندە وتكەن مەملەكەتتىك تۋ كوتەرۋ راسىمىنە قاتىستى، دەپ حابارلايدى اقوردا.
قۇرمەت قاراۋىلى روتاسىنىڭ باستىعى سالتاناتتى شاراعا دايىندىعى جونىندە مەملەكەت باسشىسىنا راپورت بەردى. سودان كەيىن ەلىمىزدىڭ ءانۇرانى شىرقالىپ، كوك بايراعىمىز كوتەرىلدى.
قاسىم-جومارت توقايەۆ جينالعان جۇرتشىلىقتى مەملەكەتتىك رامىزدەر كۇنىمەن قۇتتىقتاپ، بۇل ەلدىگىمىزدى نىعايتا تۇسەتىن مەرەيلى مەرەكە ەكەنىنە نازار اۋداردى.
– وسى مەرەكەگە وراي ءبىز جاڭا عانا ەلىمىزدىڭ باس بايراعىن كوتەردىك. كوك تۋىمىز ءاردايىم بيىكتە جەلبىرەي بەرسىن! تۋىمىزدى تىك ۇستاۋ – ءار ازاماتتىڭ پەرزەنتتىك پارىزى. اسپان تۇستەس كوك بايراعىمىز – ءبىزدىڭ ماقتانىشىمىز. سپورتشىلارىمىز تۋىمىزدى تالاي رەت جەڭىس تۇعىرىنا كوتەردى. جاقىندا قازاقتىڭ قايسار قىزدارى ەۆەرەستكە شىقتى. تۋىمىز الەمنىڭ ەڭ بيىك شىڭىندا تاعى دا جەلبىرەدى. الدا وليمپيادا ويىندارى كەلە جاتىر. نامىستى ورەندەرىمىز پاريج تورىندە تۋىمىزدى تىك ۇستايدى دەپ سەنەمىن، – دەدى پرەزيدەنت.
مەملەكەت باسشىسى بايراعىمىز اسپانداعان سايىن ۇلت مەرەيى اسقاق بولاتىنىن ايتىپ، تۋدى تاۋەلسىزدىگىمىزدىڭ تۇمارى ءارى ىنتىماعىمىزدىڭ باستاۋى دەپ اتادى.
– باتىر بابالارىمىز ەل تاعدىرى سىنعا تۇسكەن ساتتە ءبىر تۋدىڭ تۇبىنەن تابىلعان. بىرلىگىن بەكەم ۇستاعان، ەلى مەن جەرىن قورعاعان. بايتاق دالانى كوزىنىڭ قاراشىعىنداي ساقتاپ، ۇرپاعىنا ميراس ەتكەن. سول اماناتقا ادال بولۋ – ۇرپاقتىڭ ۇلى مۇراتى، – دەدى قاسىم-جومارت توقايەۆ.
پرەزيدەنتتىڭ ايتۋىنشا، قازاقستان بەيبىت مەملەكەت رەتىندە تاتۋلىق پەن كەلىسىمدى قاشاندا باستى ورىنعا قويادى جانە بارلىق مەملەكەتپەن دوستىق قاتىناس ورناتقان.
– سونىڭ ارقاسىندا تۋىمىز جەر جۇزىنە بىرلىك پەن بەيبىتشىلىكتىڭ بايراعى رەتىندە تانىلدى. ءبىز دوستىق قاعيداتىن ءاردايىم بەرىك ۇستانامىز. ءقازىر ءبارىمىز ءبىر كىسىدەي جۇمىلىپ، ادىلەتتى قازاقستاندى قۇرىپ جاتىرمىز. بارشاعا بىردەي مۇمكىندىك بەرەتىن قوعام ورناتا باستادىق. از ۋاقىت ىشىندە اۋقىمدى ساياسي رەفورما جاسادىق. جاڭا ەكونوميكالىق باعىتىمىزدى ايقىندادىق. سونداي-اق جاس ۇرپاقتىڭ سانا-سەزىمىن جاڭعىرتىپ، ساپالى ۇلت بولۋعا بەت بۇردىق. مۇنىڭ ءبارىن جۇزەگە اسىرىپ، تۇبەگەيلى ورنىقتىرۋ – وڭاي شارۋا ەمەس. ول ءۇشىن، ەڭ الدىمەن، ىرىستى ىنتىماق كەرەك. بارشا قازاقستان حالقىنىڭ تاعدىرى – ورتاق، بولاشاعى – ءبىر. سوندىقتان ءبىر ەل، ءبىر حالىق بولىپ، تۋ تۇبىندە تۇتاسا بىلسەك، كوزدەگەن ماقساتقا مىندەتتى تۇردە جەتەمىز، – دەدى قاسىم-جومارت توقايەۆ.
پرەزيدەنت مەملەكەتتىك رامىزدەر نەگىزگى قۇندىلىقتارىمىز بەن مۇراتتارىمىزدى ايشىقتاپ، ءارقايسىمىزدىڭ بويىمىزدا ەلىمىزگە دەگەن شىنايى ماقتانىش سەزىمىن وياتاتىنىن جەتكىزدى. سونىمەن قاتار باستى ەلدىك نىشاندار سىن ساعاتتا دا، جەڭىستى كۇندەردە دە بارشا ازاماتتى بىرىكتىرەتىنىنە توقتالدى.
قاسىم-جومارت توقايەۆ مەملەكەتتىك رامىزدەر كۇنى اسكەري شەن تاپسىرۋ يگى داستۇرگە اينالعانىن اتاپ ءوتىپ، جاس ساربازدار وتان قورعاۋ ءىسىن ومىرلىك ميسسيا رەتىندە تاڭداپ العانىن ايتتى.
– ەر-ازامات ءۇشىن ەل تىنىشتىعىن كۇزەتۋ – ەڭ ابىرويلى مىندەت. ايگىلى باتىرىمىز باۋىرجان مومىش ۇلى «ەردىڭ تۋى – نامىس» دەگەن. وزدەرىڭىز سياقتى وتانشىل ءارى نامىستى ۇلاندارى بار قازاقستاننىڭ كەلەشەگى جارقىن ەكەنى انىق. بارشاڭىز انتقا ادال بولىپ، ەل شەبىن قىراعى قورعايسىزدار دەپ سەنەمىن. اسكەري شەن الۋ – ءار ساربازدىڭ ومىرىندەگى ماڭىزدى بەلەس. ارميا گەنەرالى ساعادات نۇرماعامبەتوۆ «اتاقتى العاننان گورى، ونى ارقالاپ جۇرگەن قيىن» دەگەن. ايگىلى قولباسشىنىڭ بۇل ءسوزى سىزدەرگە زور جاۋاپكەرشىلىك جۇكتەيدى. قازاق ساربازى دەگەن اتقا ءارقاشان لايىق بولىڭىزدار، – دەدى مەملەكەت باسشىسى.
سالتاناتتى راسىمدە جوعارى اسكەري وقۋ ورىندارىنىڭ 12 ۇزدىك تۇلەگى قازاقستان پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسىنىڭ قولىنان وفيسەرلىك شەن الدى.
شارا سوڭىندا مەملەكەتتىك كۇزەت قىزمەتىنىڭ، قورعانىس جانە ىشكى ىستەر مينيسترلىكتەرىنىڭ قۇرمەت قاراۋىلى روتالارى پرەزيدەنت پەن جينالعان قاۋىم الدىنان سالتاناتتى تۇردە ساپ تۇزەپ ءوتتى.
تۋ كوتەرۋ راسىمىنە پارلامەنت سەناتىنىڭ ءتوراعاسى ماۋلەن اشىمبايەۆ، پارلامەنت ءماجىلىسىنىڭ ءتوراعاسى ەرلان قوشانوۆ، ق ر مەملەكەتتىك كەڭەسشىسى ەرلان قارين، پرەزيدەنت اكىمشىلىگىنىڭ باسشىسى ايبەك دادەباي، سونداي-اق مەملەكەتتىك ورگانداردىڭ باسشىلارى، ۇكىمەت مۇشەلەرى، پارلامەنت دەپۋتاتتارى، جوعارى اسكەري وقۋ ورىندارىنىڭ كۋرسانتتارى مەن ولاردىڭ تۋىستارى قاتىستى.
