بارلىق فيلمدەر قازاق تىلىندە كورسەتىلەدى
بۇل تۋرالى مادەنيەت جانە سپورت ءمينيسترى ارىستانبەك مۇحامەدي ۇلى ءوزىنىڭ facebook پاراقشاسىنا جازدى. جۋىردا عانا مەملەكەت باسشىسى «كينەماتوگرافيا تۋرالى» زاڭعا قول قويعان بولاتىن. مينيستر سالاداعى تۇڭعىش قۇجاتتىڭ ارتىقشىلىقتارى مەن ماڭىزى تۋرالى جازدى.
«دوستارىم، ەلباسىمىز «كينەماتوگرافيا تۋرالى» قازاقستان رەسپۋبليكاسى زاڭىنا قول قويعانى بارشامىزعا بەلگىلى. بۇل اۋقىمدى قۇجات كينەماتوگرافيا سالاسىندا قۇقىقتىق نەگىز ورناتۋعا باعىتتالعان. زاڭ جوباسى ءۇش جىل بويى دايىندالىپ، جاسالىپ، ەندى بەكىتىلدى. بۇل كينو سالاسى ءۇشىن ماڭىزدى، نەگىزگى ءۇش مىندەت - ۇلتتىق كينو ءوندىرۋشىنى قولداۋ، ۇلتتىق كينونى پروكاتتا جىلجىتۋ، قازاقستاندىق كينونى الەمدىك كينو نارىعىنا بەلسەندى تۇردە شىعارۋعا باعىتتالعان وسى سالا ءۇشىن وتە ماڭىزدى زاڭ»، — دەگەن مينيستر ماڭىزدى قۇجات تۋرالى كەڭىرەك جازدى. الدىمەن ارىستانبەك مۇحامەدي ۇلى ەلىمىزدە ابدەن جاۋىر بولعان ماسەلە – فيلمدەردىڭ قازاق تىلىنە اۋدارىلماستان كورسەتىلۋى تۇيتكىلىنىڭ زاڭمەن رەتتەلەتىنىنە ايرىقشا توقتالا كەلە: «ەلىمىزدىڭ كينوكورسەتىلىمىندەگى بارلىق فيلمدەردى قازاق تىلىنە دۋبلياج جاساۋ، نە سۋبتيتر بەرۋ، نەمەسە كادردان تىس اۋدارمانى قامتاماسىز ەتۋ - قازاقستاندىقتاردىڭ ەڭ كۇتكەن نورماسى. اۋدارما كورسەتىلىم يەلەنۋشى ديستريبيۋتور ەسەسىنەن جاسالاتىن بولادى، جانە تۇساۋكەسەر مەرزىمىنە اسەر ەتپەۋى كەرەك. اۋدارما ءتۇپنۇسقادان، نەمەسە رەسەيلىك نارىق ءۇشىن ورىس تىلىنە تارجىمەلەنگەن نۇسقادان جاسالاتىن بولادى، مۇنى كورسەتىلىم يەلەنۋشى ءوزى شەشەتىن بولادى. كورسەتىلىمى شەكتەۋلى فيلمدەر عانا بۇل ەرەجەدەن تىسقارى بولادى. ۇلتتىق فيلمدەردىڭ كورسەتىلىمىنە كەلسەك، ولار قازاق تىلىندە بولادى، باسقا تىلدە قاجەتتىلىك تۋىنداعان جاعدايدا عانا كورسەتىلەدى. جۇڭگو مەن اقش-تا كورسەتىلىمدەگى فيلمدەردىڭ ءبارى اۋديتوريا تىلىندەگى سۋبتيترلەرمەن قامتاماسىز ەتۋ مىندەتتى ەكەنىن بۇرىن دا ۇلگى رەتىندە كەلتىرىپ ەدىم. بۇل - ەڭ وڭتايلى جانە پارمەندى مەحانيزمدەردىڭ ءبىرى. قازاقستاعا جىلىنا 300-دەن استام فيلم اكەلىنەدى جانە ولار قازاق تىلىندەگى نۇسقاسىز كورسەتىلەتىن. مۇنىڭ ءارتۇرلى سەبەپتەرى بار، سونىڭ ءبىرى - قۇقىق يەلەنۋشى ءۇشىن كاسىبي دۋبلياج جاساۋعا جۇمسالعان قارجى ەلىمىزدەگى كورسەتىلىمنەن تۇسكەن پايدادان اسىپ كەتۋى مۇمكىن»،-دەيدى. سونىمەن قاتار، ول زاڭدا فيلمدەردى جاسقا قاراي جىكتەپ، سوعان سايكەس كاتەگوريا بەرىلۋىن، فيلمدەردى جۇيەلەپ، ەسەپكە الىپ، مونيتورينگ جۇرگىزەتىن ءبىرىڭعاي اۆتوماتتىق اقپاراتتىق جۇيە قۇرۋ قاراستىرىلعانىن تارقاتىپ بەردى. ونىڭ سوزىنشە، قابىلدانعان نورمالارعا سايكەس، قازاقستان جەرىندە فيلمدەردىڭ كورسەتىلىمى فەستيۆالدەردە، سەمينارلاردا، رەتروسپەكتيۆادان تىس جاعدايدا، فيلمدەردىڭ مەملەكەتتىك رەەسترىنە تىركەپ، كورسەتىلىم كۋالىگى نەگىزىندە رۇقسات ەتىلەدى. بۇنىڭ سىرتىندا قۇجاتتا كينو وندىرىسىمەن اينالىساتىن ەلدەردىڭ وزات تاجىريبەسىنە سۇيەنە وتىرىپ، ۇلتتىق كينونى قولداۋ مەملەكەتتىك ورتالىعىن قۇرۋ قاراستىرىلىپتى. بۇل تۋرالى مادەنيەت جانە سپورت ءمينيسترى: «زاڭ كينەماتوگرافيانى مەملەكەت تاراپىنان قارجىلاي قولدايتىن وپەراتور بولىپ تابىلاتىن ۇلتتىق كينونى قولداۋ مەملەكەتتىك ورتالىعى جۇمىسىنىڭ قۇقىقتىق نەگىزىن ايقىندايدى. ۇلتتىق كينونى قارجىلاندىرۋدىڭ جاڭا مودەلى ىسكە اسادى. ءىرى كينووندىرۋشىلەردى قولداۋ جانە ينۆەستورلاردى تارتۋ ماقساتىندا سۋبسيديا تولەۋ، كينەماتوگرافيا سالاسىندا سالىق جەڭىلدىكتەرى، كينو قىزمەتىن ەسەپكە الۋ جانە مونيتورينگ جاساۋ اۆتوماتتىق اقپاراتتىق ءبىرىڭعاي جۇيە قۇرۋ، كينوكوللەكسيالاردى سيفرلاندىرۋ شارالارى قاراستىرىلعان. قازاقستان ۇكىمەتى جانىنان ۇلتتىق فيلمدەردى مەملەكەت تاراپىنان قارجىلاي قولداۋ تۋرالى ۇسىنىستار مەن ۇسىنىمدار ماسەلەسىمەن اينالىساتىن كونسۋلتاتيۆتىك-كەڭەسشى ورگان - ۇلتتىق فيلمدەردى مەملەكەت تاراپىنان قارجىلاي قولداۋ ماسەلەلەرى بويىنشا مەكەمەارالىق كوميسسيا قۇرىلادى. ەلباسىمىزدىڭ تاپسىرۋىمەن «استانافيلم» جانە «قازاقفيلم» تەرريتورياسىندا ەركىن ەكونوميكالىق ايماق قۇرۋ قاراستىرىلدى»،-دەپ جازدى. جاڭا زاڭ تۋرالى جان-جاقتى مالىمەت بەگەن ارىستانبەك مۇحامەدي ۇلى ءوزىنىڭ facebook پاراقشاسىنداعى جازباسىن بىلاي تۇيىندەيدى: «جاڭالىقتار وسىنداي، دوستارىم! ءبىز ءبارىمىز ەلباسىمىزدىڭ زاڭعا قول قويۋىن اسىعا كۇتتىك. كينەماتوگرافيا مىزدىڭ دامۋىندا شەشۋشى كەزەڭ بولىپ تابىلاتىن تاۋەلسىز قازاقستان تاريحىنداعى «كينەماتوگرافيا تۋرالى» تۇڭعىش زاڭ قابىلدانۋىمەن بارشاڭىزدى قۇتتىقتايمىن!».
سۋرەت : zakon.kz
