2021 جىلدىڭ قىركۇيەگىندە 7ء-شى شاقىرىلعان پارلامەنتتىڭ 1ء-شى سەسسياسىن اشقان مەملەكەت باسشىسى قاسىم-جومارت توقايەۆ بارلىق دەڭگەيدەگى سايلاۋ بيۋللەتەندەرىنە «بارىنە قارسىمىن» دەگەن جازۋ ەنگىزۋ تۋرالى باستاما كوتەرگەن بولاتىن.
«سايلاۋ بيۋللەتەنىنە «بارىنە قارسىمىن» دەگەن باعاننىڭ ەنگىزىلۋى وتە ماڭىزدى شەشىم بولدى...»،- دەدى پرەزيدەنت.
بۇل ساياسي باستاما سول جىلى-اق جۇزەگە اسىرىلىپ، زاڭمەن بەكىتىلدى. ال 2022 جىلى وتكەن كەزەكتەن تىس پرەزيدەنت سايلاۋىندا، ودان كەيىن بىلتىرعى پارلامەنت ءماجىلىسى دەپۋتاتتارىن سايلاۋدا داۋىس بەرۋ بيۋللەتەنىنە «بارىنە قارسىمىن» دەگەن باعان ەنگىزىلدى. بۇل ەل تۇرعىندارىنا وزدەرىنىڭ ازاماتتىق ۇستانىمىن اشىق بىلدىرۋگە بەرىلگەن ۇلكەن مۇمكىندىك ەدى.
ويتكەنى، بۇعان دەيىنگى سايلاۋلاردا داۋىس بەرۋشىلەردىڭ كەيبىرى بيۋللەتەندەگى تىزىمىنەن پرەزيدەنتتىككە نەمەسە پارلامەنت دەپۋتاتتىعىنا لايىقتى كانديداتتى نە پارتيانى كورمەسە، وندا بيۋللەتەنگە قالامساپپەن كانديداتتاردىڭ بارىنە قارسى ەكەندىگىن جازىپ كەتەتىن-دى. ال مۇنداي بيۋللەتەندەر جاراسىز سانالادى. ەندى رەسپۋبليكا تۇرعىندارى «بارىنە قارسىمىن» باعانىن بەلگىلەۋ ارقىلى وزدەرىنىڭ ازاماتتىق ۇستانىمىن بىلدىرۋگە مۇمكىندىك الىپ وتىر.
ارينە، بۇل باعاننىڭ سايلاۋ ناتيجەسىنە ىقپال ەتۋى مۇمكىن ەمەستىگى ءسوزسىز. ماسەلەن، 2022 جىلدىڭ 20 قاراشاسىندا وتكەن پرەزيدەنت سايلاۋىندا 8 ملن 300 مىڭ ادام داۋىس بەرسە، سونىڭ 5 پايىزعا جۋىعى عانا «بارىنە قارسىمىن» باعانىن بەلگىلەگەن. ال ودان كەيىن 2023 جىلعى 19 ناۋرىزدا قازاقستان رەسپۋبليكاسى پارلامەنتى ءماجىلىسىنىڭ سەگىزىنشى سايلانىمى دەپۋتاتتارىن كەزەكتەن تىس سايلاۋ وتكەن بولاتىن. وسى ساياسي ناۋقاندا رەسپۋبليكا بويىنشا سايلاۋشىلار تىزىمدەرىنە 12 035 578 ازامات ەنگىزىلسە، ونىڭ ىشىندە 6 517 360 ادام داۋىس بەرۋگە قاتىستى. داۋىس بەرگەندەردىڭ ىشىندە 248 291 ادام نەمەسە داۋىس بەرۋگە قاتىسقان سايلاۋشىلاردىڭ 3،90 پايىزى عانا «بارىنە قارسىمىن» باعانىن تاڭداعان. دەگەنمەن، بيۋللەتەنگە ەنگىزىلگەن ءدال وسى باعان الداعى سايلاۋلاردا داۋىس بەرۋشىلەر سانىنىڭ ارتۋىنا ىقپال ەتۋى مۇمكىن.
جالپى، داۋىس بەرۋگە كەلگەن كەز كەلگەن سايلاۋشىنىڭ تىزىمدەگى ۇمىتكەرلەرگە ءوزىنىڭ قارسىلىعىن ايقىن بىلدىرە الۋى دەموكراتيالىق قوعامنىڭ ايقىن كورىنىسى دەسەك تە بولادى. ياعني، ەل تۇرعىندارى سايلاۋعا ءتۇسىپ جاتقان كانديداتتارعا نارازىلىعىن اشىق كورسەتەدى. سونىمەن قاتار داۋىس بەرۋ ناتيجەسىندە «بارىنە قارسىمىن» باعانىن كورسەتكەن ادامداردىڭ سانى بيىلىك ءۇشىن دە، ساراپشىلار ءۇشىن دە، سايلاۋعا تۇسكەن كانديداتتار ءۇشىن دە وتە ماڭىزدى. وسى باعان ارقىلى كەز كەلگەن كانديدات نەمەسە ساياسي پارتيا وزدەرىنىڭ سايلاۋالدى باعدارلاماسىنىڭ حالىقتىڭ كوڭىلىنەن قانشالىقتى شىققانىن نە شىقپاعاندىعىن، ونىڭ قانشالىقتى ءتيىمدى ەكەندىگىن بىلە الادى.
قورىتا ايتقاندا، سايلاۋ بيۋللەتەنىنە «بارىنە قارسىمىن» باعانىنىڭ ەنگىزىلۋى سايلاۋشىلاردىڭ قۇقىقتارىن كەڭەيتىپ، سايلاۋ پروسەسىنىڭ اشىقتىعىن ارتتىرا تۇسۋگە سەپتىگىن تيگىزىپ وتىرعانى انىق.
