ايەلىن ءولتىردى دەپ ايىپتالعان قۋاندىق بيشىمبايەۆقا قاتىستى سوت پروسەسى اياقتالدى. سۋديا ايجان قۇلبايەۆا سالتانات نۇكەنوۆانى ءولتىردى دەپ ايىپتالعان ەكس-مينيسترگە 24 جىل جازا كەستى، دەپ حابارلايدى Ulys.

«جازا مولشەرى تۋرالى ماسەلەنى سۋديا مەن القابيلەر اشىق داۋىس بەرۋ ارقىلى شەشتى. سوت ۇكىمىمەن بيشىمبايەۆ 24 جىلعا، بايجانوۆ 4 جىلعا باس بوستاندىعىنان ايىرىلدى»، - دەدى سۋديا.

ەسكە سالساق، 2023 جىلى 9 قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

ەل اراسىندا «حۋتورسكيە» قىلمىستىق توبىنىڭ ليدەرى دەلىنگەن حاسان قاسىمبايەۆ ۇستالدى. بۇل اقپاراتتى الماتى وبلىسىنىڭ پوليسيا دەپارتامەنتى راستادى، دەپ حابارلايدى Ulys.

«جەدەل-تەرگەۋ ءىس-شارالارىنىڭ ناتيجەسىندە جوعارىدا اتالعان قىلمىستىق ارەكەتتەرگە قاتىسى بار دەگەن كۇدىكپەن 2024 جىلعى 2 قاراشادا ق. ەسىمدى ازامات ۇستالىپ، ۋاقىتشا ۇستاۋ يزولياتورىنا قامالدى. ءقازىر قىلمىستىڭ بارلىق ءمان-جايىن جان-جاقتى، تولىق جانە وبەكتيۆتى زەرتتەۋ ءۇشىن تەرگەۋ امالدارى جۇرگىزىلىپ جاتىر. ءىس ماتەريالدارى بۇلتارتپاۋ شاراسىن سانكسيالاۋ ءۇشىن سوتقا جولداندى»، - دەلىنگەن حابارلامادا.

تەرگەۋ بارىسى وبلىستىق پوليسيا دەپارتامەنتى باسشىلىعىنىڭ باقىلاۋىنا الىندى. وزگە اقپارات تەرگەۋ مۇددەسى ءۇشىن جاريا ەتىلمەيدى.

ەستەرىڭىزگە سالايىق، 16 جاستاعى شەرزات پولاتتىڭ قازاسىنان كەيىن الەۋمەتتىك جەلىدە تالعاردا «حۋتورسكيە» ۇيىمداسقان قىلمىستىق توبى بار ەكەنى، ونىڭ ليدەرى حاسان قاسىمبايەۆ ەكەنى تۋرالى قاۋەسەت تاراي باستادى. الايدا ىشكى ىستەر مينيسترلىگى قاسىمبايەۆتىڭ كۇدىكتىلەرمەن بايلانىسى انىقتالماعانىن، «حۋتورسكيە» دەگەن باندا دا جوق ەكەنىن مالىمدەگەن.

ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلۋدە. بۇل تۋرالى قارجىلىق مونيتورينگ اگەنتتىگى حابارلادى.

«ول كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن استام قاراجاتتى جىمقىردى دەپ كۇدىكتەلۋدە. قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا پايدالانىلدى. بيىل كوكتەمدە ول ەلورداداعى اۆتوسالونداردا 88 ملن تەڭگەگە „Mercedes-Benz S450“، 80 ملن تەڭگەگە „Lexus LX-600“ جانە 39 ملن تەڭگەگە „Haval“ اۆتوكولىكتەرىن ساتىپ الدى. وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى „Akbulak Riviera“، „Highvill Ishim Gold“، „كوك جايلاۋ“ تك (تۇراق ورىندارىن قوسا العاندا)، سونداي-اق „Vela Village“ كوتتەدج قالاشىعىندا جىلجىمايتىن مۇلىك نىساندارىن ساتىپ الدى.سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى „St. Regis“، „Shangri-La“، „Palazzo Versace“ جانە „Kempinski“ سياقتى بەس جۇلدىزدى قوناق ۇيلەردە دەمالعان. بۇل ەلدەردە ول „Cartier“ جانە „Louis Vuitton“ سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان»، — دەلىنگەن اگەنتتىك حابارلاماسىندا.

قارجىلىق مونيتورينگ اگەنتتىگىنىڭ مالىمەتىنشە، كۇدىكتى قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ قاراجاتىن قولما-قول اقشاعا اينالدىرىپ وتىرعان. پەريزات ق. ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان.

كۇدىكتى ۇستالدى.