باعدات مۋسين «قازاقتەلەكوم» اق باسقارما ءتوراعاسى بولىپ تاعايىندالدى، دەپ حابارلايدى Ulys «سامۇرىق-قازىنا» قورىنا سىلتەمە جاساپ.
ايتا كەتەيىك كومپانيانىڭ بۇرىنعى باسشىسى قۋانىشبەك ەسەكەيەۆ بۇگىن پرەزيدەنتتىڭ كەڭەسشىسى قىزمەتىنە تاعايىندالدى.
«باعدات مۋسينگە قوردىڭ ەڭ ماڭىزدى اكتيۆتەرىنىڭ ءبىرىن باسقارۋدا ۇلكەن تابىس تىلەيمىن. سونداي-اق، قۋانىشبەك ەسەكەيەۆكە ەلىمىزدىڭ ەڭ ءىرى تەلەكوممۋنيكاسيالىق كومپانياسىن 14 جىلدان استام تابىستى باسقارعانى ءۇشىن العىس ايتامىن. قوردىڭ نەگىزگى كومپانيالارىنىڭ ءبىرى — „قازاقتەلەكوم“ اق-نىڭ دامۋىنا ءبىرىنشى باسشى رەتىندە قوسقان ۇلەسىڭىز شەكسىز»، — دەپ اتاپ ءوتتى قوردىڭ باسقارما ءتوراعاسى نۇرلان جاقىپوۆ.
باعدات مۋسين 2004 جىلى سۇلەيمەن دەميرەل اتىنداعى ۋنيۆەرسيتەتىندە «ەسەپتەۋ تەحنيكاسىن باعدارلامالىق جانە تەحنيكالىق قامتاماسىز ەتۋ» ماماندىعىن الىپ شىققان.
2006 جىلى قازاق قۇقىق جانە حالىقارالىق قاتىناستار ينستيتۋتىن زاڭگەر ماماندىعى بويىنشا ءتامامدايدى.
ەڭبەك جولىن 2004 جىلى «ۇلتتىق اقپاراتتىق تەحنولوگيالار» اق-دا باعدارلامالىق قامتاماسىز ەتۋ جونىندەگى باس ينجەنەر بولىپ باستادى.
2007 جىلدان 2020 جىلعا دەيىن ق ر ادىلەت مينيسترلىگىندە، ق ر بايلانىس جانە اقپارات مينيسترلىگىندە، قازاقستان رەسپۋبليكاسىنىڭ باس پروكۋراتۋراسىندا ءتۇرلى مەملەكەتتىك قىزمەتتەردى اتقاردى.
سونداي-اق قازاقستان رەسپۋبليكاسى پرەزيدەنتىنىڭ قازاقستان رەسپۋبليكاسى سيفرلاندىرۋ جانە يننوۆاسيالىق تەحنولوگيالار بويىنشا كەڭەسشىسى بولدى. باسقا دا مەملەكەتتىك لاۋازىمداردا قىزمەت اتقاردى.
سوڭعى بىرنەشە جىلدا — 2020 جىلدان 2024 جىلعا دەيىن — قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى قىزمەتىن اتقاردى.
سونىمەن قاتار جەكە كومپانيالاردا، ونىڭ ىشىندە كورپوراتيۆتىك ۆەنچۋرلىق قورلاردىڭ باسشىسى بولدى.
2014-2016 جىلدار ارالىعىندا باعدات مۋسين «قازپوشتا» كومپانياسىن باسقاردى.
ەسكە سالا كەتەيىك، ءبىر اي بۇرىن باعدات مۋسين مەملەكەت باسشىسىنىڭ جارلىعىمەن لاۋازىمىنان بوساتىلعان ەدى.
