ەلورداداعى نازاربايەۆ ۋنيۆەرسيتەتىندە جىل سايىن «ناۋرىز مەيرامى» شاراسى ءوتىپ تۇرادى. ول وقۋ ورنى قىزمەتكەرلەرى مەن قوناقتارىنا جانە ستۋدەنتتەرگە ارنالعان. بيىل مەرەكەلىك باعدارلاما اياسىندا العاش رەت اتالعان ۋنيۆەرسيتەتتىڭ حالىقارالىق ستۋدەنتتەرىنىڭ جارمەنكەسى ءوتىپ، قازاقستانداعى ديپلوماتيالىق ميسسيا وكىلدىكتەرى مەن ەلشىلىكتەردىڭ قولداۋىمەن ءتۇرلى ەلدىڭ مادەنيەتى تانىتىلدى.
نازاربايەۆ ۋنيۆەرسيتەتىندە 55 ەلدىڭ پروفەسسورلارى جۇمىس ىستەيتىنىن، 17 ەلدەن جاستارى كەلىپ ءبىلىم الىپ جاتقانىن ايتا كەتكەن ابزال. سوندىقتان ءتۇرلى ەلدىڭ وكىلدەرى ءوز مەملەكەتىن، مادەنيەتىن مەن ءسالت-داستۇرىن تانىتۋعا كۇش سالادى. ءازىربايجاننىڭ قازاقستانداعى ەلشىگىنىڭ قولداۋىمەن نازاربايەۆ ۋنيۆەرسيتەتىنىڭ ماگيسترانتتارى يندجي گاسانوۆا مەن سافۋرا الييەۆا ءوز ەلدەرىن تانىتاتىن ەرەكشە ستەند قۇردى. ولار قوناقتارعا ءازىربايجاندا ناۋرىز مەيرامىنىڭ قالاي تويلاناتىنىڭ ءتۇسىندىرىپ، اتالعان مەرەكەگە قاتىستى جاسالاتىن ءسالت-داستۇر تۋرالى كەڭىنەن باياندادى. مەيماندار مول اقپاراتقا قانىعىپ قانا قويماي، ءازىربايجاننىڭ مەرەكەلىك پالاۋى مەن ءدامى ءتىل ۇيىرەتىن گۋتابى مەن پاحلاۆاسىنان دا اۋىز ءتيدى. سونىمەن قاتار، ستەندتەگى ۇلتتىق مۋزىكالىق اسپاپتار مەن جىبەك كىلەمدەر، ءازىربايجاننىڭ اسەم استاناسى باكۋدىڭ عاجاپ سۋرەتتەرى قوناقتاردىڭ قىزىعۋشىلىعىن وياتپاي قويمادى. شارا بارىسىندا ءازىربايجاندىق جاستار وزگە ەلدەردىڭ ستۋدەنتتەرىنىڭ قولداۋىمەن ءازىربايجاننىڭ حالىق ءبيى «ياللىنى» بيلەپ، «ساتسىزدىكتەردىڭ ءبارى وسى وتپەن بىرگە جانىپ كەتسىن» دەگەن تىلەكپەن سيمۆوليكالىق وتتان بىرىنەن كەيىن ءبىرى سەكىردى. وسىلايشا ءازىربايجاندىق ستۋدەنتتەر ءوز ەلىنىڭ ءداستۇرىن وزگەلەرگە بارىنشا تانىتتى. مىڭداعان جىلداردان بەرى تويلانىپ كەلە جاتقان شىعىستىڭ ورتاق مەرەكەسى جاستاردى ءتىپتى جاقىنداتا ءتۇستى.