ازەربايجان استاناسى باكۋدە تۇركى الەمىنىڭ ورتاق ءالىپبيى جونىندەگى كوميسسياسىنىڭ ەكىنشى وتىرىسى ءوتتى، دەپ حابارلايدى Ulys ۇلتتىق پورتالى قازاقپاراتقا سىلتەپ جاساپ. 

اتالعان جيىندى تۇركى اكادەمياسى ازەربايجان ۇلتتىق عىلىم اكادەمياسى ناسيمي اتىنداعى ءتىل ءبىلىمى ينستيتۋتىنىڭ قولداۋىمەن، اتاتۇرىك اتىنداعى مادەنيەت، ءتىل جانە تاريح جوعارى كەڭەسى جانىنداعى تۇرىك ءتىلى قوعامىمەن بىرلەسىپ ۇيىمداستىردى. وندا باۋىرلاس مەملەكەتتەردىڭ وكىلدەرى ورتاق ءالىپبي يدەياسىن ىلگەرىلەتۋ جانە وسى باعىتتاعى جاڭا قادامداردى تالقىلادى. كوميسسيا وتىرىسىنىڭ اشىلۋ سالتاناتىندا ءسوز سويلەگەن شاھين مۇستافايەۆ ورتاق ءالىپبي ماسەلەسى — تۇركى حالىقتارى ىنتىماقتاستىعىنىڭ ماڭىزدى باعىتى ەكەنىن اتاپ ءوتتى.

«تۇركى الەمىنىڭ بىرلىگىن نىعايتۋ ءۇشىن ءالىپبي بىرلىگىنە دە ءمان بەرىلۋى ءتيىس. سوڭعى جىلدارى تۇركى مەملەكەتتەرى اراسىنداعى ىنتىماقتاستىق ينستيتۋسيونالدى سيپاتقا يە بولعان سايىن، ورتاق ءالىپبي ماسەلەسى كۇن تارتىبىندە ءجيى كوتەرىلە باستادى، - دەدى مۇستافايەۆ.

باسقوسۋعا تۇرىك ءتىلى قوعامىنىڭ پرەزيدەنتى وسمان مەرت، ازەربايجان ۇلتتىق عىلىم اكادەمياسىنىڭ پرەزيدەنتى يسا گابيببەيلي، اتاتۇرىك ورتالىعىنىڭ ءتوراعاسى نيزامي دجافاروۆ جانە تمۇ اقساقالدار كەڭەسىنىڭ مۇشەسى گاسان گاسانوۆ، سونىمەن قاتار تۇركى مەملەكەتتەرى ۇيىمىنا مۇشە ەلدەردەن جانە باقىلاۋشى مەملەكەتتەردەن كەلگەن كوميسسيا مۇشەلەرى مەن ءتىل ءبىلىمى سالاسىنداعى عىلىمي-زەرتتەۋ ينستيتۋتتاردىڭ عالىمدارى قاتىستى.

ايتا كەتەيىك، تۇركى اكادەمياسىنىڭ بازاسىندا جۇمىس ىستەيتىن كوميسسيا ءار تاراپتان لينگۆيستيكالىق سالاعا جاۋاپتى ەكى مۇشەنىڭ قاتىسۋىمەن قۇرىلعان ەدى. كوميسسيانىڭ العاشقى وتىرىسى 2023 جىلدىڭ 29 مامىرىندا استانا قالاسىندا ءوتىپ، ءبىرقاتار ماڭىزدى شەشىم قابىلدانعان بولاتىن.

29-30 ساۋىردە ىستانبۇل قالاسىندا تۇركى مەملەكەتتەرى ۇيىمىنىڭ اعا لاۋازىمدى تۇلعالارى كوميتەتىنىڭ كەزەكتى 43ء-شى وتىرىسى وتەدى، دەپ حابارلايدى Ulys.

 «كەزدەسۋدە 2023 جىلعى 3 قاراشادا استانادا وتكەن ۇيىمنىڭ 10-شى ءسامميتى بارىسىندا قول جەتكىزىلگەن ۋاعدالاستىقتاردىڭ ورىندالۋ بارىسى، وسى جازدا ازەربايجاندا جوسپارلانىپ وتىرعان ۇيىمنىڭ بەيرەسمي ءسامميتى جانە 2024 جىلعى قازاندا قىرعىزستاندا جوسپارلانىپ وتىرعان ۇيىمنىڭ كەزەكتى 11ء-شى ءسامميتى بويىنشا دايىندىق جۇمىستارى، سونداي-اق ۇيىم شەڭبەرىندەگى ىنتىماقتاستىقتى ودان ءارى نىعايتۋ بويىنشا وزەكتى ماسەلەلەرى قاراستىرىلادى»، — دەدى ايبەك سمادياروۆ مينيسترلىكتىڭ اپتالىق بريفينگىندە.

سونداي-اق، 30 ساۋىردە باكۋ قالاسىندا تۇركى مادەنيەتى جانە مۇراسى قورى كەڭەسىنىڭ 1ء-شى وتىرىسى وتەدى. كەڭەس قۇرامىنا قورعا مۇشە ەلدەردىڭ مادەنيەت مينيسترلەرى كىرەدى.

قازاقستان دەلەگاسياسىن مادەنيەت جانە اقپارات ءمينيسترى ايدا بالايەۆا باستاپ باراتىن بولادى.