«قازاقستان» تەلەراديوكورپوراسياسى ۇلىستىڭ ۇلى كۇنىن جوعارى دەڭگەيدە اتاپ وتپەك. ماسەلەن، كورپوراسيا قۇرامىنا كىرەتىن «Qazaqstan»، «Qazsport»، «balapan»، «Tamasha Tv»، جانە ايماقتىق 14 فيليال بيىل ءاز ناۋرىزعا ەرەكشە تارتۋ جاساماق. بۇگىن ورتالىق كوممۋنيكاسيالار قىزمەتىندە «ناۋرىز مەرەكەسىنە تارتۋ» اتتى ارنايى باسپاسوز-كونفەرەنسياسىندا جان-جاقتى ايتىلدى.
بريفينگكە «Qazaqstan» تەلەارناسىنىڭ ديرەكتورى ەركىن مۇحامەدجانوۆ، «Qazsport» تەلەارناسىنىڭ ديرەكتورى پاۆەل سىبۋلين، «Tamasha Tv» تەلەارناسىنىڭ ديرەكتورى ەسەن ەلەۋكەن، «balapan» تەلەارناسىنىڭ ديرەكتورى ماقپال جۇماباي جانە ايماقتىق حابار تاراتۋدى دامىتۋ ديرەكسياسىنىڭ ديرەكتورى ەرجانار اشەيحان قاتىستى. «ۇلىستىڭ ۇلى كۇنى - ناۋرىز حالقىمىزدىڭ ەجەلدەن كەلە جاتقان بەرەكەلى مەرەكەسى. بۇل ءسالت-داستۇرىمىز بەن ادەت-عۇرپىمىزدى ۇلىقتايتىن، رۋحاني مادەنيەتىمىزدى اسقاقتاتاتىن ەرەكشە مەيرام. ۇلتتىق ارنا وسى اتاۋلى كۇندى ءداستۇر بويىنشا ەرەكشە اتاپ وتۋگە تىرىسادى. سوندىقتان، الدىن-الا بىرنەشە ارنايى جوبالار جوسپارلانادى. ناۋرىزدىڭ 21-ىنەن باستاپ، ءۇش كۇن قاتارىنان ادامزات تاريحىنداعى جىلقىنىڭ ءرولى مەن ورتالىق ازيا دالالارىنداعى جىلقىنىڭ شىعۋ تەگى تۋرالى باياندايتىن حالىقارالىق «Equus: جىلقى تاريحى» اتتى دەرەكتى تريلوگيانىڭ تۇساۋكەسەرى بولماق. سونداي-اق، ناۋرىزدىڭ 22ء-سى كۇنى، ناۋرىز مەرەكەسىنە وراي ۇلتتىق ارنا تۇركيا، قىرعىز رەسپۋبليكاسى، وزبەكستان سەكىلدى باۋىرلاس مەملەكەتتەرمەن حالىقارالىق تەلەكوپىر ارقىلى بايلانىس ورناتىپ، ءار ەلدەگى مەرەكەلىك اتموسفەرامەن ءبولىسىپ، سول ەلدەردەگى ناۋرىز مەرەكەسىن تويلاۋ ءداستۇرى جايلى سيۋجەتتەر مەن ارنايى سۇحباتتار ۇسىناتىن بولامىز. سونىمەن قاتار، مەرەكە كۇندەرى «كۇننەن تۋعان بالا...»، «امال ايشىقتارى» سەكىلدى دەرەكتى سيپاتتاعى ارنايى جوبالار ءۇش كۇن قاتارىنان ەفيرگە شىعادى. تاعى ءبىر ەرەكشە ايتا كەتەتىن اقپارات – بيىل ءبىز «ناۋرىز-دۋمان» اتتى ارنايى جوبا جوسپارلاپ، ەفيرگە ازىرلەدىك. ۇزاقتىعى 2،30 ساعاتقا سوزىلاتىن جاڭا جوبا ناۋرىز مەرەكەسىنە وراي كورەرمەندەرگە ارناعان ۇلكەن تارتۋىمىز. مەرەكەلىك كونسەرتىمىز بىرنەشە سيۋجەت جەلىسىمەن ءورىلىپ وتىرماق. قازاق ونەرىنىڭ جارىق جۇلدىزدارى سول كەشتە ونەر كورسەتەدى. بۇل ءوز جاڭا-جىلىمىزدى ۇلىقتاۋدىڭ ءبىر كورىنىسى دەپ كەسىپ ايتا الامىز»،- دەدى «Qazaqstan» تەلەارناسىنىڭ ديرەكتورى ەركىن مۇحامەدجانوۆ.
ال، «Qazsport» تەلەارناسى مەيرام كۇندەرى تىكەلەي ەفيردە فۋتبولدان قازاقستان ۇلتتىق قۇراماسىنىڭ ەۋروپا چەمپيوناتىنا ىرىكتەۋ ويىندارىن، ءبىرقاتار قىزىقتى باعدارلامالار، دەرەكتى فيلمدەر مەن سپورت ساڭلاقتارىنىڭ سۇحباتتارىن كورسەتەدى. پاۆەل ءسىبۋليننىڭ ايتۋىنشا: «كورەرمەندەرىمىز 21 ناۋرىز كۇنى ءححىح قىسقى ۋنيۆەرسيادا ويىندارىنىڭ قولا جۇلدەگەرى جانبوتا الدابەرگەننىڭ «Qazsport» قوناعى باعدارلاماسىنداعى سۇحباتىن، ودان بولەك، بىرنەشە دەرەكتى فيلمدەر، اتاپ ايتقاندا: اتى اڭىزعا اينالعان قازاق قاقپاشىسى قۇرالبەك وردابايەۆ جايىندا - «قازاقتىڭ №1 قاقپاشاسى»، قازاق بوكسىنىڭ دامۋىنا ۇلكەن ۇلەس قوسقان جاتتىقتىرۋشى مىرزاعالي ايتجانوۆ تۋرالى - «بولمىسى بولەك باپكەر»، ال، 22 ناۋرىزدا تالانتتى بىلعارى قولعاپ شەبەرى، 2005 جىلعى الەم چەمپيونى ەردوس جاڭابەرگەنوۆ جايىندا «دارابوز»،حالىقارالىق «اتلانت» فەستيۆالىنىڭ جەڭىمپازى اتانعان «يستوريا مالەنكوي رۋسالكي» دەرەكتى فيلمدەرىن تاماشالاي الادى. ال، 23 ناۋرىز كۇنى «ابسەنت - وليمپييسكيي چەمپيون يز كازاحسكيح ستەپەي!» اتتى دەرەكتى فيلم كورسەتىلەدى. بۇل فيلمدە قازاق جەرىندە دۇنيەگە كەلگەن، اتى اڭىزعا اينالعان، اسىل تۇقىمدى احالتەكە – ابسەنتتىڭ جەتىستىكتەرى باياندالادى. الماتى يپپودرومىن الەمگە پاش ەتىپ، داڭقىن اسقاقتاتقان جىلقىعا لۋگوۆوە جىلقى زاۋىتىندا ەسكەرتكىش ورناتىلدى. ودان باسقا، 2020 جىلى وتەتىن ەۋروپا چەمپيوناتىنىڭ ىرىكتەۋ كەزەڭىندەگى قازاقستان قۇراماسىنىڭ شوتلانديامەن كەزدەسۋى تىكەلەي ەفيردە وتەدى. ايتا كەتەيىن، «QAZAQ PROMOTION» اتتى كاسىپقوي بوكس كەشىن دە كورسەتەتىن بولامىز. فۋتبول سۇيەر قاۋىم ءۇشىن جاعىمدى جاڭالىق: چەمپيوندار ليگاسىنىڭ پلەي-وفف كەزەڭىندەگى تارتىستى ءارى قىزىقتى ماچتار «رەال مادريد»-«اياكس» جانە «پسج» مەن «مانچەستەر يۋنايتەد» اراسىنداعى ماچتاردى قايتالايمىز. اتىراۋ قالاسىندا وتكەن «M-1 Challenge 100» ارالاس جەكپە-جەك ءتۋرنيرىن كورسەتەمىز. ال، 24 ناۋرىزدا كاسىبقوي رينگتە قازاقتىڭ اتىن شىعارىپ جۇرگەن ساڭلاقتار – جانىبەك ءالىمحان ۇلى مەن سادريددين احمەدوۆتىڭ جەكپە-جەكتەرىنىڭ قايتالاۋلارىن ۇسىنامىز. سونىمەن قاتار،فۋتبولسۇيەر قاۋىم «EURO 2020-عا» ىرىكتەۋ كەزەڭىندەگى قازاقستان قۇراماسى مەن رەسەي اراسىنداعى ماچتى تىكەلەي ەفيردە كورەتىن بولادى،»-دەدى.
ال «balapan» تەلەارناسىنىڭ دا بالالارعا بازارلىعى دايىن. كىشكەنتاي كورەرمەندەردىڭ نازارىنا كوكتەمگى تەلەماۋسىمدا بارلىعى 22 جوبا ۇسىنىلعان. ونىڭ ىشىندە 6-ى ىشكى ءونىم، ال 10-ى شەتەلدىك ۇزدىك انيماسيالار مەن دەرەكتى فيلمدەر توپتاماسى، 3 تەلەحيكايا جانە 3 You Tube-قا ارنالعان جوبالار. «بيىل بالالار ارناسىندا تۇڭعىش رەت تاڭعى باعدارلاما جارىققا شىقتى. ويىن-ساۋىق جانە اقپاراتتىق باعىتتاعى «تاڭجارىق» حابارىن كىشكەنتاي كورەرمەندەر سەنبى جانە جەكسەنبى كۇندەرى تاماشالاي الادى. ال «بالامەن سۇحبات» باعدارلاماسىندا بالالار ەلىمىزگە بەلگىلى، ءومىرى مەن ەڭبەك جولى ۇرپاققا ۇلگى بولارلىق تۇلعالارمەن اڭگىمە-دۇكەن تۇرىندە سۇحبات قۇرادى. «balapan» ارناسى بيىل 22 ناۋرىز – ۇلىستىڭ ۇلى كۇنىنە وراي ارنايى مەرەكەلىك جوبالار دا دايىندادى. تەلەارنامەن ۇنەمى شىعارماشىلىق بايلانىستا بولىپ، بەلسەندىلىك تانىتقان ەلوردا مەكتەپتەرى اراسىندا «ناۋرىز-دۋمان» اتتى ۇلتتىق ويىندار وتكىزىلدى. مۇندا 8-9 جاسار مەكتەپ وقۋشىلارى «بۇقا تارتىس»، «كۇي تارتىس»، «قازاقشا كۇرەس»، «جامبى اتۋ»، «اسىق اتۋ» سياقتى ۇلتتىق ويىندار بويىنشا سايىسقا ءتۇستى. بۇل جوبانىڭ تەليەۆيزيالىق نۇسقاسى مەرەكە قارساڭىندا ەفيردەن كورسەتىلەدى. سونداي-اق، جوعارىدا اتاپ وتكەن ىشكى ءونىم جوبالارىنىڭ دا مەرەكەلىك شىعارىلىمدارى بولادى. ستۋديالار مەرەكەگە ساي ۇلتتىق ۇلگىدە بەزەندىرىلەدى. ۇلتتىق ءداستۇر، ادەت-عۇرىپ بارىنشا ناسيحاتتالادى. ەرەكشە اتاپ وتەرلىگى، «تاڭجارىق» باعدارلاماسىندا ەلىمىزدەگى «ەڭ كۇشتى بالا» اتانعان، 6 جاسار رەكوردشى بەكمانسۇر تيمۋر ۇلى جۇرگىزۋشىلەرمەن اسىق اتىپ سايىسادى. ال اسپاز بالاقايلار ۇلتتىق تاعام تۇرلەرىن دايىنداپ، ءوز شەبەرلىكتەرىن ورتاعا سالادى. «Bala Time» حابارىنىڭ ارنايى قوناعى، مايرا ءىلياسوۆا ستۋديامىزعا كەلگەن كىشكەنتاي كورەرمەننىڭ تۇساۋىن كەسىپ، باعدارلامادا ۇلتتىق داستۇرىمىزدەن ءۇزىندى كورسەتىلەدى. «بالامەن سۇحبات» باعدارلاماسىندا بەلگىلى ەتنوگراف جامبىل ارتىقبايەۆ بالالارعا حالقىمىزدىڭ ۇمىت بولا باستاعان كونە ويىندارىن ۇيرەتىپ، سالت-داستۇردەن سىر شەرتەدى. سونىمەن قاتار، دەمالىس كۇندەرى «بەللدىڭ تاڭعجايىپ الەمى» جانە «سۇلۋ مەن قۇبىجىق» اتتى تولىقمەتراجدى انيماسيالىق فيلمدەر كورەرمەن نازارىنا تۇڭعىش رەت قازاق تىلىندە ۇسىنىلادى»،-دەدى «balapan» تەلەارناسىنىڭ ديرەكتورى ماقپال جۇماباي.
«قازاقستان» تەلەراديوكورپوراسياسىنىڭ قۇرامىنا كىرەتىن ايماقتىق تەلەارنالار دا ناۋرىز مەرەكەسىنە وراي ءبىرقاتار ارنايى جوبالار دايىنداعانىن اتاپ ءوتتى. ايماقتىق حابار تاراتۋدى دامىتۋ ديرەكسياسىنىڭ ديرەكتورى ەرجانار اشەيحان بىرنەشە جوبالارعا توقتالىپ ءوتتى: «2019 جىلدىڭ 22 ناۋرىزىندا ۇلىستىڭ ۇلى كۇنىندە كورپوراسيانىڭ ايماقتىق ارنالارىندا ءبىر مەزگىلدە كوكتەمگى جاڭا تەليەۆيزيالىق ماۋسىمى باستالادى. ايماقتىق تەلەارنالاردى قوسىپ العاندا، بارلىعى 61 جاڭا باعدارلاما ەفيرگە جوسپارلانعان بولاتىن. 22 ناۋرىز كۇنى «ALTAI»، «OŃTÚSTIK»، «AQTÓBE»، «MAŃǴYSTAÝ» ارنالارى «QAZAQSTAN» ۇلتتىق ارناسىنا تىكەلەي ەفيردە قوسىلىپ، ايماقتاعى ناۋرىز مەرەكەسىنىڭ تويلانۋ تۋرالى قىزىقتى مالىمەتتەر مەن سيۋجەتتەر بەرەدى. جالپى، ۇلىستىڭ ۇلى كۇنىنە بايلانىستى ايماقتىق ارنالار 56 تەليەۆيزيالىق جوبا دايىنداپ وتىر. «SARYARQA» ارناسى «ناۋرىزىم»، «QOSTANAI» ارناسى «اۋىلعا بارام» اتتى ەكى 2 قىسقا مەتراجدى فيلم ءتۇسىردى. ال، «ATYRAÝ» تەلەارناسى «نۇر جاۋعان ناۋرىز» اتتى رەسەيدىڭ استراحان، ازەربايجاننىڭ گيانجا قالالارى اراسىندا ەلارالىق تەلەكوپىر وتكىزەدى.
2018 جىلدىڭ 1 قىركۇيەگىنەن حابار تاراتا باستاعان «Tamasha tv» ارناسىنىڭ ديرەكتورى ەسەن ەلەۋكەن دە بىرنەشە جاڭالىقتارىمەن ءبولىستى. ونىڭ ايتۋىنشا: «جاڭا ماۋسىم اياسىندا بيىل كورەرمەندەرىمىزگە 14 جوبا تارتۋ ەتپەكپىز. العاشقى 8 جوبا ناۋرىز ايىندا شىقسا، قالعان 6 جوبانى ساۋىرگە جوسپارلاپ وتىرمىز. ولاردىڭ بارلىعى دەرلىك جاڭادان شىعىپ جاتقان باعدارلامار، ارينە ازىلگە قاتىستى. سونداي-اق، ويىن-ساۋىقتىق باعدارلامالار دا بار. ەڭ باستى ۇلكەن جوبالارىمىزدىڭ ءبىرى «تاماشا Club»، ازىلگە قاتىسى بار جاستاردىڭ ءارتۇرلى وبرازداعى قىسقاشا قويىلىمداردان قۇرالعان سكەچ-شوۋ. «ءبىر عانيبەت» جوباسىن دا ەرەكشە اتاپ وتكىم كەلەدى، ءبىزدىڭ بەلگىلى اعا-اپكەلەرىمىز وزدەرىنىڭ باسىنان وتكەن ازىلگە تولى قىزىقتى وقيعالارىمەن بولىسەدى. سونداي-اق، جالپى قازاق ساتيراسىنا، قازاق ازىلىنە، قازاق قالجىنىنا قاتىستى ومىردەن وتكەن جاندارعا ارنالعان «ءازىل-داستان» جوباسى شىعاتىن بولادى. بۇل جوبانى تانىمال ساتيريك - كوپەن امىربەك جۇرگىزەدى. ال، «تاۋىپ كور» تانىمدىق باعدارلاماسىنا قاراپايىم ادامدار قاتىسادى. ولار وزدەرىنە بەرىلگەن 4-5 تاپسىرما ارقىلى كىممەن سويلەسىپ وتىرعانىن تاۋىپ الۋعا تىرىساتىن بولادى. ءازىل سۇيەر كورەرمەندەرگە ايتا كەتەيىن، «تamasha tv» ارناسىن «قازاقستان» تەلەراديوكورپوراسياسىنىڭ «Qazaqstan tv» موبيلدىك قوسىمشاسى ارقىلى كورۋگە مۇمكىندىك تۋىپ وتىر. قازىرگى تاڭدا قوسىمشانى اندرويد نۇسقالارىندا جۇكتەپ الۋعا بلادى، جاقىندا IOS-قا دا قوسىلادى دەپ جوسپارلانۋدا. سونىمەن قاتار،باعدارلامالاردىڭ ءبارىن tamashakz.tv سايتى ارقىلى تىكەلەي ەفيردە كورۋگە بولادى. ال، الداعى ءساۋىر ايلارىندا ەلىمىزدىڭ بارلىق كابەلدىك وپەراتورلارىنا تولىق قوسىلادى. قازىرگى كەزدە «وتاۋ تۆ» - دان شىعىپ جاتىرمىز. جاقىندا ID TV مەن الما تۆ-عا تولىق قوسىلامىز دەگەن ويدامىز.»- دەپ اياقتادى ەسەن ەلەۋكەن.
