پارلامەنت پالاتالارىنىڭ بىرلەسكەن وتىرىسى بارىسىندا ق ر پرەمەر-مينيسترى ولجاس بەكتەنوۆ اۋقىمدى سۋ تاسقىنىنىڭ سالدارىن جويۋ جونىندەگى قالپىنا كەلتىرۋ جۇمىستارىنىڭ بارىسىنا تۇسىنىكتەمە بەردى. بۇل تۋرالى ۇكىمەتتىڭ باسپا ءسوز قىزمەتى حابارلادى.

ۇكىمەت باسشىسى سۋ تاسقىنى مىڭداعان ازاماتقا، سونداي-اق ينفراقۇرىلىمعا، ەكونوميكاعا جانە جالپى ەلىمىزگە ايتارلىقتاي زيان كەلتىرگەنىن اتاپ ءوتتى.

120 مىڭنان استام ادام ءوز ۇيىنەن ەۆاكۋاسيالاندى. ولاردىڭ 67 570ء-ى ۇيلەرىنە ورالدى. بۇل رەتتە بۇگىن تاڭەرتەڭگى مالىمەت بويىنشا 3 952 ادام ەۆاكۋاسيالىق پۋنكتتەردە قالىپ وتىر. بارلىعى 12 مىڭ تۇرعىن ءۇي (جتق) جانە 26 مىڭ ساياجاي ۋچاسكەلەرى سۋ استىندا قالدى. سۋ استىندا قالىپ وتىرعان ءۇيدىڭ سانى — 98.

«كومەك كورسەتۋ بويىنشا اۋقىمدى جۇمىس اتقارىلۋدا. مەملەكەت باسشىسىنىڭ ۇندەۋىنە جاۋاپ بەرە وتىرىپ، ءىرى بيزنەس ەلەۋلى قولداۋ كورسەتتى، بيۋدجەتتىك رەسۋرستار دا تارتىلدى. بۇگىنگى تاڭدا 33 141 وتباسى 100 اەك كولەمىندە وتەماقى الدى. وسى ماقساتقا بيۋدجەتتەن 12 ملرد تەڭگەدەن استام قارجى ءبولىندى»، — دەدى ولجاس بەكتەنوۆ.   

ونىڭ ايتۋىنشا، زارداپ شەككەن 17 982 ءۇي بويىنشا تەكسەرۋ جۇرگىزىلدى، 15 685 ءۇيدى باعالاۋ اياقتالدى. ۇيلەردىڭ جارتىسىنا جۋىعى جوندەۋ مەن قالپىنا كەلتىرۋدى قاجەت ەتەدى. وسى ماقساتتارعا وراي 5823 وتباسى وتەماقى الدى. وعان 38،6 ملرد تەڭگە ءبولىندى.

8 مىڭنان استام ءۇي اپاتتى جاعدايدا دەپ تانىلدى. ولار ءۇشىن زياندى وتەۋدىڭ 2 نۇسقاسى بار:

1. پاتەرلەردى نەمەسە ۇيلەردى قايتالاما نارىقتا ساتىپ الۋ؛

2. ءۇي سالۋ.

«ءبىز پرەزيدەنتتىڭ تاپسىرماسىنا سايكەس زارداپ شەككەن ازاماتتاردىڭ تالاپ-تىلەگىن ورىندايمىز. بۇگىنگى تاڭدا 3155 وتباسى جاڭا باسپانا الدى. ءتۇرلى وڭىرلەردە 2049 ءۇيدىڭ قۇرىلىسى بەلسەندى جۇرگىزىلىپ جاتىر. جالپى تۇرعىن ءۇيدى قالپىنا كەلتىرۋگە جانە سالۋعا 251 ملرد تەڭگە باعىتتالدى»، — دەپ اتاپ ءوتتى ق ر پرەمەر-مينيسترى.

سونىمەن قاتار ينجەنەرلىك جانە الەۋمەتتىك ينفراقۇرىلىمعا، جولدار ززيىن كەلدى. اتاپ ايتقاندا، 2،3 مىڭنان استام ەنەرگيامەن جابدىقتاۋ تىرەكتەرى قيراپ، 54 كم جەلى ءۇزىلدى. بۇگىنگى تاڭدا 40% قالپىنا كەلتىرىلدى، جاز ايلارىندا جۇمىس بەلسەندى جالعاساتىن بولادى.

رەسپۋبليكالىق جانە جەرگىلىكتى جولداردىڭ 290 ۋچاسكەسىندە اۆتوموبيل قاتىناسى ءۇزىلدى. بۇگىندە اتىراۋ وبلىسىندا ءبىر ۋچاسكەنى قوسپاعاندا، بارلىق ۋچاسكەلەر بويىنشا قوزعالىس قالپىنا كەلتىرىلدى. اتالعان ۋچاسكەدەگى قوزعالىس سۋ كەتكەن كەزدە اشىلادى.

سونىمەن قاتار، 39 ءبىلىم بەرۋ نىسانى سۋ استىندا قالدى. ونىڭ 18ء-ى اعىمداعى جوندەۋدى، 11ء-ى كۇردەلى جوندەۋدى قاجەت ەتەدى، 9 ءبىلىم بەرۋ نىسانى ودان ءارى پايدالانۋعا مۇلدەم جارامسىز جانە جاڭادان سالىنادى. ءبىر ءبىلىم بەرۋ نىسانىندا ءالى دە تەكسەرۋ ءراسىمى جۇرگىزىلىپ جاتىر.

«پرەزيدەنتتىڭ تاپسىرماسىنا سايكەس، كۇن سۋىتقانعا دەيىن بارلىق ازامات جاڭا تۇرعىنۇيگە قونىستانىپ، بارلىق ينفراقۇرىلىم نىساندارى قالپىنا كەلتىرىلەتىن بولادى»، — دەپ تۇيىندەدى ولجاس بەكتەنوۆ.

ەلىمىزدە سۋ تاسقىنى سالدارىن جويۋ جانە زارداپ شەككەن ازاماتتارعا جان-جاقتى كومەك كورسەتۋ جۇمىستارى جالعاسۋدا. بۇل تۋرالى پرەمەر-مينيستردىڭ توراعالىعىمەن وتكەن ۇكىمەت وتىرىسىندا ۆيسە-پرەمەر قانات بوزىمبايەۆ ايتتى، دەپ حابارلايدى Ulys ۇكىمەتتىڭ باسپا ءسوز قىزمەتىنە سىلتەمە جاساپ.

زارداپ شەككەندەردى باسپانامەن قامتۋ  

67 مىڭنان استام ادام ءوز ۇيىنە ورالدى. ەۆاكۋاسيالىق پۋنكتتەردەگى 3 664 تۇرعىنعا بارلىق قاجەتتى كومەك كورسەتىلەدى.

سۋ تاسقىنىنان زارداپ شەككەندەردىڭ جالعىز باسپاناسى سانالاتىن 12 086 تۇرعىن ءۇي مەن 7 380 ساياجاي قۇرىلىسى سۋ استىندا قالدى. زارداپ شەككەن وڭىرلەردە 18 228 تۇرعىن ءۇي تەكسەرىلىپ، 15 651 وبەكت بويىنشا باعالاۋ اياقتالدى.

باعالاۋ قورىتىندىسى بويىنشا 9 306 ءۇي جوندەۋگە جاتقىزىلدى، 8 190 ءۇي قالپىنا كەلتىرىلمەيتىنى انىقتالدى، ولار بويىنشا قايتالاما نارىقتا 5 714 ءۇي مەن پاتەر ساتىپ الۋ، سونداي-اق ۇلگىلىك جوبا بويىنشا 2 576 ءۇي سالۋ جوسپارلانۋدا.

جالپى، تۇرعىن ءۇيدى قالپىنا كەلتىرۋگە شامامەن 257 ملرد تەڭگە قاجەت.

قازىرگى ۋاقىتتا تۇرعىن ءۇيدى جوندەۋگە جانە قالپىنا كەلتىرۋگە 40 ملرد تەڭگەگە وتەماقى 6 176 وتباسىنا بەرىلدى. 3 414 وتباسى قيراعان باسپاناسىنىڭ ورنىنا جاڭا ءۇي مەن پاتەر الدى. 

باتىس قازاقستان، قوستاناي، اتىراۋ، اقتوبە، اقمولا، سولتۇستىك قازاقستان جانە پاۆلودار وبلىستارىندا زارداپ شەككەن ازاماتتارعا ارنالعان 2،5 مىڭ جاڭا ءۇيدىڭ قۇرىلىسى باستالدى.

 100 اەك مولشەرىندە ءبىرجولعى تولەمدەر

24 ماۋسىمداعى جاعداي بويىنشا 33 321 وتباسى 12 ملرد تەڭگەدەن استام سوماعا 100 اەك مولشەرىندە ءبىرجولعى تولەم الدى.

بۇل جۇمىس قاراعاندى، پاۆلودار، اقمولا وبلىستارىندا جانە اباي، ۇلىتاۋ وبلىستارىندا تولىعىمەن اياقتالدى. تولەمدەر اقتوبە، باتىس قازاقستان، سولتۇستىك قازاقستان، قوستاناي جانە اتىراۋ وبلىستارىندا جالعاسۋدا.

 قوسىمشا شارالار 

زارداپ شەككەن تۇرعىندارعا 150 اەك-كە دەيىنگى مولشەردە جوعالعان قاجەتتى زاتتاردى ساتىپ الۋ ءۇشىن قوسىمشا وتەماقى تولەنەدى. 15 355 وتباسى 7،6 ملرد تەڭگەگە وتەماقى الدى.

سۋعا كەتكەن مالدىڭ وتەمى ءۇشىن مەملەكەتتىك كومەك كولەمى 2،8 ملرد تەڭگەدەن استى.

زارداپ شەككەن بيزنەستىڭ شىعىنىن وتەۋ بويىنشا جۇمىس باستالدى. قازىرگى ۋاقىتتا وڭىرلىك كوميسسيالار شوب سۋبەكتىلەرىنىڭ جالپى سوماسى 833 ملن تەڭگەدەن اساتىن 124 ءوتىنىمىن قاراپ، ماقۇلدادى.

اكىمدىكتەردىڭ الدىن الا باعالاۋى بويىنشا 797 شوب سۋبەكتىسى 24،1 ملرد تەڭگە سوماسىندا زارداپ شەككەن. وسى وبەكتىلەر بويىنشا باعالاۋ جانە سمەتالىق جۇمىستار جۇرگىزىلەدى، ولاردىڭ قورىتىندىسى بويىنشا وتىنىمدەر وڭىرلىك كوميسسيالاردىڭ قاراۋىنا شىعارىلاتىن بولادى.

ينفراقۇرىلىمدى قالپىنا كەلتىرۋگە جالپى قاجەتتىلىك 48،7 ملرد تەڭگەگە باعالاندى. بۇل قاراجات اۆتوموبيل جولدارىن، ەلەكترمەن جابدىقتاۋ جەلىلەرىن قالپىنا كەلتىرۋگە جانە الەۋمەتتىك وبەكتىلەردى جوندەۋگە باعىتتالادى. بۇگىنگى تاڭدا 39،8 ملرد تەڭگەگە جوبالار دايىندالدى. قۇجاتتاما قارجى مينيسترلىگىنە كەلىپ تۇسۋىنە قاراي ۇكىمەت باسقا جوبالار بويىنشا شەشىم قابىلدايتىن بولادى.

قاراجات اقمولا، اقتوبە، قوستاناي جانە سولتۇستىك قازاقستان وبلىستارىنداعى جولداردى، سونداي-اق كوپىرلەر مەن سۋ وتكىزگىش قۇرىلىمداردى قالپىنا كەلتىرۋگە، رەكونسترۋكسيالاۋعا جانە قۇرىلىس جۇمىستارى ءۇشىن اكىمدىكتەرگە بولىنەدى. اتاپ ايتقاندا، اقتوبە وبلىسىندا 31 جوبا جۇزەگە اسىرىلىپ جاتىر. ولاردىڭ ىشىندە ىرعىز – نۇرا، ىرعىز – قۇتتىكول، قۇمتوعاي اۆتوجولدارىنداعى سۋ وتكىزگىش قۇبىرلاردى، ويىل اۋىلىنا اپاراتىن اۆتوجولدى جوندەۋ، ويىل وزەنىندەگى كوپىردى قايتا جاڭعىرتۋ، سونداي-اق ايتەكە بي اۋدانى ايكە اۋىلىنداعى كوپىر وتكەلى قۇرىلىسى بار.

اقمولا وبلىسىندا اتباسار قالاسىنا اپاراتىن جول بولىگىن، اتباسار – سوچينسكوە اۆتوجولىن قايتا جاڭارتۋ، جالتىر – ماكينسك اۆتوجولىن، قالقۇتان اۋىلىنا، جامبىل جانە باسقا دا ەلدى مەكەندەرگە كىرەبەرىس جولدارىن جوندەۋ جۇمىستارى جۇرگىزىلەدى. بارلىعى – 14 باعىت.

قوستاناي وبلىسىندا قاراجات 22 باعىت بويىنشا جولداردى، كوپىرلەردى جانە 10-عا جۋىق سۋ وتكىزگىش قۇبىردى جوندەۋگە جانە رەكونسترۋكسيالاۋعا جۇمسالادى.

سولتۇستىك قازاقستان وبلىسىندا 10 جولدى، ونىڭ ىشىندە كوكشەتاۋ – ومبى باعىتىنداعى جولدى جوندەۋ، سونداي-اق 22 شاقىرىم سۋ وتكىزگىش قۇبىرلارعا ورتاشا جوندەۋ جۇمىستارىن جۇرگىزۋ جوسپارلانعان.

بولىنگەن قاراجات جەرگىلىكتى اتقارۋشى ورگاندارعا تۇرعىنداردىڭ ءقاۋىپسىز قوزعالىسىن قامتاماسىز ەتۋ ءۇشىن سۋ تاسقىنىنان كەيىن بۇلىنگەن جول بولىكتەرىن ۋاقىتىلى قالپىنا كەلتىرۋگە مۇمكىندىك بەرەدى.

ايتا كەتەيىك، 2024 جىلعى 17 شىلدەدە ق ر پرەمەر-مينيسترى ولجاس بەكتەنوۆ سۋ تاسقىنىنان كەيىن تۇرعىن ۇيلەردى جانە ينفراقۇرىلىمدى قالپىنا كەلتىرۋ ماسەلەلەرى بويىنشا كەڭەس وتكىزدى. ونىڭ بارىسىندا ۇكىمەت باسشىسى قالپىنا كەلتىرۋ جۇمىستارىنىڭ قارقىنىن ارتتىرىپ، تۋىنداعان ماسەلەلەردى جەدەل شەشۋ ءۇشىن ادامدار مەن تەحنيكانى جۇمىلدىرۋدى تاپسىردى.